阿Sa唔識拖地 秋生教路
■阿Sa前晚喺西灣河拍拖地戲時顯得雞手鴨腳，原來曾經做過人妻嘅佢唔多識做家務。
【西灣河】近日同陳芷菁因為重選演藝人協會會長而爆罵戰嘅黃秋生，前日終於收火，佢喺facebook留言話同芷菁唔係十冤九仇，又話件事告一段落。收曬火嘅秋生，前晚就喺西灣河同阿Sa蔡卓妍拍攝新戲《大茶飯》，其間見秋生、阿Sa同工作人員有傾有講，秋生仲教阿Sa拖地拍戲，佢咁有耐性，好明顯已經冇事啦！
秋生掉煙頭
雖然阿Sa曾經為人妻，但唔知係咪平時好少做家務呢，前晚8點佢同秋生喺西灣河一間茶餐廳拍戲嗰陣就顯得雞手鴨腳，其中一場戲講阿Sa攞住地拖拖地，但佢拖地手勢做極都唔似，秋生於是忍唔住親自示範教佢點拖地，前前後後示範咗3次阿Sa先至明。而拍咗一陣，阿Sa已經好似好辛苦咁抹汗，睇嚟佢做家務真係好唔掂！
■秋生見阿Sa連拖地都唔識，於是親自示範。
■前晚新戲《大茶飯》外景，講秋生閂舖後搭住阿Sa離開，聽聞佢哋有感情戲。
至於秋生前晚心情都唔錯，佢教阿Sa拖地之餘，亦同其他工作人員有傾有講。拍拍嚇秋生肚餓，工作人員於是帶佢喺隔籬一間本來閂咗門嘅麵包舖攞麵包醫肚。其實開工期間秋生不時煙癮發作煲煙，但見佢食完煙之後就咁將煙頭掉落地下，真係冇乜公德心囉！
另外，黃又南前晚亦有份拍新戲，但就只係拍佢捧住一大筒珍寶珠喺茶餐廳外邊行嚟行去同𥄫嚟𥄫去嘅鏡頭。
採訪、攝影：吳耀輝
■秋生煲煙後將煙頭掉落地，有欠公德心。
■秋生將手機放番喺女助手孭住嘅包包，但呢個近pat pat位置似乎有啲敏感。
■黃又南捧住筒珍寶珠行嚟行去。
|
鍾意就快D Share啦！
|
|
|