熱爆娛樂: 辦喜事　軒仔杏兒 mark期　胡定欣趕嫁廣告才俊胡定欣,MF,

2013年10月30日星期三

辦喜事　軒仔杏兒 mark期　胡定欣趕嫁廣告才俊胡定欣,MF,

胡定欣同男友 Patt戀情逐步明朗化，經常糖黐豆孖住拍拖去街，幸福程度爆燈。

真面目

辦喜事　軒仔杏兒 mark期　胡定欣趕嫁廣告才俊

無綫花旦胡定欣去年憑《拳王》啞女一角摘下 TVB「最佳女配角」，啱啱先拍完《飛虎Ⅱ》𠵱家又開緊新劇《點金勝手》，劇接劇嘅佢唔只專注事業，據知戀愛大過天嘅定欣，已計劃與拍拖一年多嘅廣告界才俊 Patt（沈柏淳）於農曆年前拉埋天窗，仲一早搵埋好友張敬軒和胡杏兒為伴郎伴娘，最近一班好友更頻約飯局商討細節。

事業愛情行運，難怪胡定欣回應結婚一事時，春風滿面笑曬：「我同男朋友關係非常好！」忙完《點金勝手》，正式埋位做沈太囉！

胡定欣自去年與 Patt拍拖後，不時大曬恩愛，胡更火速進駐男友於渣甸山愛巢，一於同居試婚。向來戀愛大過天嘅胡定欣已經 32歲，據知男友於幾個月前求婚成功，仲搵定好友張敬軒和胡杏兒做伴郎伴娘，為婚事做好準備。

冧爆回應

問到與男友 Patt正籌備婚事，胡定欣春風滿面：「我同男朋友關係非常好！」個樣真係冧到爆喎！

上週四（ 24日），胡定欣出席梁乃鵬（右下）歡宴《衝上雲霄Ⅱ》台前幕後仝人晚宴，全晚都笑容滿面，仲孖住好姊妹杏兒密密傾，搞喜事人都開心啲！

飯局傾細節

「雖然 Patt同定欣只係拍咗拖一年多啲，但兩個人感情真係好好。其實之前佢兩個一齊去蘇梅旅行嗰陣， Patt已經求咗婚，定欣好感動，個個朋友都知！加上定欣又到咗適婚年齡，都係時候啦！𠵱家定欣打算忙完《點金勝手》就會搞婚禮，想喺農曆年前搞掂！伴娘伴郎梗係預杏兒同軒仔啦！佢哋最近成日約出嚟，傾點樣搞婚禮添！個個 friend都戥佢兩個開心！」胡定欣身邊人說。

據知胡定欣眼見圈中陳茵媺同陳豪婚姻生活甜蜜美好，已經過咗女人 30嘅佢，更加想快啲結婚生 B，免得做高齡產婦。

胡定欣 9月生日時，身邊一班好友如胡杏兒、胡蓓蔚、單立文等等，齊齊幫她慶祝，當然還有「未來老公」 Patt啦。

網上圖片

今年 8月，胡定欣同男友 Patt拍住拖去蘇梅旅行，定欣心情大靚，大騷三點式，有廣告界男友揸機，梗有水準啦！

網上圖片

「關係非常好」

本刊上週四（ 24日）於活動後問胡定欣，與男友 Patt籌備婚禮一事，她笑曬答：「其實呢啲新聞一年都會傳幾次，但我話你知係唔會結嘅！（咁同男友關係？）我哋𠵱家關係非常好。（男朋友求咗婚？）咁又未喎！（咁你到咗適婚年齡，呢 2年會唔會結婚？）我暫時都未諗，呢 2年都係工作為主。」胡定欣雖然例牌否認婚訊，但個冧樣完全 ready等嫁喎！