2015年7月22日 星期三

胃酸倒流火燒喉 吳千語 88磅激瘦 [FACE - 426] 吳千語,千語,MF,



我身體冇咩事!真實對白

封面

胃酸倒流火燒喉 吳千語 88磅激瘦

天生省鏡、青春無敵、一出道就有老闆黃百鳴照、一出名就搵到男神林峯錫,好多人都葡萄千語 BB得天獨厚,要嗰樣有嗰樣。都係嗰句啦,各有前因莫羡人,就算係千語 BB,都有苦難言!

成個月唔見人,同韓國男神李𡃁鎬套新戲亦未埋到位,《 FACE》獲悉,前途無限嘅千語 BB突然停工,原來深受胃酸倒流困擾,瘦剩 88磅變火柴人!最慘係暴瘦後遺症手尾長,峯峯,小心 BB身體呀喂

愈減愈肥聽得多,吳千語呢鋪係愈增愈瘦。一向身無四兩肉,上月 17日出席品牌活動時明明當眾話過努力中、目標增肥十磅!一個月過去,《 FACE》在西環寓所外捕獲素顏歸家千語 BB,增肥十磅?瘦多十磅至真!

最索 103磅

高峰期體重 103磅,千語 BB圓潤啲、條腰粗啲、開心啲,連笑都笑得靚啲。

勁黑眼圈

一個月內體重狂跌 15磅,近睇 BB面色焦黃、眼袋深邃,落晒形!

頭大過身

唔靠衣裝又全無化妝,千語紙片身形無所遁形,睇到都肉赤。

火柴腳

正值事業衝刺期,千語偏偏因為身體狀況而減少曝光,上次蒲頭已經係上月出席活動。當時對腳已經瘦到牙籤咁!

素顏火柴人

扶老携幼就話要搵個外籍傭工傍住啫,上週一( 13日),在西環寓所附近,千語 BB都要傭工傍實左右,的確不尋常。記者表明身份,得嗰 22歲人仔,平時靚爆鏡自信爆燈嘅吳千語,突然信心全失左閃右避不願上鏡。

望真啲,身型一向瘦削的千語一個月不見,再瘦一個碼,加上完全素顏不經修飾,身形變紙板,面頰皮包骨、眼窩深陷眼袋黑黃,實在同最佳狀態時差一大截,難怪如臨大敵般唔願上鏡。

最慘中咗 BB毒嘅林峯又要忙搵食,孖住千語拍拖依偎 shopping嘅畫面已經好耐冇見。

上週六( 18日),林峯特意離開劇組又唔係為咗陪 BB養病,而係跟英皇大隊飛去加拿大表演搵錢。網上圖片

千語停工養病,林峯就人在內地忙拍攝《六扇門》,無得陪伴在側精神支持。網上圖片

累埋李敏鎬

上月見記者,千語曾自爆身形過瘦,正求助營養師和健身教練專業意見,目標增肥 10磅。

但據知高峰期體重 103磅,千語近日急跌 15磅,瘦剩 88磅,原來胃酸倒流日益嚴重,受盡火燒喉之痛。雖然食慾正常,不過食幾多嘔幾多,唔只減磅瘦面靠衣着化妝無補於事,亦直接影響體力和心理健康。

六月中出席完中港韓合作新片《賞金獵人》記招後,明明話學定韓文、短期出發到韓國開戲,亦因為千語狀態欠佳行程一推再推,累埋李敏鎬、楊冪和其他演員要改檔期。

家庭醫生關嘉美:小心食道癌

人體食道同胃相連,當食道同胃之間瓣膜運作唔正常,就會出現胃酸倒流嘅情況。本來呢個病算係常見都市病,情緒壓力、生活緊張、飲食習慣都會導致胃酸倒流,正常嚟講睇醫生食藥、戒食酸嘢同辣嘢,幾個星期都會好番。不過一定要睇醫生,最怕食道發炎,或者有食道癌誤以為係胃酸倒流咋!

「做運動 fit咗啫!」

有機會拍合拍大片,又憑另一套電影《王家欣》獲得美國獨立電影獎影后大獎,卻因為健康問題打亂陣腳,最慘愛人林峯又唔喺身邊,忙拍內地古裝劇《六扇門》,人生最低潮的一個月全靠千語獨自支撐。

撐完自己又要喺記者面前繼續撐,被本刊問到健康問題,千語一面避鏡頭一面強顏歡笑話冇事:「冇呀冇呀,我身體冇咩事,係做運動 fit咗啫嘛……(林峯有冇關心下你?)冇咩事,佢拍劇各有各忙……我冇咩事,多謝關心!」明明又話搵健身教練為增磅,點會反而變咗減肥?千語 BB唔係淨番好多磅跌咋,小心身體吖!

大露背都冇肉

係就係瘦到落晒型,好彩就有個靚樣同白滑靚背頂住,殺落中環依然搶鏡。不過件衫好難戴胸圍,唔通千語 BB真空咁大膽?

食極唔肥、開工受阻,千語 BB大把時間,月初( 8日)獨自去中環修靚指甲,身形紙咁薄。

原訂六月開鏡、同李敏鎬、楊冪合作的《賞金獵人》,千語都因為胃酸倒流令體重急降延遲入組。網上圖片

林峯出名對女友好,早前便發現他落街買小食返去陪千語開餐!問題係, BB食得落先得㗎?

被記者問到同林峯近況,千語都話:「佢拍劇,各有各忙!」《蘋果日報》圖片

唔係講笑 好多人都受過折磨

《蘋果日報》圖片

話到明都市病,唔好以為胃痛、胃酸患者梗有幾個喺身邊就懶懶閒,其實胃酸倒流可大可小、圈中患者亦唔少。最經典係 03年自殺嘅哥哥,除咗抑鬱症,據悉亦深受胃酸倒流影響,間接令他選擇結束寶貴生命。

張國榮

03年哥哥從文華酒店一躍而下,結束 46年短暫一生。有傳哥哥除咗抑鬱症,亦長年受胃酸倒流困擾,更因此惡化成胃炎。

陳法蓉

49歲陳法蓉亦都因為胃酸倒流一度推戲停工,可惜醫治後又再發現三叉神經問題,差點面癱。

薛凱琪

曾經因為抑鬱症自爆一度想尋死, 34歲薛凱琪原來一樣患有胃酸倒流,還因此影響聲帶健康,差啲放棄歌手身份。

馮寶寶

61歲寶寶姐多年前亦在檳城因為胃酸倒流入院,醫治後再第二度因為胃出血住院,現時已康復。

鄭丹瑞

60歲阿旦十年前開始火燒心、每晚更因為心口痛難入眠,因此發現胃酸倒流及有幽門螺旋菌。

峯峯夠照

又難怪峯峯成日俾人話中 BB毒,同千語 BB拍拖史無前例咁公開、亦都史無前例咁疏爽,包食包玩包買有求必應外,去年更傳出要為 BB物色三千萬物業贈樓,大半年後,千語 BB仲未做業主、仲住緊林峯月租九萬金櫻閣。不過唔買住啫,林峯有家底、自己又搵到,未計「廈門李嘉誠」老竇身家,四月再透過公司轉讓形式揸多層市值 6,800萬薄扶林嘉林閣(上圖)豪宅,遲早咪又係 BB嘅!

鍾意就快D Share啦!
Related Posts Plugin for WordPress, Blogger...