返母校爆咪，祥仔唱到肉緊時，擘大個口，一臉陶醉，之後落埋台握手，十足開個唱一樣。
探熱針
笑星歌聲 返母校爆咪 阮兆祥自揭猛史：贏得多，冇朋友！
賣搞笑四十六歲的阮兆祥，近日自資七位數於下月中舉行三場處男個唱，一圓做歌手心願。個唱前試水溫，他專程返母校爆咪，他還自爆當年在校內唱歌贏到開巷，搞到冇朋友。曬料！
Eason上身
日前重返母校高主教書院做歌唱比賽嘉賓，阮兆祥自己出埋錢，花過萬租用靚音響讓師弟妹一展所長。孭住「阮師兄」個朵，祥仔收起平日的搞笑形象，為今年要應付公開試的師弟妹打氣：「讀書有壓力，尤其面對公開試。我嘅人生路都遇過好多波折同困難，公開試或者係你哋人生第一場戰役，但希望認真對待之餘亦要平常心面對，唔好睇得太重，前路係光明嘅！」
嚴肅過後，阮兆祥揸住咪一臉正經唱出曲婉婷的《我的歌聲裡》及《你是我的眼》，曬完唱功，現場一眾師弟妹大為意外原來「阮師兄」有料到，即時全場尖叫。見師弟妹有反應，阮兆祥愈唱愈投入， Eason上身。
學屆四連冠
當頒獎給以大比數拋離對手的冠軍學生時，阮兆祥忍唔住自爆當年學界歌唱比賽威水史，「贏得多，冇朋友㗎！當年我年年攞冠軍，之後冇人肯報名參加比賽。」
事後有老師亦指阮兆祥當年有學界陳百強之稱，中二開始參加校內歌唱比賽，並成為四年霸。「佢年年都贏冠軍，到佢中七嗰年，同學知道阮兆祥又報名，冇同學夠膽同佢較量，搞到冇人報名，結果歌唱比賽搞唔成，改為阮兆祥同學個人表演 show。」一名老師說。
預演試水溫
在校內贏到開巷，自信爆棚的阮兆祥八四年畢業後報名參加《新秀》，卻遭遇滑鐵盧，只能打入十五強，輸給當時賣舞功多於唱功的張衞健。轉走搞笑路線前，阮兆祥推出過兩張唱片，可惜反應麻麻，直至近年與王祖藍、李思捷的「福祿壽」爆出，令他有機會再上舞台，今次雖然是在伊館開處男個唱，但七位數製作費規模，絕不遜於紅館。
借母校預演個唱，阮兆祥 high爆！臨場加插握手位，結果被師弟妹包圍半小時才甩到身。
笑中有淚
《新秀》落敗，阮兆祥再參加「十九區業餘歌唱比賽」得季軍，同屆冠軍是李克勤；往後出過兩隻碟，但唔賣得，之後再為港台拍劇，又做過 DJ，繼而走入 TVB木人巷，由歌星變笑星， 07年憑劇集《溏心風暴》淩波一角得《萬千星輝頒獎禮》「最佳男配角」獎，近年靠「福祿壽」出到位，造就他有機會重踏演唱會舞台。
|
鍾意就快D Share啦！
|
|
|
