掃呢頁CODE去手機

2013年11月28日 星期四

古仔羅馬蝦碌許願 古仔,古天樂,M1,




得知向許願泉許願要背向噴泉後,古仔問陳木勝攞銀仔嚟多 take, NG冇緊要,最緊要靈靈性性!

同你吟一吟

古仔羅馬蝦碌許願

唔再拍劉華,導演陳木勝搵咗劉青雲、古天樂孖寶兄弟加埋上曬身嘅張家輝合作寰宇新片《掃毒》,作品獲羅馬電影節邀請做閉幕電影,三位主角去齊,除咗劉青雲同老婆早啲過去玩,古仔家輝同其他人早個禮拜五(十一月十五日)晚一齊出發。

行程連頭夾尾得兩日半時間,當中仲有廿八個鐘喺空中。第二朝一到埗,古仔快叉一陣,就同大隊羅馬一日遊,晚飯前,仲要坐車去埋許願泉許願。

神心古仔默默稟完一輪,身邊先有人同佢講話喺許願泉許願,係要背住個噴泉掟銀仔,古仔二話不說,問導演攞多個銀仔, take two嚟多次。

第一次拜鬼佬神,蝦碌許願嘅古仔話如果《掃毒》收得,會再嚟羅馬還願,仲要前面還一次,後面又還一次,唔會打斧頭。好!八珍望如你所願,殺曬!

古仔、家輝羅馬到此一遊,廣場睇街頭表演,古仔仲搶購手信。

入到教堂,行到好攰嘅古仔話有好多嘢同上面講,乘機坐低休息。

同老婆提前出發遊意大利嘅劉青雲,校啱時間由米蘭返羅馬會合剛到埗嘅古仔、家輝、陳木勝同老闆林小明開飯。



鍾意就快D Share啦!