孫季卿原名孫桂興，入行時他以同音字為自己改藝名。卿叔手上是他的墨寶，他謙虛地說近年已少練字：「我好懶，寫字其實都係天生，以前讀書時一定要學寫毛筆字，至練多啲。」
話當年
粉墨謀升鬥 孫季卿
熟識的面孔及聲音，陪伴大家電視撈飯超過三十年，曾參演逾百齣電視劇的孫季卿，雖然演活過不少看更、高僧及掌櫃角色，但最耀眼的演出，卻是《金枝慾孽貳》中飾演前欽天監佟泰一角，因露出頸後巨瘤，惹來萬千視迷關注。小角色大故事，卿叔並非一般二打六，其實他博學多才，年青時曾當軍官，更寫得一手好字。大隱隱於市，從前為了升鬥生活而要粉墨登場，今日只為興趣，不變的，是他鏡頭前的親和力。
楷書、篆書及行書，卿叔無一不曉。楷書中他寫到「粉墨謀升鬥，天倫樂泰龢」，道盡他從前在電視台粉墨登場，只為工作過後能夠一家歡聚的心聲。
「卿叔」孫季卿現年 81歲，擅演小角色的他，文學修養在圈中頗負盛名。拍《金枝貳》時，飾演他兒子的黃德斌也向他問字。卿叔說：「我見佢唔明對白，背得好辛苦，係有提點吓啦。其實黃德斌唔啱演呢個角色，個角色要有書卷氣，佢係粗獷型。」
原來，卿叔亦曾推辭唔演《金枝貳》，他說：「我驚要捱夜，好在劇組遷就我。（點睇收視愈來愈低？）係意料中事，佢（指黃德斌）嘅對白觀眾都聽唔明，又點會有心機睇。」
卿叔博學多才，源於他從小熱愛詩詞歌賦。他家中收藏了不少自己的墨寶，雖然他謙虛地說自己近年已少練字：「自己對書法只是性情近，易上手，其實都係靠多睇別人作品。」
卿叔因《金枝貳》露出巨瘤令視迷關注。現時他與 TVB簽一年一 show，《金枝貳》找他演出時簽了 15個 show（一個 show當半集計），最終只是拍了 10個 show的戲份，即他賺了 5個 show錢。
編劇變演員
卿叔在香港出世，十歲時返回鄉下惠州讀書，高三畢業後考入西安第一炮兵學校，後擔任教官。 76年卿叔回港，最初投考佳視編劇，卻因佳視劇集開拍前有一老角甩底，卿叔於是執二攤而入行， 83年加入 TVB。
卿叔說：「做教官時掌握過機密資料，所以退伍後都要等廿年，到 47歲才可以回港。我最初繼承父親賣本地豬生意，不過賣豬係夕陽行業，所以投考佳視。
劉華好親切
劉德華與卿叔首次合作，是 83年拍電影《毀滅號地車》，卿叔飾校長，鬧咗做學生嘅劉華一餐。後來華仔遇見卿叔，仲主動問卿叔記唔記得佢。卿叔說：「五虎之中，對華仔及偉仔（梁朝偉）嘅印象最深，佢哋對人都好親切。」
酒照飲煙照食
入行多年，想不到一個巨瘤才令卿叔被視迷關注。其實卿叔年初曾經在家暈倒，到白車來到時，醒來的卿叔卻拒絕入院。「我唔做身體檢查，係唔想知有乜嘢毛病，知道咗反而有壓力！個頸瘤係脂肪瘤，生咗十幾年，佢唔痛，但係慢慢大，我亦習慣咗。醫生叫我唔使理，只係叫我少啲食雞。不過我都冇乜戒口，平日照樣一星期打兩次牌，每次都打十二圈；兩日食三包煙，每晚飲一両白酒。」
卿叔的兒子是一名港聞編輯，而太太於十年前過身。「妹夫早幾年過身，所以我同妹妹一齊住，有個照應。我喺深圳有層樓收租，又有一筆退休金，可以自己養自己。『流水落花春去也，行雲野鶴任逍遙』係我現時嘅寫照！」上聯出自李後主的《浪淘沙》，下聯則是卿叔的創作。卿叔才情橫溢，短短兩句，已道盡他歷盡世情，隨心而活的豁達思想。
點評群星
卿叔拍劇三十多年，曾經與不少藝人合作過，卿叔更講出這些紅星鏡頭後鮮為人知的另一面。
秋官尊重老人家
04年拍《血薦軒轅》，卿叔說：「秋官好尊重我，試過主動叫我，我聽唔到冇理佢，佢都冇嬲。我哋好傾得埋，會一起研究對白。阿姐為人爽直，遇事會據理力爭。」
至於楊思琦，卿叔說：「咁多個港姐中，我同佢最投緣。佢份人細路女，對老人家嚟講好易親近。」
教劉松仁唸詩
兩人 83年在麗的拍《劍仙李白》時認識，當時卿叔直言劉松仁唸李白的詩時，停頓位有問題。卿叔說：「我熟嗰篇文章，有提供意見，佢都虛心聽。當時佢都唔知道我個名，之後好多年後喺 TVB合作，佢都叫我『卿叔』。」 07年兩人在《翡翠戀曲》再合作。
|
鍾意就快D Share啦！
|
|
|