佗 B超過四個月，朱麗倩就算著鬆身大肚裙，側面睇一樣呃唔到人。
娛頭
人工受孕 試足兩年 劉華追仔 50歲朱麗倩佗 B4個月
12年 5月 9日，寶貝女劉向蕙（ Hanna）出世後，劉華並未滿足，得一想二的他開晒口要追個仔。華嫂朱麗倩 50歲（ 6/4）將至，急不容緩的劉華夫婦經御用婦產科醫生蘇偉基，安排定期接受人工受孕。皇天不負有心人，朱麗倩去年尾成功再度有喜！
上週二（ 22/3），朱麗倩由助手、保鏢護駕，現身九龍城買海味。著住白色鬆身裙，仍遮不住隆起的大肚。
撰文、攝影、攝錄：娛樂組 設計：何嘉慧
全家人食齋
恨生仔恨到出晒聲！去年劉華同歌迷慶生，毫不掩飾地對住過千「家人」自認想生多個仔。
當日是內地「金雞獎」舉行頒獎禮的日子，劉華在台上說：「原本今日要去『金雞獎』，但要嚟呢個活動，所以冇去到。」主持陳芷菁接口說：「你已經係我哋心目中嘅影帝。」點知劉華直情流露爆出一句：「心目中有鬼用咩？我夠心目中有個仔」
超齡趕尾班車，劉華夫婦千方百計求子，除了誠心拜佛，全家人食齋戒肉。
據知，自從女兒滿一歲後，朱麗倩便開始定時定候由生殖科專家蘇偉基，安排進行人工受孕，屢敗屢試！努力至去年十二月，終於收到喜訊。
「 Hanna出世之後，朱麗倩定咗一年，因為要湊 BB同要俾身體恢復；佢唔後生，就算之後再開始接受人工受孕，都失敗咗好多次；每次失敗，等半個月又試過。華仔都唔想老婆太辛苦，講明努力多兩年，試到五十歲唔成功就算，點知臨尾得咗！」知情者透露。
安排親信傍實
上週二（三月二十二日），懷孕已到四個月穩定期的朱麗倩，著住白色鬆身大肚裙遮肚，由於是流感高峰期，口罩更加不離口，在助手同保鏢陪同下，快閃九龍城。
當日落住毛毛雨，朱麗倩在海味鋪入貨，當她拎銀包準備俾錢時，白色裙被風吹起，四個月肚馬上現形，冇得呃人。
之後一行人再去附近的台灣食品店快買十分鐘，雖然保母車泊正鋪頭門口，但慎防大肚婆俾雨淋濕身冷親，保鏢開定遮護送上車。
據了解，劉華得知自己將再做老豆，立即大為緊張。其時他正忙住宣傳賀歲片《賭城 3》，同一時間又要飛去北京開拍新戲《王牌對王牌》，劉華於是急召身在馬來西亞的姨仔返港，幫手照顧老婆。
「十二月頭知道有咗，嗰陣華仔啲期排到好密，又要做《賭 3》宣傳，又要飛去北京開戲，惟有拜託朱麗倩家姐同細妺，喺大馬飛過嚟幫手，另外仲調咗公司一個平時貼身照顧華仔嘅同事，去傍住老婆出出入入。」
上個月，朱麗倩帶住 Hanna飛返大馬拜祭外公外婆，當時佗 B三個月，已經稍為發福兼肚凸凸。戴住口罩的她一路尾隨大隊慢行，就算發現記者，都繼續保持淡定，未有摩打腳，當日她全程未有抱女，非常小心。
「嗰次啱啱夠三個月，醫生 check過佗得穩，華仔先放心俾佢搭飛機，返外家除咗拜山，最主要係還神。佢哋仲喺當地請埋法師，成家人一齊誦經為 BB祈福。」知情者說。
破例湊女返學
年屆五十歲高齡佗 B，兩公婆為確保冇閃失，行事非常小心。以往湊女親力親為的朱麗倩，自從有了第二胎後，便將大部分責任交俾劉華代勞。早前，劉華在網誌透露：「早上到港，迫不及侍洗澡，帶小孩上學，然後陪家人早飯，重點是可以閒話家常，接着接小孩下課，哄小孩午睡，我也睡了。」
曾經講過怕惹混亂，所以從來不敢湊 Hanna返學的劉華，為讓老婆可以專心安胎，亦破例出動，帶個女返學。
「啱啱知有咗嗰段時間，朱麗倩唔可以抱 Hanna，加上華仔唔想佢撲來撲去，唔俾佢湊個女返學，搞到 Hanna好唔慣成日扭計，所以如果華仔喺香港，佢就親自湊返學氹番個女。」
個唱延期
要全心全意陪老婆安胎待產，劉華再一次開「空頭支票」，將紅館個唱無限期押後。
下月劉華即將開拍投資的新戲《拆彈專家》，之後便會停工，全天候做「住家男」，湊女陪老婆。
「 Hanna出世嗰陣，華仔都停咗兩個月冇做任何嘢，今次都一樣，做埋手頭上非做不可嘅嘢就乜都唔接。佢之前仲應承咗出年開演唱會，睇怕一定要押後。」知情者說。
冇有怕
年齡愈大，生 B風險愈高，但為了繼後香燈，唔少女星年過 40，都一樣照生。
黃金期一去不回
娛圈女星事業行先，到想生兒育女，才發現身體狀態不再為時已晚。錯過黃金生 B期，就算用盡方法，亦未必人人有所出。
撰文、攝影、攝錄：娛樂組
|
鍾意就快D Share啦！
|
|
|
