掃呢頁CODE去手機

2015年6月5日 星期五

偷食張景淳  Regen遭前男友家暴 [忽然1周 - 1036] Regen,張景淳,張惠雅,MW,



默認被打

被問到是否曾遭家暴, Regen表示:「過咗去嘅嘢,我唔想再提。」冇否認曾被男友動粗。

滾熱辣

偷食張景淳  Regen遭前男友家暴

前 Hotcha成員 Regen(張惠雅)近年轉戰拍劇,在新劇《潮拜武當》中擔任重角。唔講唔知,去年 Regen拍《潮》劇時,曾撻着劇中男角張景淳,兩人秘密拍拖 3個月。

不過,當時 Regen仍有一個細她 5年的男友 Esta(沈瞳伽),手續未搞清,難免有一腳踏兩船之嫌。有傳 Esta得悉女友移情別戀,大發雷霆,兩人衝突間更發生激烈推撞。「有人郁手郁腳, Regen好傷心,即刻同佢斬纜。」知情者說。 6月 3日,記者向 Regen求證是否曾遭前男友家暴,她十分無奈︰「過咗去嘅嘢唔想再提。」

張景淳

11年 Regen因被指介入公司老闆薛世恆及陳法拉的婚姻,帶住情緒病去澳洲遊學兩年。一向觀眾緣不差的她,回港後再戰娛樂圈,更單拖發展,有幸在大台劇接劇。

Regen曾經在訪問中揚言不能接受姊弟戀,但愛情大過天的她,去年多次被傳媒拍得與細他 5年的 Esta(沈瞳伽),不避忌十指緊扣甜蜜拍拖。而男方更密密在 Instagram大晒恩愛! Esta因高大靚仔,擅長跳舞,與 Regen去年 4月在香港跳舞比賽中認識,未幾兩人已打得火熱, Regen更搬入男方家共賦同居。據知 Esta已簽了經理人,今年積極受訓,準備出道。

混亂四角戀

去年 10月, Regen離港到武當山拍大台新劇《潮拜武當》,其間與同劇的張景淳( Stanley)拍出感情。「 Stanley對人出名細心,對工作人員同演員都好照顧,見天氣凍又會主動煲薑茶俾大家,所以個個女仔都讚佢『暖男』。當時 Stanley咁啱同女朋友宋雙佳(華姐)因為相處問題冷戰,而 Regen則與躁底男友經常嗌交,兩個感情出問題嘅人特別好傾,就係咁大家有咗 feel。 Stanley仲主動出擊狂追 Regen。不過當時 Regen仲未同 Esta正式分手,大家咪玩地下情囉!有人仲聽過 Regen喺電話同男朋友吵大鑊。」知情人士透露。

張景淳是近年大台上位新人,最為人知是在《天與地》飾演年輕版家明。

Regen去年 4月與 Esta在活動上認識, 26歲的她曾表示不接受姐弟戀,但最後都為了年約 22歲的 Esta破戒。

入行以來, Regen只有同唱片公司老闆薛世恆傳過緋聞。有指當時薛世恆正印陳法拉下「放逐令」,要 Regen去澳洲讀書。《蘋果日報》圖片

泰國之旅出事

據知《潮拜武當》拍攝大半個月後, Regen拍完自己戲份先返港。她為了箍煲曾與 Esta泰國旅行散心,豈料期間兩人又因為小事發生劇烈爭執。

「 Esta嗰次去泰國,偷睇 Regen的短訊,發現張景淳向 Regen噓寒問暖,即醋意大發,大興問罪之師,躁爆嘅佢更嬲到掟嘢兼打牆發洩,咪搞到隻手爆晒缸。混亂間 Regen亦被推埋牆,撞損了膝蓋,總之就兩敗俱傷。返港後, Regen嬲到執晒啲嘢搬離男友家,仲即時同男友斬纜。」知情者說。

而事實上, Esta在泰國返港後,未幾即鋪了一張傷手相片上 Instagram,更寫道︰「手掌骨尾指骨骨折,人生的第一次。」

話咁快!今年二月, Regen與張景淳被拍得在街頭拖手仔拍拖,二人孖住到夜店玩到凌晨。張景淳最後還仲送女友 Regen返屋企,兩個在樓下更依依不捨攬作一團。以為 Regen找到真愛,不過原來只是過眼雲煙。今年 5月 20日,張景淳鋪了張接吻相上 Instagram,但女主角卻是舊愛宋雙佳。可見他舊情復熾,而他與 Regen的戀情只是 3個月貨仔。

十指緊扣

Regen與 Esta曾愛得痴纏,兩人不避嫌當街十指緊扣。《蘋果日報》圖片

拍劇撻張景淳

與男友嗌交後, Regen在武當山拍《潮拜武當》時,與同劇的張景淳朝夕相見,因而撻着。

動粗傷手

與 Regen分手時, Esta亦自鋪傷手相上 Instagram,又話斷骨兼手腫,搞到上跳舞課都要紮住晒。

唔認一腳踏兩船

就家暴事件向 Regen求證,問到她的前男友 Esta是否郁手打過她。她無奈說︰「過咗去嘅嘢唔想再提。(你係咪一腳踏兩船,前度㷫爆郁手?)吓! Esta佢都有女朋友啦,我係同張景淳拍過拖,但當時已經同 Esta分手。(張景淳之前都因為你同女友宋雙佳分手喎!)張景淳係個好好嘅男仔,佢喺我面前都有讚女友好,我好肯定佢同女朋友分咗手先同我一齊。」

提到張景淳現在重投舊愛懷抱, Regen說︰「可能同我拍咗拖先發現唔係好鍾意,又可能佢真係發現自己好鍾意之前嗰個。我依家同佢已經冇聯絡。」本刊就此事聯絡過張景淳及 Esta,但截稿前未有回覆。

返港黐實

Regen和張景淳在武當山已經混熟,回港後,劇組聚會時,兩人仍然孖公仔黐實。

扒艇冧女

為了取悅 Regen,張景淳經常搞笑,試過扮用手扒艇,搞到 Regen笑唔停口。

正印漫步

張景淳與華姐宋雙佳拍拖,兩人 2012年被發現在雨中漫步,又住同一幢大廈。

鋪相箍煲

張景淳在 5月 20日(諧音「我愛你」)上載一張他與宋雙佳( JiaJia)的吻照,成功箍煲。

Regen07年加入「 Hotcha」入行, 2013年回歸香港後加入大台拍劇,同年 Hotcha宣布正式拆夥。

遭家暴勿死忍

唔少女星就算遭家暴,都會選擇唔出聲。不過事實證明愈忍愈出事,最後仍然逃不過分手下場。

林欣彤三度被打

早前患抑鬱兼厭食症的林欣彤( Mag),因被男友 Ben疑心出軌,三度遭受家暴,最後女方忍無可忍,終於分手。

可嵐遭家暴四年

2010年歌手可嵐在半島酒店下嫁食肆老闆,但原來婚後飽受家暴四年。去年可嵐終於提出離婚,並重投娛樂圈。

趙頌茹報警求助

去年趙頌茹與周永恆兩夫婦因事爭執,趙頌茹遭周永恆撞傷,並報警求助,後來兩人更離婚。

羅霖人前恩愛

羅霖與劉坤銘多年來以「恩愛夫婦」示人,兩人突然於 2012年離婚,後來羅霖更自爆曾遭家暴。

四角戀特別多

男女藝人拍劇朝夕相對,真係好易日久生情。就算名草有主,同對手也可以照搞曖昧。

陳豪廖碧兒分頭搵食

05年,陳豪同廖碧兒合作《心花放》而撻着,兩人拍拖六年,是熒幕嘅金童玉女。不過 2010年陳豪拍攝《心戰》時,竟同飾演妹妹嘅陳茵媺撻着,同時廖碧兒又約會富二代林忠豪。

陳冠希方力申爭女

03年,方力申先後與阿嬌及 Stephy撻着。翌年, Stephy同陳冠希因拍電影《九個女仔一隻鬼》而傳緋聞,兩人更同遊台灣,當時 Edison與阿嬌仍是男女朋友關係。直至 05年, Stephy才將方力申私有化,終結這段四角關係。

蔡思貝累周志文

與舞蹈總監麥秋成拍拖嘅蔡思貝,去年拍攝《衝線》時,先向對手羅仲謙發姣功,之後再轉冧「大孖」周志文,搞到大孖被有米女友 Co Co狠飛,把他逐出貝沙灣愛巢。

鍾意就快D Share啦!