封面
結局零對白 回家被排擠 黎諾懿侮辱朱慧敏：打×機都唔識
大台處境劇《愛．回家》上週五（ 3日）播出第 804集，（觀眾叫大結局，但大台冇咁講過，留意！）收視平均 24點，最高 25點，一度令網民十分掛念嘅 Alex朱慧敏終於出場，但可惜只在尾段兩分鐘出現，連對白都冇，令唔少網民鼓譟。
劇中同馬壯黎諾懿，二人感情綫絕對係賣點，但私下關係惡劣，多次傳出不和。據知，試過有次拍廠戲，朱慧敏想黎諾懿俾句對白入戲，點知對方一句劈埋去，「做咗咁多年戲，連自己打 X機都唔識咩？」全場演員、劇組人員即時 O晒嘴，亦令朱慧敏相當尷尬。
34歲朱慧敏未婚夫 Eddie彭懷安被爆偷食，搞到女方要飛去美國療情傷。愛情失意，原來事業亦有阻滯，拍攝 3年嘅《愛．回家》上週五（ 3日）播出 804集，之後會以新班底續拍，朱慧敏飾演嘅 Alex亦會「被消失」。曾經有傳戲劇總監曾勵珍唔 like朱慧敏，所以要朱慧敏消失，但因網民力撐，所以 Alex先有機會喺尾集出現 2分鐘。
黎黨聯手對抗
主角變茄喱啡，朱慧敏當然唔開心，更唔開心係被同事打壓、排擠，其中以黎諾懿為甚。原來監製徐遇安三年前，係打算搵身材出眾嘅高海寧搭黎諾懿，可惜最後換上朱慧敏，令黎冇得同咪神談情，加上朱慧敏開工太認真，同黎 hea住開工成對比。
據了解曾經有人要求黎生開工認真啲，結果令關係更惡劣，黎諾懿更聯同劇中演員張達倫和李霖恩等排擠朱慧敏。據知，上年二人拍攝律師樓廠戲期間，由於導演想拍朱慧敏大特寫，朱要求黎諾懿「俾尾句」（講句對白）等她入戲，但黎生啋佢都傻，仲話：「你做咗咁多年戲，連自己打 X機都唔識咩？」此話一出，全場人呆晒，大家都覺得馬壯過份咗！
回家冇愛
標榜一家人，成日有馬家食飯戲睇嘅《愛．回家》，其實私下分黨分派，後生蔣家旻就同羅天宇等 friend，最大幫派當然係黎諾懿為首，劇中成個律師樓同事都係佢啲馬仔，頭號獨家村係朱慧敏，而二號就係林漪娸！
林漪娸
好心被鬧
黎諾懿同朱慧敏不和到上面，其實劇中都有另一對死對頭，就係馬家嘅郭少芸、林漪娸。劇中二人同枱食飯，但私下唔只冇偈傾，據知有次郭少芸化妝後留低手袋，林漪娸好心上前攞俾佢，點知被郭少芸鬧：「博 friend呀？個袋 Celine嚟㗎！」
張達倫力撐︰我同諾懿好 friend
週一（ 6日）《愛．回家》變了《愛·回家延·新愛》，對於朱慧敏當眾被寸，同黎諾懿係老死嘅張達倫就力撐、他說︰「佢唔會咁講嘅，俾尾句自動波㗎啦，你唔俾，導演都會鬧添，我同諾懿真係好 friend，同阿朱（朱慧敏）就普通啦，排擠啲小學生咩？我哋大人嚟點會做呢啲呀？」而同黎諾懿合作 800幾集嘅徐榮就話︰「我唔喺度喎，呢場咩嚟㗎？我哋不嬲俾番對白大家做戲。」
Eddie守行為
朱慧敏劇中被人恰到上心口，反而同朱慧敏冷靜緊嘅 Eddie彭懷安，就專心事業，繼續戒煙戒酒。但 Eddie拍完大台嘅《以和為貴》就即刻靜晒，朱慧敏又未有劇開，大家有時間應該可以培養番感情啦。
馬壯 Alex翻撻冇期
804集《愛．回家》未完㗎，週一（ 6日）由張繼聰、黃翠如孭飛嘅新一輯登場，雖然話馬家會不定時回歸，不過仲想睇馬壯同 Alex呢一對可能要等吓喇，事關馬壯嚟緊開新劇《純熟意外》， Alex就由親生女變做普通藝員約，大家都知唔係親生，機會少幾多所以，睇唔到佢兩個，咪睇張繼聰同翠如 BB囉，可能佢哋又不和呢？
翠如 BB執三攤
律師樓變健身室
新主景為健身室，擺明喺俾張繼聰騷肌，仲有另一主景為麥包屋企，以後啲食飯戲全部佢屋企做晒。
|
鍾意就快D Share啦！
|
|
|
