日本動畫公司來港搞 40周年紀念活動， Ashley能被睇中與唐韋琪翻唱經典卡通《長腿叔叔》嘅兒歌《夢中天使》，機會難得。活動將於 11月會於荃灣愉景新城舉行，屆時更會開金口現場演出。
娛樂偵訊
龔慈恩 15歲女 翻唱《長腿叔叔》
「長腿叔叔你好嗎，交出溫馨的心是你嗎？」兒歌《夢中天使》是不少人經典回憶，甚至帶挈原唱的唐韋琪，可以食老本開個唱。事隔二十三年，這首經典兒歌獲日本動畫公司重推，由唐韋琪夥拍龔慈恩大女林愷鈴（ Ashley）互 jam。在前輩面前，十五歲的 Ashley，大玩「 acappella」（無伴奏純人聲），表現八級音樂底子的功力。
無伴奏口技
只有十五歲，生得高的龔慈恩囡囡除了被稱「翻版吳佩慈」外，考獲八級聲樂資格的她，仲有把靚聲，因而被日本動畫公司睇中，為公司四十周年紀念慶祝活動，重推經典卡通《長腿叔叔》主題曲《夢中天使》，與原唱唐韋琪合作較技。為求突破，食腦的 Ashley拉埋六位志同道合的同學，以在外國極流行的「 acappella」（即在沒有樂器，純人聲伴奏），重編歌曲。
電話自拍 MV
日前， Ashley在媽咪龔慈恩陪同下，與唐韋琪同到位於觀塘的 studio錄歌。
未開始錄音，龔慈恩先向工作人員了解程序，又提住囡囡：「唔好寒背呀！」並郁手替她整理衣服，緊張程度，更勝 Ashley。
初試啼聲，十五歲的 Ashley全無怯場。
「第一次入錄音室好新鮮，吸收咗唔少嘢，監製教咗我好多。平時我哋玩音樂係去佢屋企（指着身旁女同學） jam嘅，嘈到呢，哈哈……佢屋企乜都有，鋼琴、結他、大小提琴都有齊，佢仲係我結他老師，好勁。上次仲彈爛咗佢個鋼琴，哈……」
對音樂百分百投入的 Ashley，早前與幾個同學創作了一首新歌《 Sometimes In The Night》，仲拍埋 MV。
「冇資源㗎！就咁喺屋企樓下公園，用手機拍嘅！」 Ashley說。
不急於做歌手
正式錄音時，前輩唐韋琪不時提點有關高低音問題，對於 Ashley的表現，她有讚冇彈。
「之前 Ashley同啲
同學錄咗個 demo俾我，冇音樂嘅！好新鮮，佢哋好有朝氣，我相信如果做 live一定更可觀。講真，要改編一首咁多人識嘅歌，突破要好大，我覺得新一代會接受嘅！」唐韋琪說。
音樂底厚，外形亦容易讓人接受，但 Ashley並不急於出唱片做歌星。
「將來嘅嘢真係未諗，依家嘅心態係有得玩就玩盡先，喺呢段冇乜憂慮嘅日子繼續開心。今次搵埋啲同學一齊做呢個 project，就係想留個 memory俾大家，始終我哋夾咗好多年，唔想好似浪費時間咁，好驚大個咗冇呢啲時間去做呢啲嘢。」
朗誦音樂周身刀
在龔慈恩悉心栽培下， Ashley由幼稚園開始練朗誦，小五就讀聖保羅男女時，已為學校贏得第六十二屆香港學校朗誦節粵語詩詞獨誦優異獎；音樂方面更加厲害，未夠三歲已加入香港兒童合唱團，鋼琴、中小提琴、長笛周身刀，仲要瓣瓣精。
Ashley說：「其實我對 design、寫歌作曲都好有興趣。」在旁的龔慈恩搭嘴：「做媽咪梗想仔女開心，佢依家仲細，完成大學先，將來做咩將來至算，比如話佢做音樂老師，我一樣會開心。」
離開溫室
一籮星二代，如果單靠外形和父母光芒食胡，始終會為人詬病，要在娛圈放閃，有才華仲要比一般人下多兩成力，離開溫室，隨時撞到焦頭爛額。
撰文、攝影、攝錄：娛樂組
|
鍾意就快D Share啦！
|
|
|
