揸住香港身份證，湯唯決定留港生 B。
娛樂偵訊
湯唯揸庄老公揸機 大住肚拍 MV
14年閃嫁韓籍導演金泰勇，講明婚後不設防的湯唯，上個月宣布造人成功。佗 B四個月的她，早前更秘密同老公來港拍 MV，著住超低胸長裙的準媽咪，發福不少。
08年透過「優才計劃」成為香港人的湯唯，計劃留在香港生 B，此程兩公婆順道搵定醫院，為 BB出世做好準備。
不容有失
由《黃金時代》到《命中注定》，湯唯孭正的電影，票房連遇滑鐵盧，要收復失地，食胡新戲《北京遇上西雅圖之不二情書》不容有失，大住肚都要做空中飛人，做完北京發布會，上週又孖住老公秘密來港拍 MV，老婆做女主角，金泰勇做導演，兩公婆拍住上。不過，此行最主要任務並不是拍 MV，而是物色心水醫院生 B。揸香港身份證的湯唯，計劃完成手頭上工作，便留在香港待產。
「今次嚟香港，湯唯去咗中環一個好出名嘅婦科醫生診所做產檢，又同老婆去過跑馬地一帶睇 apartment，等部戲嘅宣傳完晒，佢就留番喺香港等生。」知情者透露。
導演上身
拍 MV當日，拍攝隊中午在中環碼頭附近開工，出名飛機場的湯唯，著住超低胸長裙，中門大開。佗 B四個月，身形明顯圓潤了不少，但上圍維持原狀，未升 cup！
拍失戀歌 MV，劇情講俾仔飛的湯唯孤單行海邊，其間失控當街大叫，行行吓又除低髮夾、頸巾，最後連手袋都丟埋。
做戲難唔倒影后，但做歌手就要下苦功。未理位，湯唯一直口噏噏背歌詞，拍攝期間，湯唯更導演上身，多次主動嗌 cut，又經常指手畫腳俾意見，一個 shot拍足廿次，先肯收貨。老婆話事，金泰勇只是執行導演。
攬實取暖
由於落住微雨，近海邊又大風。一 cut機，六名工作人員一擁而上，服侍大肚婆，披上大褸遞熱飲，金泰勇更加攬實老婆取暖，兩公婆一齊睇 playback，有商有量。
拍完外景，大隊轉場去附近一間餐廳拍室內，湯唯要走出門口對住條街失控狂嗌。由朝早九點，直踩到傍晚七點，大肚婆攰到冇晒表情，拍完收工走先，金泰勇就跟大隊，留低執埋啲手尾。
撰文、攝影、攝錄：娛樂組
|
鍾意就快D Share啦！
|
|
|
