馮仁昭四圍超：夏蕙BB、朱主席鬥騎呢 - 馮仁昭
噚日年三十晚，黃夏蕙同走音主席朱壽仁兩位騎呢派各自發功，其中夏蕙BB以一身大戲裝束加個紅馬頭喺腰間，扮到成隻胭脂馬咁到黃大仙排隊等上頭炷香，單係打扮已經令人驚艷。夏蕙BB下晝5點到黃大仙排隊，成功霸到頭位。佢話每年都會去黃大仙上頭炷香，講到新年願望，佢話：「希望香港市民有樓住有工開。」驚唔驚再俾人逼甩假髮？有備而戰嘅夏蕙BB即fing嚇頭話：「點扯都唔甩。」其間有男女老幼見到佢都拉住合照留念，相當受歡迎。
■小朋友見到黃夏蕙呢身胭脂馬打扮，唔知有冇嚇親呢？
被途人狂鬧
朱主席噚日下晝就一身Checkers紅色格仔西裝踩入銅鑼灣鬧市拍賀年歌《和氣增才》MV，搵咗幾個𡃁模好似行catwalk咁邊行邊唱，其間朱主席又玩踢腿、又捉住途人問問題及拉住外國遊客合照，雖然騎呢舉動引嚟大批途人影相，但就唔見有人主動搵佢合照，明顯唔及夏蕙BB受歡迎。其間馮仁昭聽到有途人爆粗話：「真係戇X！」仲有人鬧：「真係好肉酸！」不過朱主席依然好享受，仲話MV落足本：「請咗前電視台排舞師排舞，使成幾十萬，遲啲會出CD！」
撰文：馮仁昭
■朱主席噚日喺銅鑼灣鬧市拍MV玩踢腿，差啲令人以為佢係街頭玩雜耍賣藝㖭！
|
鍾意就快D Share啦！
|
|
|