今日係中學文憑試（DSE）放榜日，當年會考以1A5B考獲25分嘅藝人黃翠如BB讀書咁叻，但竟然話自己做勞力嘅工開心過做用腦嘅工，唔知係咪驚聰明反被聰明誤呢？
尋晚同前晚播出嘅無綫節目《反斗紅星冇暑假 打工唔捱世界》，講旅遊達人翠如BB去瑞典同芬蘭一帶做「打工仔」，體驗生活。暫時就講到翠如BB做樹屋酒店打雜同臭魚工廠女工，嚟緊仲有幫聖誕老人做助手「精靈」、兒童圖書館管理員、侍應等等，唔少網民都話好期待佢做旅遊節目，大讚佢做得好好睇，仲好識講嘢咁話：「原本打算一次過睇，點知企喺房門一企就企咗半個鐘」。
執便便
前晚做樹屋酒店打雜嗰集，全晚嘅亮點一定係執屎嗰part！喺樹森打工嘅翠如為餐廚準備食物同洗碗，本身都好興奮，但去到清潔房間時開始有啲微言，而且當知道要清潔冇沖水系統嘅馬桶時，翠如BB簡直晴天霹靂，不過好彩係以火化式嘅環保馬桶，啲「嗯嗯」被燒到變成灰燼，所以都唔係想像中咁差！
正所謂一山還有一山高，原來執屎唔係最難頂，尋晚播出嗰集講翠如BB喺瑞典馳名罐頭魚公司、號稱史上最臭嘅食物－鯡魚（Surstromming）做工廠女工。除咗要親自篩選走唔完整嘅魚之外，仲要處理臭魚醃製過程，翠如BB形容醃製房裏面嘅一桶桶臭魚陣味似「坑溝裏面有死咗嘅物體加蛋嘅味」！最慘慘豬嘅係要試食完成嘅罐頭臭魚，翠如BB話：「日本有個臭味指數測試，我哋最熟悉嘅臭豆腐係420，而臭魚係8000，足足臭20倍！」
睇住翠如BB由開罐頭，啲汁一路標出嚟，已經令佢皺晒眉頭，原本放咗一條入口嘅佢，最後都係頂唔順吐番出嚟，網民話隔住個電視都聞到有幾臭，仲話世間財唔易搵，服咗佢咁都頂得順，翠如BB犀利呀！有啲網民反而就話想挑戰睇吓有幾臭，認真夠「吉士」！
另外，有網民留言話如果拍檔洪永城喺度，覺得翠如BB一定會「質」佢食，仲話好掛住佢哋孖住做節目，唔知呢個組合幾時會再重現江湖呢？
網民有話兒
Chxxrie Chxxxg：很想知道，倒夜香嗰PART，其實有無異味？因為鏡頭前，很難FEEL到你的嗅覺HAHAHA？
Y.X. Wxxg：非常期待，今晚D（啲）臭魚係咪臭到隔住電視機都聞到架
Lxxis Cxxng：緬甸都有臭名遠播嘅臭魚醬，邊個臭啲？
Mxxgaxxt Fx Wxng：點解咁臭居然有人食，而且一年生產20萬噸！！unbelievable!
Cathxxxne Woxx：你拍旅遊節目真係好好睇 : ))
|
鍾意就快D Share啦！
|
|
|
