明珠台美劇取消粵語配音 TVB狂收投訴
2015-09-07 18:01:00
在七月中TVB有一張內部通告流出，係話佢哋為咗其他配音節目急增接近六成，應付龐大的工作量，平衡唔同節目需要，作出取捨，明珠台英語節目需要作出調整，明珠台英語紀錄片，生活資訊及旅遊節目等，會繼續有廣東話配音同中文字幕，然而喺英語電影同埋劇集方面，除咗以兒童為對象嘅節目同卡通片外，都只係會提供中文字幕。
果然大台通告出咗，亦已經付諸實行，連日來本報收到好多電郵投訴，TVB亦收到35個電話投訴，指明珠台取消雙語廣播，令佢哋好唔方便，主要原因係上個星期六明珠台播《Fast & the Furious 6》同埋星期日播《Real Steel》，而星期日嗰套《Real Steel》係講機械人，應該有唔少小朋友睇，但係又冇粵語配音，喺嗰一刻，佢哋係真正感受到大台內部資源調配，為市民造成嘅不便，早前喺mytv嘅討論區，亦見到唔少市民大眾對TVB取消粵語廣播感到失望，有人仲希望TVB可以恢復粵語廣播，方便有需要的人士，唔知TVB有咩反應？識得搞全民直選，咁又會唔會聽取下民意呢？
而本報向通訊事務管理局查詢，發言人回覆內容如下：
1) 通訊局最近(由9月5日至7日)有否接獲有關無綫電視明珠台，取消麗音廣播的投拆？共有多少宗？
答: 截至今日(9月7日)下午5時止，通訊事務管理局共收到14宗有關投訴。
2) 目前《廣播條例》及相關發牌條件，對「麗音」廣播有否任何規定或限制？
答: 現時《廣播條例》及免費電視牌照的條款，並沒有規定持牌機構須提供麗音廣播。持牌機構可根據本身的需要決定是否提供麗音廣播，為觀眾提供適切的廣播服務。
|
鍾意就快D Share啦！
|
|
|
