探熱針
摸完再搣 張慧儀春樣箍富商男友
下個月四號生日滿 42歲的性感女神張慧儀， 03年經歷被未婚夫霍紹裘當沙包虐打留下陰影，自此對飛來蜢落閘放狗，將全副精神照顧養子 Hanson。直至年前成為四張大軍，搵碼頭埋岸的她與做飲食生意的羅定民嘗試發展，可惜男方過唔到養子一關，張慧儀於是立即換人，同做物流的富商陳偉軍神速撻着；男友更獲 Hanson開綠燈，入屋過夜。日前，二人拍拖到圓方開餐，其間摸面互餵，張慧儀一副春樣，有運行！
女神大無畏
○六年，張慧儀在北京平安之家做義工，遇上有先天性心臟病的 Hanson，「兩母子」從此結緣。性感女神大無畏，做單親媽兼要為養子張羅醫藥費，熬盡積蓄在內地搞生意，北京賣果醬、廣西開參茸店，可惜敵不過內地政策，要損手收場。
去年答應曾志偉拍無綫劇《女人俱樂部》，張慧儀決定放手一試，帶埋 Hanson回流返香港，在深水埗開平價雜貨店「激安之殿堂」，街坊生意，食品日用品家電樣樣有，開業一年，因同類對手太多，競爭劇烈，生意愈做愈差；直至同做物流的富商陳偉軍拍拖，得男友開水喉射住，又「碌晒卡」幫手搭路打入內地市場，起死回生。
飛杜拜考察
「 Angie（張慧儀）間鋪開頭都賺到錢，但同區同類鋪頭愈開愈多，多咗人爭食，自然賺少咗。後來陳偉軍嗌佢試吓諗返大陸，佢男友做物流，喺大陸有好多生意拍檔，仲親自出面，幫手搭路同內地啲上市公司傾合作，睇吓有冇機會大搞。」張慧儀身邊人說。
除了計劃攻內地，早前張慧儀更孖住男友飛到杜拜考察，更以股東身份參與「香港明星食品綜合貿易有限公司」的簽約儀式，在當地搞食品生意，大展拳腳。
放下心頭大石
成功𢱑到水泡泊岸，加上養子 Hanson又 like這個候選「準老豆」，張慧儀終於放下心頭大石，甚至暫時撇低 Hanson，同男友二人世界。
日前，二人拍拖到圓方食晏，男友餵食送到埋嘴，張慧儀深情對望一輪後，伸手摸住男友塊面，跟住又肉緊搣吓！
之後轉去露天餐廳邊食飯後煙邊歎咖啡，張慧儀繼續出招，舉起電話同男友頭貼頭自拍，性感女神趕尾班車，當然要露番兩道散手！
苦盡甘來
凡事雙向，娛圈女星多人吼，但想嫁得好，某程度比尋常女子難，身經百戰上山下海冇所謂，最緊要係咪可以苦盡甘來，搵到個好碼頭。
楊思琦
同奀星李泳豪拍拖九年，一直想騎牛搵馬的楊思琦最終上錯賊船，暗撻空心吳帥，搞到未婚產女，經手人仲要鬆咗人！獨力養女擔家，單親媽大小通吃，連大陸夜場都殺。直至年前搭上富商高健行，楊思琦有水喉射住，換車買樓兼揀 job，唔同晒！
陳伶俐
21歲奉子成婚嫁林敏驄，並為對方誕下兩子，其後陳伶俐被爆連勾兩男，與情夫 Peter的偷情對話流出，離婚收場。 12年，陳伶俐帶兩子改嫁新加坡隱形富豪劉頌銘，同年卻傳出男方出外偷食，為保住長期飯票，今年 7月，陳伶俐為劉家誕下慈姑椗，母憑子貴，最近更得老公支持，斥資千萬開畫廊。
撰文、攝影、攝錄：娛樂組
|
鍾意就快D Share啦！
|
|
|
