探熱針
搵食艱難 謝安琪斬件賣身養家 張繼聰 600蚊拍劇幫補
在無綫主持拍劇騎兩瓣的張繼聰，近日再接新劇《食為奴》，又以 20萬買下二手 Land Rover方便開工；密密有 job，但張繼聰在無綫的騷價得 600蚊，拍一套《老表，你好嘢》，也只有萬多元落袋，賺埋夠食飯俾油錢，養家重責，繼續靠老婆謝安琪撐住。
老公搵得少，去年收 160萬簽約星煥的謝安琪，早前再賣多次身，連同一半經理人合約，以 250萬與台灣金牌大風簽約三年，慢慢搣！
識擦高層
出道以來，張繼聰事業毫無起色，直至去年有份拍王祖藍揸旗的《老表，你好嘢》，才有所改變。「無諗過潮潮（劇中角色）咁受歡迎！」張繼聰得意，老婆謝安琪亦幫口穀人氣：「見到佢追王菀之，我都嬲咗佢，囝囝問點解爹哋會同第二個姐姐一齊。」
無綫俾機會，拍劇之外，張繼聰還有機會做主持，與商天娥主持節目《玩嘢》，可惜觀眾反應極差，未能為他加分。
「佢（張繼聰）同娥姐完全無默契，頭嗰兩集連睇機位都掌握唔到，班幕後工作人員鬧爆，其實佢係擦得掂餘詠珊先有機會做主持，但連公司自己友都嘈曬，話佢做得差。」知情者說。
得不償失
工作量無疑增多了，但張繼聰為無綫拍劇，一個騷錢得六百蚊，就算有機會拍到人氣劇《老表》，實際收入也只得萬多元。但為方便返電視城開工，早前花了二十萬，買入一架二手 Land Rover，得不償失。
「阿聰住大埔，返 TVB車程遠，又唔可以成日揸咗老婆架 Mini，咪買部二手車開工囉！呢款 Land Rover新車要成四十幾萬，二手價都算合理！」
謝安琪去年與環球解約，轉投星煥旗下，但近日竟然再賣身台灣金牌大風；據了解，由於她連同經理人合約一併簽予對方，令星煥老闆何哲圖大發雷霆。
好睇唔好食
張繼聰以歌星身份拍劇及做主持，騷錢得 600元，與他拍住檔在《老表，你好嘢》中被讚的王菀之，騷錢亦只得一千元，隨時貼錢打工。
事實上，無綫出手一向低，尤其新人，港姐華姐選美後簽約，騷價一千元起跳，巨聲幫更低至 800元。願打願捱，樂大媽金句：簽無綫提升知名度，加強賺外快能。值博與否，自己諗！
「舊年過星煥，阿 Kay收咗一百六十萬簽兩年，做唱片好難搵夠數， Herman（何哲圖）一路都要求同夏森美（謝安琪經理人）一齊 co-manage阿 Kay，做法同以前環球一樣；但佢哋一路係咁拖，仲唔聲唔聲簽咗俾台灣金牌大風，雖然只係國語碟，但阿 Kay過咗星煥咁耐，碟都未出就簽第二間公司，仲要連一半經理人約都簽埋俾嗰邊， Herman唔嬲就假！所以佢哋呢排都無咁落力幫阿 Kay傾 TVB啲 job。」
飯局補鑊
得罪米飯班主，謝安琪做好做醜，拖埋張繼聰，相約何哲圖及餘詠珊兩夫婦食飯補鑊。
「人哋唔係傻嘅，冇咁易掹得番啦！阿 Kay食兩家茶禮，收錢嗰陣，佢應該諗吓後果。」
收入雙位數
童星出身的張繼聰，歌影視舞台劇樣樣沾手，但多年來事業無甚起色，即使在無綫曝光率有增加，但賺錢能力仍十分有限。
mailto:nextb@nextmedia.com
|
鍾意就快D Share啦！
|
|
|