世紀拖手 5月 21日清晨 6時
Hermès Kelly Bag10萬
一向戀情低調的林峯，從美國回港，下機後首次在記者面前拖住女友，可見 BB在峯峯心目中地位。不過問到美國秘婚，林峯就話：「作嘢，冇咁嘅事！」
滾熱辣
BB大咬峯錢 峯爸美國冷待千語
19歲的吳千語憑嗲功，成功俘虜大她 14年的林峯，峯峯豬為冧女友千語 BB，荷包大解放。兩人拍拖半年多，吳千語已經住豪宅、周身名牌。大咬 BB最近更睇中 320萬的 Aston Martin DB9跑車，加埋之前兩人日本、歐洲旅行狂掃 Hermès，峯峯豬已被燒過千萬。
上周，林峯帶埋千語 BB，與家人齊齊出席細佬（林逸洺）美國大學畢業禮，進一步確認女友地位。千語 BB亦把握機會，出盡嗲功冧未來老爺奶奶。雖然有傳兩人在美國秘婚，但實情是 BB還未過峯爸（林華國）嗰關。峯父對千語一直保持距離，甚少交談，連影合照都唔願。林峯堂妹林夏薇亦漏口風說峯爸同 BB冇合照，談到兩人關係時，她似有難言之隱口窒窒︰「……你都係問番佢哋啦。」
「偷食編輯男」事件後，吳千語旋即以喊功箍掂林峯，而峯峯豬為保戀情，亦在微信發兩人親熱照宣示主權。上周四（ 5月 16日），林峯帶埋 BB，出席胞弟在美國南加州大學畢業禮，不避嫌在公眾地方煙韌。
雖然林峯極力想 BB融入家人圈子，但據知在美國期間， BB即使出盡渾身解數，依然未能打動峯爸。據知千語 BB在峯媽面前扮乖巧，不時「 Auntie」前「 Auntie」後，更擦曬鞋讚對方着衫好睇，逗得峯媽大樂。不過，做慣生意，眉精眼企的峯爸卻不為所動。千語主動上前搭訕，峯爸對她一句起兩句止。
尷尬回應
5月 22日，林夏薇出席無綫影周年合照活動。問到千語 BB與峯爸可有合照時，她立即緊張說︰「佢哋冇冇冇（合照）！」記者想再追問，她已被經理人拉走。及後記者再翻兜問她千語 BB與峯爸關係時，她似有難言之隱︰「唉吔！我唔知……你都係問番佢哋啦。」
嗲唔掂峯爸
「峯爸做生意見咁多人，睇人好叻，千語嗲功對佢冇乜效。今次喺美國，千語好主動討好峯爸，但佢老人家就唔多領情。有次千語 BB話同峯爸影相，但佢以一句︰『老人家冇乜好影！』而拒絕。阿峯就即時打圓場話︰『一陣再影！』峯爸知道個仔短短幾個月，使咗成千萬喺女友身上，梗係唔高興啦。佢同人呻，話個仔未試過使咁多錢，就算之前同潘霜霜拍拖，阿峯都係每個月使幾萬蚊。佢話呢個女仔好犀利，不過佢知個仔脾氣，惟有唔出聲。」
21日（星期二）清晨，林峯不但親自護送 BB由美國返港，兩人首度公開拖手攬腰，又大曬 18萬情侶 Hermès袋。一線小生紆尊降貴為女友做阿四搬行李後，旋即風塵僕僕再乘飛機返橫店拍劇，看得出林峯錫 BB錫到燶。
提 fing錢黑面
而意氣風發的吳千語，當日下午出席內衣騷活動時，被問及出席男友弟弟畢業禮時，更發嬌嗔大曬幸福說︰「純粹畢業禮，開心嘅！」提到林氏父母，她說︰「佢哋好 nice！」至於美國秘婚，她就否認︰「唔係真！但拍拖梗係視佢為結婚對象。」問到狂 fing男友錢，她立即黑面︰「我一路努力工作，係啲人冇留意，其他人點講亦唔到我控制。」最後問為何沒與峯爸合照，她直情當聽唔到，身邊經理人亦急急將她拉走。
半年大咬千萬
33歲林峯經濟上全力照顧千語 BB，除咗以 8萬月租麥當奴道豪宅作愛巢，又租屋給女友一家居住外，千語 BB由頭到腳都係 Hermès、 Prada、 Chanel等名牌貨，加上之前豪遊東京、沖繩、米蘭，旅行期間狂掃名牌，千語 BB豪氣買了十多個不同款的 Hermès Birkin手袋，拍拖半年已使千萬。
- 林峯BB世紀拖手
|
鍾意就快D Share啦！
|
|
|