去到街市，無人認得盧巧音，相反就有人認出佢老公並要求合照。
娛樂偵訊
盧巧音復出靠邊站
銷聲匿跡多年的盧巧音， 13年低調嫁 Kolor主音 Sammy（蘇浩才）後，主力幫老公樂隊巡唱做幕後；就算下月復出參與《我的女神演唱會》，主辦亦只力 sell非唱家班的徐子珊和宣萱，盧巧音只能靠邊站。
爆粗鬧家強
兩年前與細自己四年的 Kolor樂隊主音 Sammy結婚，盧巧音酒都冇擺，一一年開始全職退居幕後的她，做咗人老婆，更加全副精神放在老公音樂事業上。
「 Candy同 Sammy兩個都係好性格嗰種人，所以結婚都只係簽字註冊，之後同屋企人食飯就有叫埋 Kolor班兄弟一齊。結婚之後， Candy將工作重心放晒喺老公身上， Kolor開騷佢做導演，拍 MV又做埋監製。」盧巧音身邊人說。
有指由黃家強帶入行的 Kolor，五年前雙方解約收場，是因為盧巧音所致。
「簽咗 Kolor之後，家強成日帶佢哋出嚟，又俾錢幫佢哋出碟，不過有次家強同 Sammy傾緊製作嘅嘢，家強表現得有啲躁，同 Sammy係咁拗，點知 Candy失驚無神衝埋去爆粗鬧家強，仲拖埋 Sammy即刻走！自此之後，兩個就反咗面，最後仲解埋約！」知情者說。
全力做老公背後女人，直至去年，盧巧音在朋友推波助瀾下，恢復幕前演出，今年初聯同 Kolor到中山舉行演唱會，下月亦會參與《我的女神演唱會》演出。
妥協幫老公
「 Candy雖然出返嚟唱，但匿埋咁耐，人氣真係差晒，你睇《我的女神演唱會》啲宣傳就知，重心喺晒徐子珊身上，宣萱、余安安見報率都高過佢。其實佢首《好心分手》到而家仲係卡拉 OK點唱率最高其中一首歌，佢肯做機會一定有，不過佢好揀擇，唔係乜場都願去唱，但為咗幫 Kolor打入內地市場， Candy已經冇以前企得咁硬。」知情者說。
週日（十月十八日），盧巧音與老公孖住到大埔街市買餸，在菜檔買了個生菜，再去燒味檔買燒肉，之後買多一梳蕉就走！二人世界，烚菜斬料求其又一餐。
紅歌唔紅人
現年 41歲的盧巧音（ Candy）， 98年入行，初出道是地下樂隊 Black& Blue的主音，其後獨立發展，簽約 Sony Music，憑住歌曲《垃圾》、《三角誌》及《好心分手》等代表作一炮而紅，成為 K歌經典， 04年開始，紅歌唔紅人的盧巧音不再活躍樂壇，到 11年，更在廣州個人演唱會上宣布退出，自此退居幕後。 13年，與 Kolor主音蘇浩才秘密拉埋天窗，婚後全力助老公發展，直至去年，她突然宣布復出，又聯同 Kolor返內地和去澳門開騷，拍住搵錢。
撰文、攝影、攝錄：娛樂組
|
鍾意就快D Share啦！
|
|
|
