全知言
想睇邊個？推到魯芬出寫真
模熱潮近年冇晒，但 7月依然係寫真旺季，今年除咗 34歲黃榕繼續出寫真，亦有台灣幫雞排妹越洋挑機，最爆當然係年過半百嘅羅霖都出寫真，仲要有 50個造型，宅男會唔會科水撐羅霖姐姐就未知，不過一眾藝人好似嫌羅霖太 young，楊思琦話想羅蘭出寫真，傲兒 BB就話想睇魯芬，人哋出你係咪買先？
何傲兒 魯芬老少咸宜
諗咗好耐喇，我最想魯芬 BB出寫真，首先一個女藝人出寫真呢？如果好性感呢，一定係男仔買，女仔就唔會買嘅，但魯芬 BB係老少咸宜大家都鍾意佢，佢會畀到一種好歡樂嘅感覺，所以佢出寫真一定會大賣嘅。佢着咩衫影都唔重要，因為佢着咩都會好突出，一定會望咗佢先。我就未諗過出喇，雖然好多人覺得我轉咗公司會解放啲，但我都仲係好怕醜呀！
楊思琦 羅蘭姐混血兒咁靚
最想睇嘅寫真女藝人呢？就係羅蘭姐，因為有啲節目睇番佢以前啲相，原來係好靚女㗎，簡直係美若天仙咁靚，好似啲混血兒咁靚，平時嘅羅蘭姐都係和藹可親，同埋笑容好靚！其實我好少睇女藝人寫真，最近睇到羅霖姐姐幾張相，真係影得好靚喎，保養得非常之好，如果遲啲有本寫真關於我嘅，我都可以去試吓。
余迪偉 Jeana對腳
我最想睇嘅梗係 Jeana出寫真啦，因為佢對腳真係無限，對腳長到永遠都唔完咁，我覺得佢除咗性感之餘呢，仲有一陣少女味，佢個樣好現代，但古裝又係會得嗰啲，唔想佢剩係暴露嗰啲，想佢着下啲古裝，唔只係中國人古裝，可以扮下印度人古裝，或者係着歐洲人宮廷式古裝都係靚嘅。
Jeana 女神造型
我最想我女神 Natalie Portman出寫真，我自己好鍾意佢同欣賞佢，我想佢由《這個殺手不太冷》開始到之後嘅電影，每個戲入面嘅造型都影。我自己暫時唔會再影，或者第時大肚嗰陣會同老公影一輯紀念。
絲打想睇吳彥祖全祼
藝人好多就想甘草出寫真，慌死俾人話好色咁，市民就直接好多喇，尤其唔少絲打，話好想殿堂男神吳彥祖出寫真，仲要係全祼嗰隻；男仔就最想娜姐再出！講到尾出寫真，真係要一副好 body先得，呢兩位真係冇得輸。
Claire 21歲
吳彥祖囉，因為佢身材好又靚仔，着咩衫？唔好着梗係！寫真唔係唔着衫㗎咩？女藝人我冇留意喎！
黃先生 21歲
周秀娜啦，我淨係識得佢，佢好耐冇出啦，吳若希？連詩雅？佢哋唔係做呢啲喎！
|
鍾意就快D Share啦！
|
|
|
