馬年娛圈十預測 安仔鄭秀文攞滿婚
黃芷晴日前應本報邀請到黃大仙祠為本港娛樂圈求籤，預測十個圈中熱話，順道為自己的家宅求平安，特別是早前媽咪梁潔華患病，令爹哋黃日華甚擔心，芷晴最希望一家三口健康平安。
■黃芷晴日前到黃大仙祠為圈中人求籤，順道祈求家宅平安。攝影：仇志德
事業方面，芷晴得玄學家宇君知贈言事業發展不俗。芷晴說：「佢叫我留長髮，工作上就容易遇到男性貴人，佢話我雖然有啲是非，都係因為發展唔錯而招人妒忌。」
採訪：朱小寶
■黃芷晴獲玄學家贈言，叫她留長髮助事業運。
許志安同鄭秀文生BB？【第15籤/上吉籤】
解說：「許志安同鄭秀文，情場跑盡終成婚，不過生B暫時未得，唔好心急。佢哋好恩愛，日日『月殿蟾宮任爾遊』，開開心心，幸福快樂，二人世界生活樂也悠悠，講到尾要珍惜對方。」
香港電視有冇人睇？【第63籤/中吉籤】
解說：「到時開台一定有人睇，一定成功！初時辛苦，日後成功，要有耐性。『復聖芳名萬古留』，留芳千世，大開眼界，個個都想睇。永遠有人記得呢個台。」
黎明今年有冇拖拍？【第35籤/中吉籤】
解說：「『古人唐僧取經』，雖然中吉籤，不過問姻緣，和尚邊有姻緣㗎？難啲！白骨精大把，好女仔未有，黎明係唐僧肉，個個想搵佢笨。」
《一代宗師》奧斯卡攞獎？
【第39籤/中吉籤】
解說：「『古人夷齊讓國』，呢個人一向都好有性格嘅，要圓滑啲就成功，呢個人好叻，但太主觀，『可憐餓倒首陽山』，即係太硬頸。」
G.E.M.喺《我是歌手2》摘冠？
【第4籤/中吉籤】
解說：「『古人董永遇仙』，董永窮家仔遇仙女，有乜變乜，如果G.E.M.係男仔就一定成功，女仔就未必，最多第二、三名，放鬆心情有機會成功。」
王菲同謝霆鋒復合？【第42籤/中吉籤】
解說：「『英雄難過美人關』，王菲靚女，會有少少成功，霆鋒會諗諗啦，但唔係百分百，大家情緒唔同，變化多啲，兩個係好朋友。」
亞視會迴光反照？【第96籤/中平籤】
解說：「『南來孤雁如憐我』，有貴人幫，向外發展更成功，要搵外來人幫至得，內地都算，其實仲更加好，阿爺關照嚇，唔會執笠。」
容祖兒劉浩龍結婚？【第51籤/中平籤】
解說：「兩個若然唔多嘴，唔好互相猜測，唔多爭拗就一定結得成婚。佢哋有機會結婚，不過講嘢低調啲，千祈唔好得罪對方。」
吳千語做林太？【第98籤/中平籤】
解說：「好多人妒忌，『古人管鮑分金』，兩個成日有少少意見，若唔多爭拗就會成功，唔好各執一見，為小事而拗就好易破裂。」
劉德華再做爸爸？【第46籤/下下籤】
解說：「『古人左慈戲曹操』，唔好捕風捉影，少少難啲，不過羊兒幫到佢，『奔忙身入萬羊中』，支籤羊年有機會，低調啲好啲。」
|
鍾意就快D Share啦！
|
|
|