掃呢頁CODE去手機

2013年5月3日 星期五

拖陳雅倫連蒲兩晚 李思捷:佢依家係我條女




《蘋果日報》圖片

大封面

拖陳雅倫連蒲兩晚 李思捷:佢依家係我條女

39歲的李思捷與 47歲的陳雅倫,近日驚爆「姊弟戀」,事後兩人拒認戀情,但女方承認經常上男方屋企,飲伯母靚湯。本刊收到消息,早在一周前,李思捷不但連續兩晚帶着陳雅倫出席喬寶寶餞行 party,席間更鬆毛鬆翼向友人爆︰「佢陳雅倫依家係我條女。」

陳雅倫入到屋兼躋身李思捷朋友堆,更不避嫌在微博發春情。反觀正印女友「春卷」(王寶寶),一邊廂死撐情敵陳雅倫「冇影響」,另一邊廂又忍唔住扯火話:「我覺得冇需要識呢個人!」近日更赴英散心,實行冇眼睇。邊個女人佔上風一睇就知。

「玩嘢王」李思捷出名「雜食」,跟「春卷」拍拖 4年以來,與𡃁模 Naomi、藝人李思蓓有一手。今次男友搭上情場老手陳雅倫,閱歷尚淺僅得 23歲的「春卷」,除咗啞忍,仲可以點?

今年 1月,本刊發現李思捷同春卷趁農曆年前外遊,當時兩人有講有笑,想不到三個月後春卷就搞到要避走英國。

李思捷與陳雅倫的關係曝光,源於上周一( 22日及 23日)喬寶寶的告別派對。一連兩晚,李思捷都帶着陳雅倫出席,當晚在場只有廿幾人,大部分是幕後製作人。眾人見到陳雅倫都覺奇怪,因為她跟喬寶寶大纜都扯唔埋。

據現場人士爆料︰「 Ellen(陳雅倫)當晚都有主動同人打招呼。佢同思捷好似孖公仔咁,成晚表現好親暱。玩到淩晨三點左右,思捷臨走前突然向身邊好友宣布『佢陳雅倫,依家係我條女』。講完冇耐佢哋仲一齊上車走,大家都 O曬嘴。第二晚 party,佢哋又再孖公仔出現,大家都知咩事。」

求愛不遂爆粗

李思捷帶埋陳雅倫出席喬寶寶的餞行 party,據知當日喬寶寶亦是初次見陳雅倫。

不過,偕新歡出現的李思捷,當晚趁陳雅倫去洗手間,竟勾搭在現場的舊相好𡃁模 Naomi。「 Ellen一行轉背,我哋就見到思捷行埋 Naomi身邊,鍊一鍊女方嘅膊頭,問佢幾時得閒出嚟飲嘢敍舊? Naomi即時彈開。可能因為𤓓,思捷好大聲爆粗鬧人。佢真係唔會放過任何溝女機會。」

微博發春情

由 4月開始,陳雅倫頻頻在微博發功,話自己要珍惜現在,之後就自爆最近心情甜甜,近日再狂鋪同李思捷的合照,擺明冧到爆,兼希望戀情蒲面。

6/4重拾美麗

回首從前,陳雅倫表示現時仍然信心十足,自覺仍然美麗,明顯得到愛情滋潤。

20/4心情甜甜

自爆心情甜甜,配合冧笑大頭相一張, 47歲陳雅倫恍似懷春少女上身。

28/4感激男友

同一張相,陳雅倫 post了兩次。第一次多謝其他人,獨欠李思捷;第二次就寫明「 thank you for your care and love」,加埋啲心心,擺明冧到出面。

偷食有前科

李思捷雖然 09年同「春卷」王寶寶拍拖,不過多年來李思捷多次偷食,次次「春卷」都係死忍。

12年速食 Naomi

去年李思捷被發現同𡃁模 Naomi到澳門新益飯店食消夜,之後飽暖李思捷仲拖住 Naomi到金沙酒店過夜,直至翌日下午四點才前後腳離開。

圖片

11年密會李思蓓

與春卷拍拖期間,被傳媒拍下約會李思蓓,更幫她挽手袋及輕扶背部,更在夜店密會八小時。事後李思捷指兩人只是傾談工作。

圖片

09年借醉抽水

李思捷在夜店不時趁三分醉意向女星抽水,受害者包括李思蓓、落選港姐曾愛媚及岑潔儀。岑潔儀一直啞忍,直至 12年嫁人時才公開事件,她更指當年好多女星都被李思捷抽過水。

李思蓓

岑潔儀

喬寶寶:我唔敢多講

記者致電喬寶寶求證,他承認陳雅倫一連兩晚都有出席他的餞行 party:「 Ellen(陳雅倫)係兩晚都有嚟。(李思捷同佢一齊來?)仲有其他人嘅。(咁佢哋係咪一齊走?)我睇唔到。」當問到李思捷向友人介紹陳雅倫是他女友時,他立即緊張起來,一度口窒窒︰「嗯……我唔知……兄弟嘅嘢我唔想講。」說罷匆匆收線。

記者再致電當晚曾遭李思捷撩翻撻的 Naomi求證,她說︰「唉!呢樣唔回應,我同佢(李思捷)已經係過去式,唔想再同佢牽扯,佢身邊一向都多女仔㗎啦!(點睇佢同陳雅倫拍拖?)如果係真,咪真心祝福佢囉!」

據知李思捷與陳雅倫是半年前在尖沙嘴「 Where Bar」經友人介紹認識,更是一撻即着。李思捷一向唔喜歡身邊女伴向傳媒講感情事,故陳雅倫近日面對傳媒追問,惟有推說兩人是廿年前登台認識兼鄰居。不過陳雅倫數口認真麻麻,因為廿多年前李思捷未夠廿歲,還是學生一名,點會與當年 27歲的性感女神陳雅倫登台呢!

李思捷 09年與 18歲「美味天使」的「春卷」拍拖,兩人年齡相距十五年。春卷被發現不時獨個夜訪男友家,她備有門匙出入,正印地位明顯。圖片

上周六( 27日),李思捷為區瑞強演唱會表演完後,即往灣仔繼續夜蒲。當知道大批記者追訪,李思捷即流露巨星風範,甚為風騷。

陳雅倫冧奶奶

李思捷不時偷食食出禍,不過每次記者問春卷回應,春卷都扮冇嘢。 11年李思捷偷食李思蓓,春卷都只係口震震啞忍:「唔想諗咁多!」圖片

不過,情場老手陳雅倫亦非省油的燈。她早在 4月初,已暗中在微博「發功」,大曬「心情甜甜」,更狂 post與李思捷的合照,暗示兩人親密關係。早前她接受周刊訪問,亦明言:「姊弟戀?有咩唔可能!」

其實年近五十的她,深知年紀唔細,近日想搵個人嫁。「 Ellen姣功好掂,好快已經登堂入室,表面就話唔想出街俾人撞到影響思捷,實則就係行奶奶政策,𠱁思捷阿媽。思捷係孝順仔, Ellen又好識冧老人家,反而『春卷』就同李母冇兩句。」

與「春卷」拍拖 4年以來,為了食住女方,李思捷不但要求女友退出娛樂圈,更要對方隨傳隨到。而「春卷」雖然知道男友花弗,但一直敢怒不敢言。近日李思捷更下令,沒有他准許,「春卷」不得擅自上他家,她也覺得男友有景轟。

李思捷向來花心,大男人兼控制慾強,他自己公然偷食好地地,但若有男人埋女友身,他會躁爆鬧人。此外,他要求女友與傳媒保持距離,若有傳媒追問,更自度了一些標準答案,要女友跟住答。

「思捷一向玩得揚,但對女友睇得好緊。試過有男仔同『春卷』黐得埋啲傾偈,佢轉頭就好寸咁警告對方:『你係咪唔想喺 TVB撈!』搞到冇男人敢埋『春卷』身。為免除後顧之憂,思捷仲叫『春卷』淡出娛樂圈。佢同陳雅倫單嘢爆咗出嚟,佢即刻度咗啲對白,教『春卷』應付傳媒,『春卷』好傻㗎,成日以為男友只係逢場作興,始終都會返佢身邊。不過最近佢心情麻麻,飛咗去英國散心。」知情者說。

男友瓣數多

陳雅倫 85年參加「新秀」入行,曾參演 30多部電影。不過,性感及緋聞才是她的賣點,入行至今陳雅倫有不少緋聞男友。

05年速食吳鎮宇

出席電影《黑白道》首映禮後,陳雅倫與其他演員拉隊往夜場狂歡慶功,其間吳鎮宇對她狂攬喪吻,更將頭部埋入她的胸前,又在她的玉背摸掃多次。

00年追王瑞勳

與黃尚偉分手後,陳雅倫主動追求練馬師王登平之子王瑞勳,兩人拍拖一年後分手。後來王瑞勳轉冧楊婉儀,兩人更於 03年結婚。

93年偷搭王敏德

與王敏德合作拍三級片《危情》,她露點上陣,兩人被指假戲真做。當時的王敏德已經與馬詩慧結婚,而陳雅倫則辯稱兩人相識已久。

89年戀音樂才子

經蘇永康介紹,陳雅倫同永安集團後人兼唱片監製黃尚偉撻着。兩人戀情達 11年之久,直至 00年才分手。

春卷:冇需要識陳雅倫

09年,陳雅倫在台灣現身電視節目《綜藝大哥大》,和主持人張菲大跳辣身舞。有波餅食的張菲,禁不住由心笑出嚟。

記者致電身在英國的「春卷」,她自稱赴英是參加友人婚禮。問到陳雅倫自爆經常上李思捷家中飲湯,她本欲淡化事件,解釋說:「佢哋屋企成日都好多人上來食飯,因為 auntie(指李的母親)煮嘢好好食。(怕唔怕陳雅倫行「奶奶政策」?)唔會有影響。」

但當她得悉李思捷在友人前以「女朋友」身份介紹陳雅倫時,她按捺不住寸爆︰「思捷有介紹過好多相識咗好耐嘅朋友俾我識,不過就冇陳雅倫份囉。(會唔會叫男友介紹佢俾你識?)我覺得冇需要識呢個人!」本刊多次致電李思捷,但他未有回覆。

男人嘅嘢,綁唔住就綁唔住,更何況今次撞着性感尤物陳雅倫,「春卷」要力保正印地位,似乎唔係咁易。

王寶寶 VS陳雅倫
靠《玩嘢王》單飛

李思捷近年憑「福祿壽」走紅,不過獨擔大旗卻是近日播映的《玩嘢王》。《玩嘢王》專玩明星,事前保密功夫做足,李思捷事後會找林欣彤等被玩嘉賓(小圖)上節目分享感受。雖然《玩嘢王》被指抄襲同是玩明星的網上節目《玩爆你個腎》,但《玩嘢王》收視仍達廿點,絕對是逆市奇葩。

至於即將在《玩嘢王》出現的嘉賓,包括有郭晉安、楊怡、馬國明、陳敏之、王君馨等,據知鍾嘉欣更會被玩到喊。

上周播出的《玩嘢王》,因扮錄影中有鬼出現,嚇到馬賽花容失色,她更雙手合十求神保祐。

其他影片
  • 搭上陳雅倫 李思捷囂爆


鍾意就快D Share啦!