掃呢頁CODE去手機

2015年10月22日 星期四

現任供水唔斷得 拜金楊秀惠騎埋楊受成細仔 [壹週刊 - 1337]楊秀惠,楊受成,M1,



探熱針

現任供水唔斷得 拜金楊秀惠騎埋楊受成細仔

出名拜金的楊秀惠,男友名單冇窮人。本身有個住半山的男友葉樹培,三十有一的她未甘心,繼續騎牛搵馬。數月前,終於如願成功搞掂楊受成細仔,英皇集團未來揸 fit人 28歲楊政龍!

把握現在,投資將來,楊秀惠騎住千萬身家的現任水泡,同時又拑埋老豆大把的新歡楊政龍,起雙飛。

現任打本做生意

目標清晰的楊秀惠,搵對象門檻千萬身家起跳。由有米金融才俊 Ray,到前年與家住四千萬梅道豪宅的葉姓富家子拍拖,身家冇七個零頭,都埋唔到佢身。

人望高處,縱然手上已經有個富貴男友,但金龜路豈能在千萬止步!立志向億元進發的她,據悉三個月前跟楊受成二十八歲幼子楊政龍撻着。不過又怕姊弟戀唔長久,楊秀惠未有即時跟葉姓富家子斬纜,加上男友為人豪爽,她可以入住地利根德閣,亦是對方資助,就算想進階,亦不願冒險一刀切。

A餐葉姓男友

冧掂新歡楊政龍,但楊秀惠仍未甩同樣是富家子的葉姓正印。而正印出入都有司機接載。(《蘋果日報》圖片)

B餐楊政龍

當日楊秀惠做人肉速遞,專程從電視城揸車去淺水灣會合富二代男友楊政龍。

一見金龜,楊秀惠即蓮子蓉面口,男嘅當然好受落。

早前楊秀惠幫自己的美容產品做展覽,有指背後打本給她的是 A餐富家男友。

「其實 Vivian(楊秀惠)同男友舊年散過一排,但幾個月後又翻撻,再一齊之後佢冇再住男友屋企,自己搬咗去地利根德閣,間屋嘅租同開美容店嘅錢,全部都係現任男友俾。聽聞幾個月前男友同佢求過婚,但 Vivian識咗更筍嘅 Alex(楊政龍),所以冇承認,吊住先。」楊秀惠身邊人說。

唧時間見新歡的楊秀惠,短聚後又揸車返電視城開工,為 mark實金龜真頻撲。

之後二人各自駕車前後腳返淺水灣楊家大宅短聚兩粒鐘。

楊秀惠黃昏到達,等楊政龍等到天黑。

深得父親楊受成歡心的楊政龍,近年在英皇集團地產部打骰,更有指他是繼承父業的接班人,難怪楊秀惠拑到實。

百億集團接班人

新歡富二代楊政龍,是楊受成欽點的英皇集團接班人,不煙不酒不愛蒲,屬於實幹富青。雖然家族身家億億聲,但有指楊政龍為人節儉,講心唔講金,異性難在他身上爭取「福利」。

「 Alex做嘢好叻又勤力,完全唔似佢阿哥 Gilbert(楊其龍),所以老豆將英皇地產交咗俾佢打骰。 Alex亦唔似其他富二代咁揮霍,即使係集團未來揸 fit人,但佢冇老細款,同朋友飲飲食食,都係 AA制,同佢拍拖嘅女仔,唔好旨意會狂收名牌或者珠寶首飾。」知情者說。

屬城中超級筍盤的楊政龍,緋聞女友不少,苟芸慧及姜麗文都有份。

攝時間陪新歡

楊政龍知慳識儉,楊秀惠雖然難以在新歡身上「謀福利」,但嫁入豪門是一場耐力賽,睇準對方是未來集團主人,「錢景」比現任男友更可觀,楊秀惠一於放長線,攬住水泡(現任),同時拑實新歡,指望有朝成為百億集團夫人。

有劇在身的楊秀惠,為爭取同新歡相處機會,就算有通告,都唧出放飯時間,山長水遠由將軍澳電視城揸車撲入淺水灣。

到埗等咗一陣,在淺水灣新商場巡視業務的楊政龍終於出現;一見筍盤,楊秀惠立即心形眼笑晒,跟住同楊政龍一人一車,前後腳到男方淺水灣豪宅二人世界兩粒鐘,做完人肉外賣,楊秀惠再揸車返去電視城繼續開工。為了美好將來,拜金楊秀惠不惜一切!

楊受成的百億王國,主力交由第一任妻子的大女楊諾思及第二任妻子生的楊政龍主理。

當年楊秀惠甩金融男友 Ray後,男方便與沈卓盈撻着,但拍拖兩年,今年同樣俾女飛。

惹是非的楊秀惠,除被指跟節目《姊妹淘》的拍檔不和,早前她拍劇亦捲入陳瀅失手機事件。

大仔愛夜蒲 VS細仔承父業

楊受成育有兩子三女,前妻所生長子楊其龍係蒲精,楊受成多年來未有安排他到旗下的英皇集團幫手。至於孻仔楊政龍是第二任妻子陸小曼所生, 09年大學畢業後回港後,開始在老豆公司返工,現是集團地產部揸弗人,也是逾百億集團的接班人。

楊政龍

28歲的楊政龍身為百億王國接班人,但表現低調,少有出席公開活動,不過緋聞亦不遜同父異母的大哥,先後跟秦沛女姜麗文、華姐倪晨曦、苟芸慧以及韓星蔡恩真傳過緋聞,屬城中筍盤。

楊其龍

48歲的楊其龍因為鍾意蒲,先後投資 Dragon-i及爐端燒等餐廳食肆,搞夜場搞得有聲有色,緋聞亦一樣精彩,跟何超瓊拍拖,又同名模 Maggie Q、 Rosemary及周嘉玲等一齊過。今年四月,先做老豆,九月做埋新郎,跟捷克籍索模 Maryina Sivkova結婚。

冇窮人

選過華姐的楊秀惠,是 Monash大學生物科技學系學生,家人在馬來西亞經營天花工程生意,屬小康之家。來港發展後,男友身家,個個非富則貴。

有米孫耀威

07年,楊秀惠幫孫耀威新歌拍 MV撻着。父母做生意本身家境好的孫耀威,早年在台灣走紅,亦好早開始北上發展,當年跟楊秀惠拍拖時已經搵落唔少。拍拖年多,兩人不歡而散。

金融才俊 麥偉汶

甩孫耀威後,楊秀惠釣到任職金融的 Ray Mak。男方父親是本地著名測量師麥鏡開,單是手持的禮頓山四千呎高層相連單位,市值已過億。同 Ray拍拖兩年,楊秀惠主動嗌分手。

富貴現任

13年,致力釣金龜的楊秀惠又冧掂家住半山梅道嘉富麗苑的葉姓富家子。對方不時出動司機寶馬,接載楊秀惠出入。有指楊秀惠今年開鋪頭賣美容產品,也是男友打本。(《蘋果日報》圖片)

撰文、攝影、攝錄:娛樂組

鍾意就快D Share啦!