熱爆娛樂: 殼王蒲頭要清場殼王,陳國強,M1,

2013年10月31日星期四

「殼王」陳國強壓軸現身《衝Ⅱ》慶功宴，仲主動撩朱晨麗傾偈。

重頭劇《衝上雲霄Ⅱ》收視報捷，無綫上個禮拜四晚（十月二十四日）喺電視城擺咗十九圍，招呼台前幕後食番餐。

呢排因為政府三揀二發免費電視牌，搞到好多由無綫過檔去 HKTV嘅員工變成失業軍，席上梁乃鵬博士打曬鑼話公司「門常開」，歡迎離巢同事回歸，仲話無綫會制定全新指引，日後開廠工時唔會超過十個鐘，外景不得超過十二小時，劇本就要寫好八成先可以開拍，就算咁做會增加營運成本，但都要將不足之處做得更好。

朱晨麗（箭嘴）表現怕醜，相反胡定欣同殼王對話淡淡定定。

殼王唔願見傳媒，公布公司新制度同立場重任，交由梁乃鵬博士負責。

朱晨麗、胡定欣被安排坐大老闆左右，傅嘉莉更主動，向其士集團創辦人兼無綫非執行董事周亦卿握手自我介紹，識做。

大老闆「殼王」陳國強嗰晚其實都有去慶功宴，但就等到記者清場先出現。一嚟到，殼王摩打腳行去主家席，坐低同港姐冠軍朱晨麗以及胡定欣密密斟。

即係咁，其實八珍對梁博士所開嘅期票有啲半信半疑，尤其係劇本要有八成先開得工呢一點，真係講都冇人信囉！老細，點解你顧住飲酒傾偈，唔公開發表吓高見呀？

「 Cool魔」張智霖都有嚟食飯，見到「細妹」胡杏兒，攬完就話：「嘩！阿妹，冇見一排肥咗咁多嘅！」八珍好奇，究竟講緊條腰定個胸？

鍾意就快D Share啦！