上週六，蔡加讚與汪圓圓於灣仔會展擺喜酒。 2人上台發表愛的宣言時，加讚唔怕肉麻：「每次見到老婆都觸曬電。」圓圓亦回禮話：「同佢傾偈感覺好舒服，大家好似識咗好耐，今日好似發夢一樣。」講完肉麻情話後一齊進行切蛋糕儀式。
真面目
豪門夜宴 汪圓圓蔡加讚 7.5億世紀婚禮 甄子丹 9歲女超聲娛賓
「玩具大王」蔡志明的仔蔡加讚（ Karson），上週六（ 11月 30日），迎娶「宇宙最強」甄子丹姨仔汪圓圓，一對新人於灣仔會展豪擺 160圍，宴請城中政、商以及演藝名人，婚宴開支加埋蔡志明送贈的 6億古堡獨立屋，造就今年最矚目的 7.5億「世紀婚禮」。
「宇宙最強」姨仔出嫁，身為姐夫的甄子丹安排 9歲愛女 Jasmine（甄濟如）上台獻唱娛賓，高音準低音勁，加上巨肺腔一出，全場拍爛手掌。 Jasmine一鳴驚人，丹爺忍唔住讚自己係全世界最驕傲嘅爸爸之餘，仲將女兒的歌收錄成一隻迷你「 EP」送贈每位賓客。細細個已有明星風采的丹爺愛女，假以時日分分鐘搖身變明星，宇宙最強，變最強星爸！
「玩具大王」孻仔，現年 27歲的蔡加讚（ Karson），跟同齡的汪圓圓（ Irene）拍拖兩年多，上週終於拉埋天窗， 2人先於上週四（ 11月 28日）在上水雙魚河馬會會所舉行戶外註冊儀式，至上週六（ 30日）便舉行超豪婚宴，宴請超過 3千位城中富商名人，就連特首梁振英亦係座上客。
咀足 15秒
話明「世紀婚禮」，於會展舉行的「蔡汪聯婚」單是酒席，便花了 600萬，城中政客及名人，好似特首梁振英、唐英年、劉鑾雄、朱玲玲、熊黛林及郭富城等個個畀面出席。
蔡加讚與汪圓圓一對新人，當然全程黐到實大曬恩愛， 2人上台致辭時，新郎除自爆對圓圓一見鍾情外，更向所有賓客發表愛的宣言：「多謝全世界最好老婆（圓圓），我會盡力去愛錫你，直到永遠。」之後，一對新人更應司儀要求在台上錫嘴 10秒，不過 2人「豪」畀賓客，咀足 15秒先停，甜蜜滿瀉。
一鳴驚人
當晚甄子丹同汪詩詩送上最大賀禮，就係派出 9歲愛女 Jasmine上台獻唱〈 From This Moment〉及 Adele名曲〈 Rolling In The Deep〉，雖然有歌星好似郭富城等喺台下睇住，但 Jasmine完全冇怯場，仲勁有台型。
丹爺女嫩版 Adele
一對新人甜蜜互咀已屬指定動作，一早預咗，但當晚婚禮最大驚喜必屬新娘汪圓圓姨甥女，即甄子丹 9歲愛女 Jasmine於婚宴尾段上台獻唱，她先唱〈 From This Moment〉，之後再唱出由 Karson作曲，圓圓填詞，代表一對新人愛情故事的〈 Touch By You〉，最勁是 Jasmine以巨肺腔唱出 Adele名曲〈 Rolling In the Deep〉，雖然 Jasmine只得 9歲，但聲線沉厚又夠氣，加上夠曬台型，贏得全場掌聲，為「蔡汪聯婚」的婚宴帶來高潮。 Jasmine威盡全場，身為老豆的甄子丹亦於微博自豪地話：「我是全世界最驕傲的爸爸！」
7.5億超豪婚禮點使？
美酒： 400萬
婚禮場地布置： 200萬
婚紗禮服： 500萬
新娘首飾金器： 8,000萬
160圍酒席： 600萬
勞斯萊斯花車： 600萬
化妝、髮型、攝影： 200萬
法國婚紗相： 600萬
兄弟姊妹服裝： 300萬
親友來回機票連酒店： 600萬
回禮禮品： 300萬
過大禮： 800萬
總統套房： 100萬
堡壘式新房（由蔡志明送）： 6億
新屋裝修及傢俬： 1,800萬
寃家路窄
「蔡汪聯婚」當晚，筵開 160席，邀請賓客 3,120人，由於蔡家人面廣，不少巨星、政客及富豪都畀面到賀，造就唔少過氣情侶碰面。好彩會場夠大，你睇我唔到，我睇你唔到。
黛林驚避城城
當晚郭富城同舊愛熊黛林自分手後首度同場出現，為免撞到正，據知由秘道入會場嘅城城等熊黛林走咗 15分鐘後先由後門走人。而熊黛林就同記者講：「冇，唔見佢（城城），坐得好遠。」之前就不斷追問相熟記者究竟城城幾時到咗，驚死撞正。
嘉欣冇望大劉
當晚大劉劉鑾雄同前度李嘉欣亦分別帶另一半到賀。好彩呢兩 pair唔係第一次同場，所以都冇乜理對方，望都費事。
豬狼互避
除緋聞情侶同場出現，上年參選行政長官選舉，上演「豬狼鬥」的梁振英同唐英年亦有到賀。梁振英先帶住老婆唐青儀同主人家打招呼，之後唐英年就拖住老婆郭妤淺向一對新人恭賀，盡量有咁遠避到咁遠。
|
鍾意就快D Share啦！
|
|
|