2015年6月4日 星期四

嫩妻施壓 世榮焗求家強阿 Paul [壹週刊 - 1317] 世榮,黃貫中,Paul,阿 Paul,家強,葉世榮,M1,



葉世榮跟太太年齡相差 22載,有指葉太一直是世榮粉絲。

探熱針

嫩妻施壓 世榮焗求家強阿 Paul

明知家強阿 Paul二人早已水火不容,葉世榮依然先斬後奏,聲稱會重組 Beyond,舉行紀念家駒演唱會。

嚟緊五十二歲的葉世榮其實為勢所迫,三年幾前娶了個細自己二十二年的內地嫩模張偉鈴後,又啤咗個女,女細老婆嫩,即使世榮無停過在內地巡迴唱搵錢,但三缺二的 Beyond,收入始終有限。在世榮嫂鞭策下,世榮只好排除萬難,重組 Beyond搵多啲。「嚟緊我每次返香港,都會分頭拜訪佢哋兩個!」葉世榮說。

今年是黃家駒離世 22周年。

家強簽約大岳娛樂後,經常拍住老闆任賢齊演出,工作不斷。

先斬後奏

今年是 Beyond主音黃家駒逝世二十二周年,可惜, Beyond已經解體,其中黃貫中和黃家強更加反晒面冇兄弟做。一向沉默的葉世榮,近日竟一反常態,對外表示會重組 Beyond,於年底舉行紀念家駒演唱會。

重組 Beyond開紀念騷,純粹是世榮一廂情願,仲要先斬後奏;咁大膽,只因世榮嫂背後推波助瀾。

一一年,葉世榮與細自己二十二年的內地嫩模張偉鈴結婚,婚後產下一女,女兒已經三歲,要養妻活兒,近年葉世榮在內地不停巡迴唱。

「呢幾年世榮一直留喺國內做騷,無論地點遠近都大小通殺,就算個女出世,佢都喺成都做騷,冇返去陪老婆生。」知情者說。

曾經被家強指責,借 Beyond之名賺錢的葉世榮,過去在內地演出,多以「 Beyond葉世榮」做生招牌,但 Beyond解散無人不知,加上鬧翻新聞冇停過,間接影響世榮收入。

「依家用 Beyond個名都無說服力!係人都知佢哋解散咗,世榮接騷亦無三年前個價咁好。結婚生女後,佢老婆已經冇做嘢,個女仲咁細,世榮嫂梗係想個老公賺多啲錢,所以成日嗌佢重組 Beyond,因為只要齊人做番次,跟住又可以『食』住巡迴一段時間,個價又會好啲。為咗滿足老婆,世榮唯有撲出嚟,搞紀念家駒 show,當然,都要睇家強同阿 Paul嘅決定。」

11年 12月,葉世榮與張偉鈴在北京擺酒大宴親朋。

母親居於香港,世榮每月都會返港探家人。

葉太張偉鈴婚前在內地擔任平面模特。

唔會放棄

雖然黃家強已經斬釘截鐵講明:「我唔會做」,但世榮並未有放棄,日前他在台灣做完信樂團的演出後,便立即返港,親自上門,搵過阿 Paul和家強。

「早幾日我返香港,都有抽時間分別去咗阿 Paul同家強嘅 band房見佢哋,當打個招呼,一個敍舊先。」葉世榮說。

和阿 Paul再碰面,世榮坦言感覺好不一樣。

「佢無晒憤怒,提到我嘅計劃,佢話隨時嚟得,隨時 standby,但要先睇吓個騷嘅具體內容,依家係好初步。」

膊頭最重

快踏入 52歲的葉世榮,是 Beyond三子中年紀最大一個,加上嫩妻張偉鈴要做全職媽咪,零吸金力,老夫少妻,世榮家庭擔子及經濟壓力,都比家強和阿 Paul重得多。

葉世榮 張偉鈴

02年,已計劃與拍拖七年的圈外女友許韻珊結婚,可惜婚前女友忽然在家中意外暴斃,一條心的世榮在女友喪禮上舉行了一場冥婚儀式,並一直戴着亡妻戒指。直至 11年,世榮突然公布婚訊,在北京迎娶比自己後生 22年的內地模特兒張偉鈴,並於翌年誕下女兒葉凱淇。

黃貫中 朱茵

Paul嫂朱茵自從產女後,幾乎絕跡幕前,要專心照顧「叉燒包」,朱茵將所有送上門的工作合約全拒諸門外,搵落唔少的她若肯復出接劇,依然有市場,吸金力不用懷疑。

黃家強  Makiko

經友人介紹下認識比他年輕 15年的日籍翻譯員 Makiko,二人 06年閃電結婚,婚後不足一年,火速造人成功,現育有兩子;老公錢多樓多,家強嫂大把條件湊仔做阿太。

停火協議

至於家強,世榮形容對方心中仍有一個結。

「佢對過去嘅嘢係有啲睇法,我都有安慰佢、勸佢,但家強未放得低,簡單啲講,我哋先要嚟個停火協議,大家冷靜吓先!大家要明白家強性格,他對一個人感覺,唔係三言兩語可以改觀。」葉世榮說。

去年家強大爆阿 Paul不是之處時,提到唔想再養他(世榮),對此,世榮表現平靜。「細個時口不擇言講嘅嘢,我自己就無聽到。唔好攞大家幾十年前小朋友嘅嘢嚟放大,過去你笑吓我,我笑吓你,大家都唔好擺喺心裡面,大家都幾十歲人!」

留守內地搵食,世榮早以北京為家。「我每個月會返嚟一次,因為屋企人都喺香港。(老婆支持你重組 Beyond?)我做乜佢都支持!」

重組 Beyond絕非三言兩語的事,但世榮依然抱住希望。

「我每次返香港,都會親自分別去拜訪佢哋!(幾時安排三個一齊見面?)要俾啲時間,突然間三個一齊坐低,會變咗好刻意。」葉世榮說。

世榮強調籌備「紀念家駒演唱會」只為做慈善,藉以宣揚家駒的精神,絕不牽涉利益。

阿 Paul曾表示,一見女兒黃鶯,便會即時熄火。

幾天前曾到訪阿 Paul Band房,世榮表示大開眼界。「阿 Paul變咗好多,平靜咗,佢畫咗好多畫。」

世榮與家強敍舊,未傾合作先談仔女經。

唔使憂

Beyond解體後,三子各自𢱑銀,其中以被指在家駒意外離世後,與家人獲賠償過億的黃家強手頭最鬆,多年來投資磚頭,有賺無蝕,比起至今僅得一間屋仔的阿 Paul和世榮,家強確無後顧之憂。

鍾意就快D Share啦!
Related Posts Plugin for WordPress, Blogger...