霆鋒剝衫捉魚Chok鬥鄭容和
【老詠誼澳門直擊】謝霆鋒與韓國型男鄭容和鬥戲鬥到入廚房，兩人昨日於記者會上演一幕「魚蟹宴」，Man爆徒手捉魚及蟹，引得全場尖叫！霆鋒自爆在戲中自毀型男形象，扮演「鬍鬚背心麻甩佬」，談到不少粉絲期待他返港開個唱，霆鋒不排除有此可能，但當問到王菲年底開騷一事，他則調皮地說：「唔答你！」
由霆鋒及鄭容和主演的英皇新片《鋒味江湖之決戰食神》正拍攝得如火如荼，大隊近日轉戰澳門取景，劇組因利成便，昨午安排一眾演員包括霆鋒、鄭容和、葛優、唐嫣及白冰等到新濠影滙出席記者會，有關方面更即場公布邀得黃秋生加盟客串，而電影公司老闆楊受成及總監製霍汶希亦有現身，場面熱鬧。
齊封「天才」廚神
大會安排霆鋒、唐嫣與鄭容和、白冰分成兩隊大鬥廚藝，霆鋒隊邀得新濠天地廚藝總監譚國鋒助陣，負責煎煮東星斑；鄭容和隊則偕同新濠天地御膳房行政總廚Guillaume Galliot炮製皇帝蟹。賽前霆鋒與鄭容和被安排徒手活捉食材，原本西裝筆挺的霆鋒即除下墨鏡及外套，化身暖男捉魚，鄭容和亦三、兩下手勢已捧起超級巨蟹，引得全場尖叫！
據悉因忙於趕戲，霆鋒與鄭容和賽前未有機會向兩位大廚偷師，昨午惟有「打天才波」下廚，不過仍煮得有板有眼，霆鋒對配菜及上枱擺位一絲不苟，結果雙方勢均力敵成為雙冠軍！事後即場與嘉賓分享「魚蟹宴」，眾人吃得津津有味。而新濠影滙更為《鋒》片特製300磅超巨型漢堡包，預祝該片票房大賣及拍攝順利。霆鋒亦向一眾拍檔送上自家出品的曲奇作小禮物。
為食寧願NG
事後霆鋒及鄭容和接受訪問，談到該片尚有十日左右便殺青，霆鋒表示雖與鄭容和言語不通，但拍攝以來一直默契十足：「其實呢套戲最難係要等啲餸菜煮好推出嚟拍嘢啫。戲裏面我要留鬚，經常着住件背心喺廚房度煮嘢食，所以我都係呢兩日先剃鬚咋。」談到早前於內地真人騷大展歌喉高唱首本名曲《活着Viva》，引來網民着他快點在香港開騷，霆鋒說：「我唔抗拒嘅，不過想搵到一處露天同可以High High哋嘅地方先啫。（趕得切返香港慶祝父親節？）咁又應該唔得。（之前有同Quintus慶祝生日？）係，其他嘢唔講喇。（王菲年底開騷，你做嘉賓？）唔答你！」
而鄭容和則感激拍戲以來台前幕後對他照顧有加，又踢爆霆鋒工餘時亦很愛下廚，大讚他出品的蘋果批及烤乳豬好味！導演葉偉民亦於台上大爆鄭容和很愛吃：「看見美食他會兩眼發光，甚麼都愛吃。」鄭容和聞言即靦腆自爆：「拍戲有一道菜叫『大葱炒牛肉』，因為喜歡吃，想多拍兩遍，可以吃多點嘛！」
文：影視組
攝：司徒國榮
|
鍾意就快D Share啦！
|
|
|
