2015年9月17日 星期四

情侶未滿 使用 WhatsApp守則 [壹週刊 - 1332] WhatsApp,M1,



猜心羅生門

情侶未滿 使用 WhatsApp守則

Iris:大事勿用

Arke: WhatsApp原意就是不用急着睇、急着覆,你遇上急事卻怪他/她沒即時解答解救你,盞搵交嗌。

Iris:嗌交用就對了

Arke:兩人偶有磨擦,所謂相嗌唔好口,面對面或講電話唇槍舌劍,往往愈講愈㷫; WhatsApp打字則可以諗清諗楚,話到「手」邊留幾分,多了一層潤滑劑。

Iris:別靠 WhatsApp道歉

Arke:有意言歸於好,透過 WhatsApp認認低威、作為開端的確是一層潤滑劑,講句 I'm so sorry較容易,但正式的道歉就別指望它了。同理,你唔會「求其」到用來求婚或者分手啩?

Iris:頭像別挑逗

Arke:眾所周知,頭像是通用的,就算你一心以性感畫面吸引他/她,因為仍處於情侶未滿的試探階段,佢會誤以為你對所有人都發花癲㗎。

Iris:每條別超過四行

Arke:短訊貴乎短──你一定試過明明自己寫得很詳細,而對方卻完全捉不着重點似的吧?原因是人類睇 WhatsApp的慣性已培養成對太長文字會自動 skip,而且等待你慢慢打字也令人着急,甚至暴躁。

Iris:長話短說有來有往

Arke: WhatsApp也算對話的一種,對話怎能有你講冇人講?若實在有複雜意思要表達,亦等對方看完一小段覆了你,才逐句逐句對答下去,這叫社交禮儀。

Iris: Hello並非常用開場白

Arke:情侶間很少講 hello,尤其在 WhatsApp只寫 hello而未見下文的,往往暗示着一方有嚴肅話題想打斷對方,要對方凝神期待,如非必要,會顯得小題大做。

Iris: Have a nice day並非常用語

Arke:承上規條, have a nice day是寒暄後的結束語──難道閣下想他/她今天不再找你?

Iris:別吝嗇表情符號

Arke:你並非文學大師,單靠文字未必反映得晒情緒,明明善意可能被睇成在講反話,這時(舉例),一個滴汗笑容有助化解誤會。

Iris:在 office hours慎用錄音功能

Arke:我知閣下有時想以聲代字,而佢在開會時睇睇手機尚算方便,但拿起來細聽甚至一不小心將私事廣播了出來,就老尷啦。

Iris:半夜失眠時別玩

Arke:深宵談心雖然浪漫,但你唔知道佢幾時先睇到,到佢覆你時你可能已經睡着,又盞搞。

Iris:別轉貼

Arke:你把他/她當群組嗎?

Iris:照片是即時拍的好

Arke:承上規條,情侶最怕被視為路人甲,你拿圖片庫的舊相來分享,倒不如即時實拍,讓他/她感覺和你一同呼吸。

Iris:別清除對話記錄

Arke:有些人出於手痕或節省儲存空間,會看完隨手 delete,這是危險的──假設對方臨睡前傳來一張照片,第二天清早簡單追問你一句「點睇」,你可能完全答不出,連說忘記了也不能,因為本應只要一看 WhatsApp的上文即可,死未!承認自己 delete咗?咁點解要 delete?是有小三怕被查閱手機嗎?抑或不重視我?水洗唔清呀!

Iris:男人即使幾嬲都不要使用封鎖功能

Arke:會封鎖女朋友的根本不算男人。

撰文: Iris& Arke

插圖:詹震寰

nextplus.nextmedia.com

鍾意就快D Share啦!
Related Posts Plugin for WordPress, Blogger...