秋生受辱（舌累）地扯火丟會章
演藝人協會（演協）昨早選新會長時爆發內訌！曾表示有意角逐的黃秋生，被現任秘書長陳芷菁指「唔係會員」，結果與郭少芸、呂慧儀等被拒門外，秋生指會章列明可以即時入會，但即使出埋扮頭暈瞓地，演協方面依舊門常關，而原定昨日選出新會長的會議最終宣告流會，不歡而散。秋生揚言若當選，難與芷菁合作，雙方看來有你無我。
秋生其後率眾上樓，十分鐘後折返，秋生透露：「唔畀我入去！」眾人再上樓嘗試，只見會址外貼有「是日會員大會，非會員禁內進」字句，秋生按鐘後有演協人士開門，但隨即閂門，秋生說：「你睇，都費事理你，好冇人情味！對同業幾冇禮貌、幾侮辱！好似神秘組織！」秋生愈說愈氣，一度欲將會章投進垃圾箱，他說：「話我唔係會員冇資格發表！咁我交番畀志偉，唔搞！搵我去組織，花咁多時間，搞成咁有乜意思？直情侮辱，企門口為乜？同業點解要搞到咁，呢個會究竟咩事？（同上屆理事傾唔掂？）話要審批喎！唔畀逗留。有人行過你門口嘔白泡，你都畀佢入去休息嚇啦！」說罷即扮頭暈瞓地：「畀我休息嚇啦，好嘛？寫咁多嘢（會章）話幫藝人！直情係騎劫行為，違法！我費事搞咋，如果唔係可以報警。」
有意另設新藝人組織
此時王祖藍步出會址，記者問他內裏情況，他面有難色說：「我問嚇先，都係正常程序。」秋生則搞笑地掹著祖藍影相，並說：「我唔選啦，唔排除開個新會，搵各大元老，成龍、志偉等支持。（頂唔順？）點頂呀？嘔白泡都唔畀入。（通知你但又唔畀入？）直情係留難我，根據會章可以即刻入會，好質疑有冇跟會章做囉，（同志偉反映？）唔關志偉事，係入面唔知邊個啫！唔搞啦，好似我好恨做咁，開個新會，重新來過，乾乾淨淨。」陳芷菁：係佢發脾氣
演協秘書長陳芷菁事後回應秋生指摘，她說：「協會一直有同佢溝通，選舉要申請做會員，要填表，批核要時間，雖然藝人熟口熟面，但每個人入會都要申請，TVB藝人要出示合約，批核可快可慢，秋生一轉頭同郭少芸上去話想入會，係佢發脾氣話冇跟會章做嘢。如果即刻入會即做候選人，會被人話黑箱作業，對其他候選人公平啲！（秋生稱唔係會員冇權發表？）昨晚秋生有同協會律師通電話，絕對唔係冇機會討論。（邊個通知秋生來？）唔知，我冇！」連累支持者 感抱歉
秋生昨晚重申：「根據會章，我可以即時交表即時入會，個會嘅律師都話合法，我問係咪跟會章？就刁難人要攞份合約出嚟，咁搞係冇事搞事，不如懷疑我係咪香港人啦！使唔使攞個良民證添呀？今日得一兩個喺裏面話事，律師話啱規矩，佢就話唔啱，超越法律！（心灰？）我唔會為弄權者而冇咗為演藝人謀福利嘅想法，我懷疑會章大定某一兩個人大？」秋生又為同吃閉門羮的藝人感抱歉，他說：「我哋個個都有嘢做，都忙o架，好得閒咩？咁侮辱性嘅不禮貌對待，我都好唔好意思，請咗班藝人朋友來到，被當乞兒咁嚟看待，我哋十幾廿個真係可以組織番個『醬油會』（語出「我是路過來打醬油的」，意指無謂閒人），我選唔選到唔緊要，又唔係受薪，就等佢哋解決咗啲內部矛盾先。（如果選到做會長，點協調新舊派通力合作？）我起初都叫芷菁留低，但依家唔好搞啦，佢合唔到人，處事不恰當，如果第時代表個會出去同其他單位、機構洽談，咁倨傲點傾？」文：影視組
|
鍾意就快D Share啦！
|
|
|