壹科林
iPhone SE發布完即開賣 淨機定上台抵玩？
每次 Apple推出新 iPhone，都被人一窩蜂搶購，如果一般用家想買，除非等兩、三個月，炒家搶購完後，或者可以試吓搏買到。
但今時今日， iPhone已不再是炒家神話，就以今次最新開賣的 iPhone SE為例，極難可以炒得起之餘，貨量更加源源不絕。功能未必是買機誘因，網絡商都好「醒目」，差不多全部都推出預繳月費零機價，似乎上台出機吸引過齋買機。
$298月費 零機價
由於今次推出的 iPhone SE機價並不高，所以不少網絡商都採用上台零機價月費吸客，其中 csl.及數碼通除了最平月費計劃出 64GB版本，要分別付$290及$380機價之外，選用其他月費計劃，都可以零機價加預繳拎走部 iPhone SE。
不過， 3HK方面更加進取，除了推出全部月費零機價出機優惠，選用$498或以上月費更可免費送 Apple Watch SPORT。雖然最平月費出 64GB版本，預繳會多少少，但可以回贈返落月費，其實都有着數。加上如果帶號碼轉台，每月會再多 2GB數據用量，想出 64GB版本 iPhone SE又想平，就以 3HK最抵。
決心不買
網絡商出得「零機價」 plan，就睇得出新機有幾咁「唔吸引」，綜合果粉意見，有以下「心聲」：
1. 5s升級版？
今次 iPhone SE不採用數字命名，最大原因是它並非一部 iPhone 6s的後繼機，反而似由接近三年前推出的 iPhone 5s後繼機。由於「睇唔出係新機」， showoff價值等於零。至於處理器同 iPhone 6s同級，處理器比 iPhone 5s快兩倍，圖像處理快三倍等數值，全部都用舊機去比較，不少果粉聽到「無心機」。
2. 4K拍片又點？
iPhone SE另一賣點，除相機支援 1200萬像素外，亦設有 True Tone補光燈，可用屏幕作為補光。其實此功能已在 iPhone 6s上出現，無驚喜。而新機亦支援 4K拍片，但 iPhone SE只推出 16GB及 64GB版本，若以 16GB容量拍 4K好快無位，所以只得 64GB的用家，先可以「享用」此功能。
3.支援 Apple Pay
其實 iPhone SE好多功能都同 iPhone 6s大同小異，當中包括 Apple Pay，這個 Apple今年大力推行的手機付款平台，在多個國家包括美國、英國、加拿大、澳洲及中國都用到，不過香港暫時未支援，無法用得到。更重要是連 Apple Pay的 app都不會在 iPhone SE出現，所以就算 Apple在記者會重點力 sell，對於身處香港的用家，完全無吸引力。
同場加映：縮細版 iPad Pro現身
相對於 iPhone SE，新 iPad就較有誠意，由 12.9吋縮細至 9.7吋的 iPad Pro。雖然硬件同初代的一樣，採用 A9X處理器、四組喇叭輸出、支援 Apple Pencil等，但都有不少硬件升級，其中包括前、後相機都分別升級到 500萬像素及 1200萬像素，同時亦支援 4K拍片。
屏幕方面，縮細版解像度雖比初代略低，但仍有 2K（ 2048× 1536）解像度，至於之前 iPad Pro的防反光層，亦都保留，可減少 40%的反光問題。此外，亦新增 True Tone屏幕，可因應環境光度改變屏幕色溫，減少眼睛疲勞問題。以 32GB版賣$4,688而言，抵玩好多。
撰文：蘆甘
攝影：林志謙
|
鍾意就快D Share啦！
|
|
|
