探熱針
外母要買樓 羅仲謙吼 600萬康城
36歲楊怡與 31歲羅仲謙拍拖 4年，二人於 22/3在英國肯特郡利茲普城堡註冊結婚，姊弟戀修成正果。據知，一對新人於婚前已四處睇樓，今年 2月，有人目睹二人由地產經紀帶住睇將軍澳日出康城的首都大單位，因為要與外母同住三人世界，心水選是 600萬的千呎單位。
接受三人世界
楊怡不好炒股，多年來賺到錢只會買磚頭，至今手上擁有三個市值共逾二千萬物業，包括將軍澳中心、日出康城領峯及紅磡城中匯，至於老公羅仲謙，一嚿磚頭都冇。
「謙仔冇楊怡搵咁多，只係近兩年開始賺錢，其實佢一直都冇諗買樓，只係聽楊怡講得多，又要氹外母；舊年四月開始，謙仔會四圍去睇吓樓，今年二月，就有人見到佢哋戴晒口罩，同經紀去睇日出康城首都。楊怡同屋企人住慣將軍澳，首都又唔係好貴，嗰日佢哋都係集中睇啲六百萬左右嘅單位。」知情者說。
為咗老婆開心，羅仲謙放棄二人世界。
「謙仔拍拖慣性會搬去女友屋企住，同楊怡一齊冇耐就同居，一齊住咗咁耐，乜都慣。楊怡阿媽初初都唔係咁鍾意，不過見個女開心，所以先冇出聲；但同謙仔關係只係一般，唔多嘢講。咁老人家諗個女結婚女婿會買樓，好正常！謙仔亦好想快啲如外母所願，所以不停睇樓，想快啲搵到啱心水。」
卵子唔等得
繼賀歲電影《西遊記之孫悟空三打白骨精》後，羅仲謙未來會將事業重心轉到內地，希望靠新片《泡沫之夏》爆出；至於即將約滿的楊怡，與無綫洽談續約仍未達共識。
「無綫鬧花旦荒，但留人條件仲係唔吸引，錢唔算多，最弊係年期長，楊怡知公司根本唔會俾到佢想嘅條件，所以佢一心諗住跟謙仔返內地，搏吓有冇機會之外，又可以睇實個老公；但最主要原因係佢想快啲生 BB，謙仔之前都同身邊朋友講，自己冇想過咁快結婚，仲話：『我等到，佢啲卵子未必等到嘛，佢話要生！』」有知情者說。
ig只追蹤楊怡之謎
羅仲謙的 ig賬戶被發現只追蹤楊怡一個，被形容為「這就是浪漫」，並指他心中只有一個她，冧爆楊怡。有關此，據悉是個美麗的誤會。
「識謙仔嘅人都知佢唔玩 ig、微博，所有 update相同留言，都係佢助手『肥斯』幫佢搞，有時連喺微博同其他藝人講嘢都係。謙仔又唔識玩電腦，平時拎住部 iPad都係睇新聞睇吓其他嘢，用得最多係賽馬會嘅網上投注戶口，方便佢賭波。」知情者說。
講到底，最勁都係楊怡，明知「老公」從來唔玩 ig、微博，照樣以冧爆表情回應呢個「誤會」，視后果然唔係浪得虛名。
撰文、攝影、攝錄：娛樂組
|
鍾意就快D Share啦！
|
|
|
