2015年7月8日 星期三

簽約黎明做歌星 溝唔溝通到? 馬天佑:佢可以 1人分飾 100角! [FACE - 424] 馬天佑,黎明,MF,



27歲的馬天佑未入行前曾在英皇、東亞及金牌大風等唱片公司實習,轉做形象設計之後好順理成章同各藝人合作。

爆 Like王

簽約黎明做歌星 溝唔溝通到? 馬天佑:佢可以 1人分飾 100角!

馬天佑做形象顧問只不過兩年半,合作過嘅都係天王天后,黎明、容祖兒、阿 Sa、張惠妹、蕭亞軒等等,喺娛樂圈可以話冇人唔識!最近馬天佑做埋歌手簽約黎明旗下的 Amusic,新歌〈搞破壞〉有乜特別?由黎明親自操刀做導演喎,剩係兩個人點溝通都夠好玩

馬天佑亦進行緊大 project叫 15FAME,邀請 52位藝人名人,每人拍一條不同主題嘅 MV短片,每週一位拍足一年!如何解決歌星藝人嘅唱片合約同肖像權係超級難題,但馬天佑都一一解決,愈難愈要做。

F:黎明點解肯做你 MV導演?

馬:我想玩音樂好耐,喺台灣認識咗班製作人,提議我唱歌咁就做咗首歌,返到香港幫黎明做電影造型,相處間覺得同黎生諗嘢好接近,畀咗隻歌佢聽,要求佢做 MV導演,佢就應承。佢好認真!佢個腦速度應該係成 crew人加埋咁快,佢可以分飾 100角,做導演同時諗埋攝影、化妝、造型、燈光,邊個部門出問題佢都會知。(同佢點溝通?)有時驚佢聽唔明我講咩多啲喎!我哋兩個鬥唔明囉但又明囉,我哋溝通方式同一般人唔同,撞到明為止。

馬天佑新歌〈搞破壞〉有十幾萬人睇過,但有網友批評他唱功差,馬天佑好豁達咁講:「冇問題,最驚冇人講啫!」網上圖片

黎明執導的 MV有大量卡通 CG,馬天佑稱:「黎生好多構思同我好夾,大家都覺得用卡通恐龍代表搞破壞最得意。」網上圖片

F:你同咁多明星合作過,邊個最特別?

馬:其中一個係阿 Sa,佢好清楚自己事業上每個階段佢要扮演咩角色,佢要觀眾睇到佢啲乜,每個階段都唔一樣。𠵱家可能比較女人味,好有演技、好真誠;以前要好活潑、好可愛。佢嘅態度係默默耕耘,遇到挫折係正常嘅,要勇敢面對,唔好諗歪、唔好行捷徑。 Twins合體幾好吖!雖然阿嬌有時唔係我負責,但合作冇難度。

近日阿嬌送咗個 Woody公仔畀馬天佑,馬即時掛咗喺背囊。

蔡卓妍經歷過好多風風雨雨,馬天佑大讚阿 Sa夠硬淨,而且好清楚自己定位,合作非常愉快。網上圖片

F:你嘅 15FAME牽涉 52個藝人,有冇遇過困難?

馬:佢哋有唱片公司約、肖像權等,要逐一解決;因為係冇利潤嘅,亦冇任何商業單位參與,而且放喺好多平台播放,外國 blog好多媒體等等,所以一開始請教咗啲前輩級人馬意見,教我點解決版權問題,令成件事係屬於佢哋自己嘅 project,唱片公司至會好放心做呢件事。我做 15FAME嘅原因係睇到社會好多壓力,想做啲好玩嘅嘢啫!

15FAME位位藝人都係義務拍攝,薛凱琪就要串連自己歌名唱歌兼扮天氣女郎。《蘋果日報》圖片

暫時有得睇嘅有 Angelababy同周麗淇,周麗淇要求有海豚至肯拍 15FAME,馬天佑即聯絡海洋公園幫手,就係咁周麗淇同海豚合唱嘅畫面出現了。網上圖片

F:你今年只得 27歲,點樣令藝人相信你?

馬:初初好多人質疑我,問我係咪助手。最緊要唔好迫佢哋,要了解佢哋,要知佢哋做過咩,我會花時間去睇佢成名作係乜,鍾意佢啲乜,唔鍾意佢啲乜,評論、讚美嘅都係研究,一個 artist係唔會想同佢合作嘅人係由零開始,我要做到真係想幫佢,令佢踏出佢嘅安全地帶,愈紅嘅 artist愈多呢啲問題,所以要更小心囉!

同馬天佑長期作戰嘅 Angelababy難得會喺 15FAME開金口,真係要留意吓!網上圖片

網上圖片

鍾意就快D Share啦!