同劉青雲結婚18年嘅幸福人妻郭藹明(Amy)，結咗婚之後一直過住幸福嘅少奶奶生活，專心一意做青雲背後嘅女人，打理家中一切大小事務，等青雲可以專心拍電影。心境好自然人都靚啲，好過用乜嘢護膚品，所以今年48歲嘅Amy到o依家狀態仲係keep得好好，真係羨慕唔少女性。噚日有讀者Grace透過本報「爆相爆片」，見到Amy同一個女友人喺上海街一間叫鴻運冰廳餅店嘅舊式茶餐廳食lunch，雖然嗰陣大約係1點半左右，撞啱係午膳時間，但係認得佢嘅人唔多，加上佢哋又坐喺閣樓最入嘅位置，所以佢哋可以食得自在。讀者Grace話：「郭藹明佢食得清淡，見佢係食米線同飲凍檸水，隱約聽到佢哋係傾裝修嘅嘢。」查實早前有報道話喺青雲兩夫婦前年喺西貢買入豪華別墅，雖然間屋比較殘舊，但係Amy勁愛嗰個無敵海景view，所以寧願花多啲時間去裝修呢個安樂窩，o依家處於呢個埋尾階段，希望可以趕得切喺年尾完功。話晒係精打細選嘅人妻，所以Amy好多嘢都自己一手一腳去做，好多時喺上海街附近啲建材店會見到佢嘅踪影，娶個咁叻嘅老婆，難怪青雲可以專心拍戲。
| 郭藹明全職顧家，同朋友食住下午茶吹水講裝修嘢。（讀者提供圖片） |  做咩托晒腮？（讀者提供圖片） |  （讀者提供圖片） |
來源 source: http://hk.apple.nextmedia.com
|
鍾意就快D Share啦！
|
|
|
