2015年6月3日 星期三

邊首先係最慘情廣東歌? [FACE - 419] MF,



全知言

邊首先係最慘情廣東歌?

「一開心唱飲歌,不開心唱飲歌,當中紀錄我這麼長大過」。有幾多人鍾意用歌詞去表達心意?你又有無試過上堂喺書度抄歌詞?當年唱 K都應該係大家每月必做嘅其中一個活動啩?其實大家又有冇留意到,聽親唱親,十居其九都係慘情歌先?唔知班明星藝人,心目中最慘情嘅廣東歌,又會係邊首呢?

謝安琪 捧坤哥

〈原來她不夠愛我〉

喺我心目中,近排有一首歌我都覺得好慘情㗎,就係坤爺(吳業坤)嘅〈原來她不夠愛我〉。首先呢首歌我覺得好具備流行元素,即係大家都好容易投入到,每個人都有心底裡埋藏住一個人你覺得你好愛佢,但係佢唔夠愛你㗎嘛,所以呢隻歌應該可以 hit到好多人嘅心靈。

印象深刻當然係點題呢兩句:「原來她不夠愛我,原來我坐後備座。」嘩,坐後備座!我真係覺得個人係「動 L」去咗後面,好慘!原來你唔係正選嚟嘅,即係一直喺你身邊係最好嘅水泡一樣,嗰個心情真係好灰呀!

王宗堯  buy冷門

因為潘源良先生係我嘅好朋友兼恩師,佢最近搞一個作品展,咁其實佢有一首歌係好多人都唔知嘅,而係我好鍾意嘅一首歌,係陳奕迅嘅,叫做〈越想越無謂〉,因為呢一首歌係講佢嘅另一半出咗軌嘅,歌詞係非常之寫得到肉,同埋我覺得失戀嘅時候聽,係一定會匿喺被入面喊嘅!

〈越想越無謂〉

Coffee 失戀王

「仍然倚在失眠夜……」嗰首叫咩呀?〈月半小夜曲〉!因為我覺得夜晚啦,跟住仲要失眠啦,跟住仲要望住月光啦,幾慘呢係咪?仲要喊喎!

其實我發自內心㗎,你知我啦,成日失戀㗎嘛!

〈月半小夜曲〉

Karl 要襟聽

真係夠晒悲情呀呢首歌。今年有容祖兒翻唱咗女聲版本,張學友就已經係之前神級喇呢首慘情歌,咁一首慘情歌就要 long lasting得好耐喎,係要唔同年代嘅人都可以唱到,又識得唱,又覺得好有感情,好有感觸㗎喎,聽歌都學到嘢呀!

〈這麼近那麼遠〉

唐貝詩 講感覺

我由細到大都係鄭秀文嘅 fans嚟㗎,我諗由佢嘅第一首歌〈放不低〉開始就聽到𠵱家啦,咁我覺得佢最慘情嘅歌係一首叫做〈宿命主義〉嘅歌,係講點解永遠都係處身於一個好似好唔開心嘅狀態,我覺得呢首歌一來旋律好好聽之外,係唔知點解好容易入到個 mood,有時有啲咩唔開心都好容易會 link up呢首歌,即係有呢個共同嘅感覺囉!

〈宿命主義〉

聽到想喊街坊揀最悲廣東歌

歌手揀完心水慘情歌,一班年輕人竟然主打揀 90至年禧年嘅慘情歌喎!唔通近年冇 hit歌?

Joy 18歲撐陳小春

陳小春嘅〈失戀王〉。「每段戀愛都會認錯人,失戀的冠軍。」其實歌詞極慘,講自己係失戀嘅冠軍,即係成日失戀囉,所以係好慘囉!因為我成日聽我細佬唱!

〈失戀王〉

Vicky 19歲 慘到極點

陳奕迅嘅〈一絲不掛〉。慘到喊唔出,雖然未失過戀,但係聽歌可以想像吓!

〈一絲不掛〉

June 21歲 後備之苦

Swing嘅〈帝國大廈〉。嗰首歌嘅故事內容講一個男人鍾意咗一個女人,但係個女人一路都無接受佢囉,而個男人一直就好似個隨從咁跟住個女仔。最深刻歌詞係,「亦永遠在後補之中。」

〈帝國大廈〉

Yammy 20歲 旋律吸引

〈容易受傷的女人〉。應該係個旋律,好似有種好慘嘅感覺。

〈容易受傷的女人〉

即時報料

facepop熱線 9222 0828

電郵 facenews@nextmedia.com

facebook: facemagazine inbox

LINE、 we chat id: facemagazine

鍾意就快D Share啦!
Related Posts Plugin for WordPress, Blogger...