探熱針
做救兵 唐文龍廖啟智回巢補漏
無綫小生花旦逃亡潮持續，林峯、胡杏兒、徐子珊、陳茵媺、陳國邦先後同大台分手；演員荒，無綫更慌！只好扮矮仔，向離巢已久的藝人求救，其中唐文龍、廖啟智及苑瓊丹，已答應回巢拍劇，幫手補漏救亡。
六叔愛將親自搵
無綫自作孽，令一手帶大的小生花旦再無留戀，陸續離開，投奔自由。陣中無大將，谷新人要花時間煲，惟有向一些舊人埋手，包括離開大台十年的唐文龍。
「其實 TVB兩年前已經開始搵我，之前鄭嘉穎套《天眼》，我本來應承接，但後來個劇延期開，就唔到期都有啲可惜。半年前，佢哋再搵我拍《殭》，但因為只係其中一個單元，所以推咗。早個月返去電視城探洪天明班，撞到陳輝光先生（六叔前愛將，去年回巢任職無綫集團總經理助理），佢問我攞咗電話，之後就打俾我問我有冇興趣返去幫吓手。我同嘉穎、阿廉（曹永廉）、天明係兄弟，大家已經傾過，諗住度個古仔俾公司，可以一齊拍一齊玩。」唐文龍說。
想拍香港製作
據了解，下個月唐文龍要返內地拍陳嘉上執導的新片《戚繼光》，回巢做救兵最快也要明年初。○五年約滿無綫後北上發展的他，大部分時間留守內地拍劇，直到今年才回流香港接拍電影《十月初五的月光》。「錢當然要搵，但作為香港演員，總係會想返嚟拍吓啲本土製作，雖然《戚繼光》係內地電影，但陳嘉上係香港導演，所以我當係香港製作。」唐文龍說。
讚佘詩曼好正
劇集《十月初五的月光》除了紅了初哥哥張智霖，唐文龍金勝一角亦十分搶鏡，經典劇重現大銀幕，唐文龍特別有感覺。
「因為呢部劇觀眾知我叫金勝，未必知我叫唐文龍，所以今次拍呢套戲，對我好重要。」
有傳當年唐文龍追過佘詩曼，如今再合作，大家又是單身，大好良機！
「首先，佘詩曼好正！但當時我本身有個圈外女友，就算要追都冇追到。阿佘而家仲係好正，咁多年朋友，太熟喇！之前係家燕姐搞嘢，話我對佢（阿佘）有眼神，個個對住佢都有眼神」
回巢變男一
七九年第八屆藝員訓練班出身的廖啟智，在無綫多年來拍超過六十部劇，被公認好戲。○四年滿約離巢，一二年投身港視以男一身份拍《選戰》，今年十二月，廖啟智將會重返無綫，拍攝新劇《律政強人》。
回巢無綫，廖啟智擔正做男主角，「我諗戲份多啲咁啫，同方中信一齊拍，戲裡面好多同佢之間嘅競爭。」智叔謙虛回應。
事實上，離開無綫後，大台曾多次邀請廖啟智返娘家拍劇，「有啲嘢係 timing或者緣分，今次我係抱住個再培訓嘅心態，雖然我經歷過出面空間浮沉，但覺得自己或者需要少少時間適應，特別係心態上，需要 refresh，新嘅刺激。」
廖啟智說，當年離開無綫，與公司重用與否無關。
「我走嘅時候，係因為個仔離開咗，發覺人生原來好多嘢唔係你去控制同掌握，與其係咁，不如放手啦。」
撰文、攝影、攝錄：娛樂組
|
鍾意就快D Share啦！
|
|
|
