2016年3月31日 星期四

李嘉欣公園搵仔 [壹週刊 - 1360] __,嘉欣,李嘉欣,鍾嘉欣,M1,

唔想囝囝太離地,李嘉欣同許晉亨帶埋Jayden去數碼港大草地玩。探熱針李嘉欣公園搵仔即將踏入46歲的李嘉欣,傳出再度造人成功後,穿上露背連身長傘裙踩高跟鞋,以行動力證並冇懷孕!一直想追個女的嘉欣突然放慢手腳,全因寶貝仔許建彤(Jayden)擔心有人分薄媽咪反對,有仔萬事足,嘉欣即時打消追B念頭。本月中(19/3),李嘉欣同老公許晉亨帶住囝囝,現身數碼港公園,一家三口你追我逐,共聚天倫樂!追到老豆索 ...


唔想囝囝太離地,李嘉欣同許晉亨帶埋 Jayden去數碼港大草地玩。

探熱針

李嘉欣公園搵仔

即將踏入 46歲的李嘉欣,傳出再度造人成功後,穿上露背連身長傘裙踩高跟鞋,以行動力證並冇懷孕!

一直想追個女的嘉欣突然放慢手腳,全因寶貝仔許建彤( Jayden)擔心有人分薄媽咪反對,有仔萬事足,嘉欣即時打消追 B念頭。本月中( 19/3),李嘉欣同老公許晉亨帶住囝囝,現身數碼港公園,一家三口你追我逐,共聚天倫樂!

追到老豆索晒氣

李嘉欣和許晉亨的寶貝仔許建彤( Jayden Max),轉眼間已五歲大,為人母後,嘉欣萬事以湊仔行先,大量減少接 job出席公開活動,專注湊仔!

曾經講過要一齊分享兒子成長過程的李嘉欣,早個禮拜(十九日)和老公湊住 Jayden到數碼港大草地玩,一家三口你追我逐捉迷藏, Jayden先同媽咪拍檔,搜尋預先匿埋的許晉亨,唔使五分鐘, Jayden已經發現爹哋蹤影,立即放笑狂追,搞到許晉亨俾個仔追到索晒氣!之後再換成 Jayden同爹哋一組匿埋,精靈 Jayden拉住許晉亨跑到老遠,李嘉欣跑咗一圈都毫無頭緒,最後要打電話求救,好搞笑。

兩母子玩捉迷藏,踎低匿埋,超投入。

玩到攰,嘉欣即時遞上水俾囝囝解渴。

抹汗餵水做阿四

親子日,外傭姐姐沒有同行,大美人親力親為,做「阿四」服侍寶貝仔,樂在其中的嘉欣見 Jayden玩到大汗疊細汗,即時體貼抹汗,免得「攝」親!之後又拎出水壺餵水,玩了一個下午,兩公婆才一齊拖着小 JM上七人車離開。

「 Jayden好黐媽咪,不過亦好鍾意整蠱媽咪,姐姐(外傭)唔喺身邊, Jayden就成日詐媽咪嬌,雖然嘉欣多數就範,但佢唔想個仔太倚賴會變成少爺仔,所以都成日嘗試要 Jayden學獨立,有啲嘢試吓自己做。」知情人士透露。

54歲的許晉亨同囝囝追逐一輪後,即時索晒氣。

有爹哋媽咪陪玩捉迷藏的 Jayden, high爆。

順其自然唔強求

始終李嘉欣一直恨女恨到出口,最近就有傳她因為養胎,頻頻缺席家庭活動,講到似層層,不過月中出席品牌活動時,以露背連身長傘裙襯以高跟鞋現身的嘉欣,力證自己冇餡,更大爆囝囝 Jayden呷醋,講明不想有弟妹,怕媽咪被分薄。

「嘉欣係有諗過追多個女, Julian(許晉亨)就冇乜所謂,不過嘉欣見個仔講明唔想要細佬妹,所以都冇咁積極,總之順其自然,有就有,冇就算!」知情人士透露。

嘉欣跑到身水身汗都未搵到個仔同老公匿响邊,最後要打電話求救。

五歲的 Jayden好黐媽咪,上車都要坐喺大髀。

誕下 Jayden後,李嘉欣事事以湊仔行先,又大量減少出席活動,有錢都唔賺!

同許晉亨結婚七年,依舊恩愛。

嘉欣喜歡做運動,亦 keep住這個好習慣超過十年。

到馬房拍宣傳照,嘉欣帶埋 Jayden去開工,囝囝更化身攝影師,捕捉媽咪一舉一動。

有子萬事足

星級爸媽,無論生男定生女,因為工作關係,親子時間有限,容易變成過分溺愛,適得其反。

楊千嬅

兒子 Torres出世後,千嬅向公司表明大時大節唔接 job,即使病,每日都堅持七點起身陪仔食早餐送返學;試過被影到一家三口去 shopping,距離上車只得半條街,千嬅都自己抱唔俾個仔自己行,錫到燶。

諸葛紫岐

13年為夫家誕下金笸籮薛華韜,去年兒子兩歲生日,兩公婆在北京為兩歲人仔打造百萬皇族生日會,請來數十「宮女」、「太監」服侍,被網民揶揄浮誇土豪。

陳慧琳

自誕下一對寶貝仔後, Kelly一切以湊仔優先,每日走兩場,親自接送返學放學,盡量不假手於人,又經常出席學校的親子活動,甚至陪囝囝到公共圖書館,天后身段,完全放下。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...