探熱針
假的真不了 群起杯葛李思捷 《玩嘢王》造假埋尾
由李思捷一手策劃的整人節目《玩嘢王》，近日一枝獨秀，收視高開二十點，連帶有份被玩的馬賽以及參與整人任務的鍾嘉欣亦人氣急升。恃住高收視做金鐘罩，李思捷愈玩愈過分，早前用測謊機玩周家蔚，狂問閨房性事，洪天明知道後躁爆發火，監製為息事寧人，最後大刀刪走兒童不宜內容。
據了解，為防藝人繼續出醜，藝員科落禁令唔再放人，李思捷為要完成最後三集《玩嘢王》，除要預先通知「被玩」嘉賓，更要呈報所有玩嘢內容，搞到「玩嘢」變「假嘢」。
集體投訴
李思捷孭飛的《玩嘢王》，雖然被指明抄由 Hardpack樂隊 Kevin掌舵的網上整蠱節目《玩爆你個腎》，依然吸納到師奶觀眾捧場，在週末拍烏蠅時段錄得二十點收視。據了解，因李思捷愈玩愈過火，最終辣㷫藝員科，上週六（五月十八日）播出的「陳智燊 cast功夫片」，內容其實全部造假，卡士更愈來愈奀，由起初的馬賽、鍾嘉欣花旦級別，到第五集跌 watt去到陳智燊，甚至要玩埋外人區瑞強等先夠充撐場面。
「徐子珊同呂慧儀俾思捷用電話整蠱完都有啲㷫，先後同公司反映過，連佢口中嘅阿姐陳雅倫都唔妥佢利用緋聞造宣傳。去到第四集周家蔚俾佢問大肚時老公點解決？鍾意咩姿勢？愈問愈三級，思捷仲要臨時爆肚無照稿問，搞到幫手玩人嘅江欣燕聽到皺曬眉，連現場工作人員都覺得過咗火位。純粹滿足自己多過為收視，洪天明後來幫老婆搵監製理論，最後公司剪走所有三級內容。藝員科覺得長遠落去會有問題，怕影響藝人形象。」無綫工作人員透露。
有商有量
唔想送羊入虎口，藝員科出手做嘢，凡李思捷搵嘉賓上節目一律拒絕，除非肯將被玩內容、對白預先給藝人過目。
「上星期玩陳智燊嗰集，佢一早知道，所以能夠保持靚仔樣出鏡之餘又唔會出醜，只需要配合內容做出誇張表情，最重要呃到觀眾。總之日後好難再有第一集阿 Bob真情流露爆粗鬧人咁激。其實思捷都想再添食，不過仲邊有人肯落疊，做完七集都要收檔。」知情者說。
無綫日前為節目搞祝捷會，問到會唔會再添食，得罪人多李思捷直言：「都玩完啦，而家好多藝人見到我都怕。」
三級內容被 cut
李思捷愈玩愈過火，第四集狂問性問題，連江欣燕都嚇到答唔到口，踩界問題最後被刪走，不過周家蔚反應全部屬真。
假玩
事先知道被玩的陳智燊在第五集反應全部造假，所以他可以由頭到尾保持靚仔樣，不過搞笑程度跌 watt。
玩大咗
將觀眾嘅快樂建築响藝人痛苦及出醜身上，遇着對手小氣唔講道理，分分鐘反面收場。
|
鍾意就快D Share啦！
|
|
|