上月 22日，年僅 19歲的顏卓靈以影後候選人身份踏上台灣金馬獎紅地氈，據悉此行她亦見過華納唱片台灣高層進行試音。
真面目
試上癮 翻炒 Fiona 顏卓靈狂試音撈
廿歲未夠就入圍金馬獎，同章子怡、鄭秀文、舒淇、桂綸鎂爭影後獎，雖然結果同預期一樣都係陪跑，不過無可否認，顏卓靈位已上，未來大把世界！
13歲做𡃁模、 16歲成名、 19歲變電影圈新貴，攞唔到影後嘅顏卓靈原來最新目標係做歌後，近日頻頻港台兩地走面試各大唱片公司，歌喉係爭啲，不過淨係憑外形九成似，已經吸引環球、華納爭住打造翻版薛凱琪！
金馬 50年歷史，最年輕影後係 98年演出《天浴》、年僅 16歲嘅內地女星李小璐， 19歲顏卓靈雖然未算最嫩口，又最終輸了在章子怡手上，不過第一次擔正的《狂舞派》票房過千萬、更有得角逐影後，已經贏在聲勢。
歌喉麻麻
明知贏面細，顏卓靈都識謙虛論金馬：「有得入場睇、有得掂到張紅地氈，我已經好開心喇。我今次都係想睇劉青雲咋，因為我同媽咪都最鍾意佢，見到佢同太太（郭藹明）去到邊都十指緊扣，就知佢唔只係個好演員，仲係好男人添！」
據知情人士透露，其實顏卓靈此行唔只要行紅地氈，還獲經理人安排，偷偷與台灣華納高層見面兼試埋音，一圓做歌手夢想。
知情人士說：「佢喺香港已經上過環球同華納兩間唱片公司，不過歌喉實在麻麻哋，兩間都冇咗下文。佢真係好積極想撈埋歌星，仲去埋台灣華納試音。𠵱家未有結果，不過人哋見完佢真人，覺得佢真係好似薛凱琪，做得過㗎。 Fiona當年出道都成 24歲，顏卓靈廿歲唔夠，台灣唱片公司覺得唱功唔掂，但可以學 Fiona咁賣青春同氣質。」
19歲可愛
現年 19歲的顏卓靈，五年前因為麥當勞麥麥送廣告走紅時，已被指是翻版薛凱琪，五年後做歌手一樣要翻炒 Fiona當年 funny girl形象。
咁啱得咁蹺，週日（ 1日） Yahoo人氣頒獎典禮，薛凱琪同顏卓靈都有獎攞，不過 32歲 Fiona確實青春不再，正好俾顏卓靈有位攝。
32歲中熟
現年 32歲的薛凱琪， 18歲開始做𡃁模， 10年前憑其青春 funny形象加入歌壇，迅速成為歌影兩棲紅人。
薛凱琪出道時以可愛 ABC形象冧死唔少宅男，不過隨住年月增長，阿 Fi衣著品味亦漸見成熟。
最想唱歌
其實 09年未正式出道，顏卓靈已經在模特兒公司自我介紹短片中自爆最愛跳舞、做戲及唱歌，希望似偶像王菀之般贏在聲線獨特。
上週日（ 24日），從台灣回港的顏卓靈向記者承認，的確想做歌手，不過就否認此行去台灣有試音：「今次去台灣一去就試衫、去現場，第二日就返咗嚟，真係冇時間。但係之前的確有見過唱片公司，自己都諗過試嚇嘅，想做一個帶畀人正能量嘅歌手。我的確係同環球唱片傾緊合作，不過出道時都係想擺電影喺第一位，出年時間都排滿曬畀電影，大家真係要傾嚇個合作方式，點樣兼顧兩樣嘢囉！」而香港環球發言人譚先生則說：「有見過，未來一年環球亦計劃見好多新人，不過呢一刻顏卓靈 vocal未 ready，時間未配合到，未可以 confirm住。」
老翻前輩
顏卓靈翻炒薛凱琪成名路唔出奇，香港娛樂圈過往大把雷同個案，一個藝人、組合走紅，有賴唱片公司全力打造老翻，模擬成名路。
馬浚偉翻黎明
馬仔 93年參加歌唱比賽入行，因為單眼皮及官仔骨骨形象似足黎明，被打造成翻版黎明，可惜歌途不順，拍劇至有得發圍。
楊千嬅翻鄭秀文
一樣係新秀出身、樣同聲都有九成似，千嬅出道頭十年都被指形象歌路都炒前輩鄭秀文。
羅力威翻周傑倫
髮型、歌路仲有台風都似到十足，羅力威 09年參加《亞洲星光大道》即被指翻版周傑倫，雖然歌唱成就未有周董咁輝煌，但都俘虜不少本地師奶少女芳心。
|
鍾意就快D Share啦！
|
|
|