身兼個唱監製同投資者的林憶蓮，揼本搞燈效影像， opening企定定齋唱都不覺悶。
娛樂偵訊
喜兒美國有人照 林憶蓮安樂唱
上週五（ 25/3），林憶蓮相隔四年再踏紅館，舉行一連四場「 PRANAVA/造樂者世界巡迴演唱會」。同恭碩良拍拖接近五年，已是公認的另一半，今次開騷冇同男友合唱，只安排他做背後的男人，做鼓手。
至於向來唔願見報的囡囡李喜兒，留守美國黐實讀國際學校時已拍拖的泰英法混血男友 Joepreeda。對方一早見過家長，林憶蓮絕對放心。
作出讓步
緊貼宿敵陳慧嫻在三月開騷的林憶蓮，刻意同對方唱反調，除了個唱記者會，開騷前只接受了一本月刊訪問；慧嫻開騷場場有嘉賓，日日不同，憶蓮靠自己，企硬做獨腳戲，連一二年曾在「林憶蓮演唱會 Part II」 jam歌伴唱的男友恭碩良，今次只是在樂手席上，專心做鼓手。
喜歡比人走得更前的憶蓮，今次開騷揼本大搞視效，即使用《蓋亞》及《無言歌》兩首較冷門的歌打頭陣，一樣令觀眾睇到嘩嘩聲，反應理想。
經歷過一二年 part 2演唱會以《蓋亞》大碟的歌做主打，令歌迷怨聲四起；今次憶蓮稍作讓步，冷、熱、次熱作品，樣樣執啲。
演唱會第一節，唱到《為你我受冷風吹》中段，憶蓮開始失控爆喊，唱完成首歌都未能平復，要背住觀眾抹眼淚，搞到個妝花晒變熊貓，要化妝師衝上台搶救。事後她笑笑口說：「無諗過咁早就喊，突然間感情一湧……」
有勁歌冇熱舞
演唱會有兩部分快歌環節，講得出的首本名曲如《灰色》、《瘋了》、《傾斜》都榜上有名，由於跳舞重任全交由 dancers負責，憶蓮唔跳，差咁截！但有殺食舊歌補番數，連八十年代的《愛情 I Don't Know》、《 How Long Will I Love You》同《搖擺口紅》都唱，仲要搬番當年的唱法，歌迷激讚：「好似返咗去以前聽錄音帶年代。」
四年冇開騷，林粉反應熱烈，即使講明《至少還有你》是最後一首歌，唱完全場開晒燈，大家仲嗌 encore，唔捨得走。
喜兒接受阿恭
林憶蓮囡囡李喜兒例唔見人！下個月滿十八歲的喜兒，一度因為媽咪同陳玉蓮前密友 Maisy（廣告界導演蔡美詩）玩埋而不滿，直至憶蓮同恭碩良姊弟戀，喜兒反而接受，同媽咪男友仔好 friend。
母女關係大為改善，但今次開騷，李喜兒繼續冇影。
「 Renee（李喜兒）細細個已經唔鍾意俾鏡頭隊住， Sandy就更加介意傳媒搞到佢個女，加上佢喺美國讀緊書，冇必要專登飛返嚟！」知情人說。
跟埋去美國
林憶蓮同恭碩良五年情打風都打唔甩，喜兒都一樣！同 Joepreeda的 puppy love一直未斷過。
在香港讀中學已開始拍拖，憶蓮為了解囡囡的男友，不時邀請對方一齊飯局，喜兒離港到美國讀書的餞行飯， Joepreeda都是座上客。未幾 Joepreeda亦去埋紐約升學，唔使分隔兩地。
不時同男友行孖咇的喜兒，亦愛在網上上載恩愛照，其中有張兩人攬到實的相，更得到林憶蓮俾 like讚好。
難得寶貝女有人幫眼睇實，林憶蓮安樂晒！
網上洩密照
星二代得父母基因，好多都愈大愈省鏡，就算唔會跟星爸星媽出活動，亦愛在網上洩密照，讓外界跟進到成長過程。
Nikkie（梁家輝大女）
自小在國際學校讀書的 Nikkie，有樣有身材，不時在 Instagram分享攬仔照及泳衣相的她，露半球、浴缸吸煙等乜都放，其中「胸壓」外籍男友人的自拍性感照，更成為網民熱話。
撰文、攝影、攝錄：娛樂組
|
鍾意就快D Share啦！
|
|
|
