掃呢頁CODE去手機

2015年7月8日 星期三

最細超級英雄 蟻俠暑假笑住打 [FACE - 424 - 外地娛樂] MF,



耗資 1.3億美元(約 10億港元)拍攝的《蟻俠》,由《復仇者聯盟》特技班底搞製作,在港上映時更設有 3D及 IMAX 3D版本。

西區

最細超級英雄 蟻俠暑假笑住打

Marvel英雄唔只打得,仲個個識生金蛋、繼鐵甲奇俠、美國隊長、雷神狂拍續集賺到笑後,今年終於輪到《蟻俠》( Ant-Man)出動。

一樣由迪士尼出品的《蟻俠》,講述一個細如螞蟻的全新英雄人物,從小偷變成英雄的故事。賣點當然與同門兄弟鐵甲奇俠及雷神影片一樣, sell動作特技、照例打得熱鬧刺激。但除打打殺殺,今次仲搵埋諧星 Paul Rudd擔正演蟻俠加強笑料氹觀眾開心。《復仇者聯盟 2》已落咗畫,《蝙蝠俠 Vs超人》又要到下年先出街,今年暑期英雄,仲唔係蟻俠世界?

《蟻俠》

上映日期: 7月 16日

《蟻俠》講述 Paul Rudd飾演的騙徒,被 Michael Douglas飾演的科學家賞識,他着上戰衣便化身蟻俠,除保衞地球,最主要目的是對抗大奸角黃蜂人( Yellowjacket)。

Paul Rudd一着上蟻俠戰衣,得到微型原子縮小身體,身形即可縮細如螞蟻,但超能力卻如一般超級英雄般強大。

今次扮演奸角黃蜂人的是有份演出美劇《紙牌屋》的美國演員 Corey Stoll(右),戲中 Corey原本係科學家 Michael Douglas徒弟,但最後師徒反目變敵人。

Marvel英雄個個一早單飛拍電影,點解《蟻俠》要等到𠵱家先出籠?

其實 Marvel早於 20年前便打算將蟻俠一角抽出來拍成獨立電影,但因為電影公司為求賺錢至上,所以先揀一些最有潛質上位的英雄如鐵甲奇俠、美國隊長及雷神等拍成電影。等到其他英雄幫公司賺到夠本,終於決定今年才推出《蟻俠》應市。

據知《蟻俠》導演 Peyton Reed(左)曾睇過 Paul演出的喜劇,最欣賞他演搞笑戲時自己唔笑,但能引到其他人笑。

點解會搵諧星 Paul Rudd飾演蟻俠?

《蟻俠》宣布開拍前,其實傳過想搵 Joseph Gordon-Levitt、 Adrian Brody及 Ewan McGregor擔演蟻俠。論個樣似螞蟻, Adrian Brody必屬首選,但因今次電影公司想在《蟻俠》中加強笑料,最後搵咗曾拍過喜劇《弊傢伙……搞大咗》及《男人四十戇居居》的 Paul Rudd擔正。

在浴缸着上蟻俠戰衣的 Paul Rudd,只要在手套位㩒一下紅色掣(小圖),即縮細變成蟻一樣,還在浴缸中大戰巨浪。

戲中蟻俠點樣先可以變到好似蟻咁細?

蟻俠最大特色,就是可以縮到好似螞蟻咁細,但力量就如其他超級英雄一樣咁勁,而且飛跑速度更快過子彈,不過蟻俠怎樣變身一直成謎,但上週電影公司終於推出新預告片,拆解變身之謎,原來只是㩒一個掣。

蟻俠早在 Marvel漫畫中經常出現,與美國隊長一齊伸張正義,而下年上畫的《美國隊長 3》,蟻俠亦會出場客串。

聽講 Paul將再下一城,會在《美國隊長 3》客串?

Paul演出《蟻俠》後已升呢做英雄片男主角,下年上畫的《美國隊長 3》已預埋他,繼續扮蟻俠跟其他英雄一齊保衞地球。

鍾意就快D Share啦!