掃呢頁CODE去手機

2016年6月5日 星期日

超強自殺戲獲網民激讚:無綫靚綠葉! __,無綫,

佢叫趙樂賢!綠葉演員何其多,你又記得有幾多個?依家播緊嘅無綫劇《純熟意外》,其中一集入面,上演咗一場喺天橋上嘅自殺戲,即使呢一幕有主角吳啟華同蔡思貝嘅落力演出,不過都唔及該名演繹有幻聽、自殺傾向嘅綠葉演員搶鏡。唔少網民都大讚佢表情到位,將自殺嗰份惶恐、絕望、激動表現出嚟,超級好戲,仲紛紛問呢位咁好嘅演員叫咩名!無綫「御用警察」等《東網》話你知!佢叫趙樂賢,第19期藝員訓練班入行,今年36歲。有睇開 ...


佢叫 趙 樂 賢 !

綠葉演員何其多,你又記得有幾多個?

依家播緊嘅無綫劇《純熟意外》,其中一集入面,上演咗一場喺天橋上嘅自殺戲,即使呢一幕有主角吳啟華同蔡思貝嘅落力演出,不過都唔及該名演繹有幻聽、自殺傾向嘅綠葉演員搶鏡。唔少網民都大讚佢表情到位,將自殺嗰份惶恐、絕望、激動表現出嚟,超級好戲,仲紛紛問呢位咁好嘅演員叫咩名!

無綫「御用警察」

等《東網》話你知!佢叫趙樂賢,第19期藝員訓練班入行,今年36歲。有睇開無綫劇嘅朋友一定認得佢,曾拍過劇集《溏心風暴》、《愛.回家》、《寒山潛龍》等,多不勝數,更加係無綫嘅「御用警察」,重案組、交通警,甚至係古代嘅侍衛都做過!佢拍過咁多套劇,演技當然有番咁上下,有時只係爭一個好角色。無綫官方Facebook上載咗樂賢喺《純》劇拍自殺戲時嘅花絮,片中佢咬牙切齒咁講出一連串內心感受,之後就用力舉槍指住自己下巴,繼而開槍自殺,鮮血四濺,隨即由天橋跌落地面,連死嗰刻嘅眼神都依然猙獰同無助;睇就幾秒,但由天橋跌落地面一幕都已經要拍好多個take,要由工作人員猛力推佢落地下,又或者吊住威也跌落條橋,真係睇落都覺得牙煙同痛呀!

演技獲讚勁開心

《東網》亦即刻搵咗趙樂賢做咗個電話訪問,佢知道自己演技備受讚賞即表示驚喜,佢話:「其實都非常之驚喜,我唔識畀咩反應!(嗰場戲入面跌咗好多次?)其實都有好多次,因為要影唔同角度。由天橋上跌落嚟嗰幕就拍咗4至5次,至於片入面喺地下我畀人推嗰幕就拍咗2至3次,不過都有啲痛。其實之前未試過拍呢啲咁高跌落嚟,要吊威也嘅戲,2004年入行到依家都未試過。不過我嗰時都冇點驚嘅,因為當時太多人喺度喇!(今次有咁大回響,覺得點?)原來畀心機做好自己,係有人睇到嘅,好開心。」佢又講到自己好欣賞喺《愛.回家》中演K.C.嘅演員歐瑞偉,指對方拍劇一樣係咁搏命,有專業精神!

被誤認真警察

此外趙樂賢都直認自己有個「警察樣」:「我真係做過好多次警察,仲有次喺機舖有人以為我係警察𠻹,佢走過嚟搵我幫手咁喎,我個樣可能真係似警察。」而佢近年更開始「無間道」,笑指依家好似多咗做賊:「不過近呢幾年又唔知點解成日做賊,可能個人老咗啦。」

是日金句:「原來畀心機做好自己,係有人睇到嘅。」趙樂賢,加油!

網民有話兒:

Elxxxe Ma:那位演員真是做得很認真和投入

Texxxa Cheung:從來唔知佢個名。真係好演員。TVB有好多靚綠葉。好好珍惜。

Lee xxx:我也很想知這位演員的名字,很好戲的綠葉。

馮xx:自殺果(嗰)個好好戲 有冇人知叫咩名

Suk Hxxx Cheung:這場戲做得非常好,趙樂賢加油。


來源 source: http://hk.on.cc
鍾意就快D Share啦!