頭號目標
52歲嘅劉華，有民間特首之稱，所到之處，都係歡呼聲同尖叫聲，絕對唔會有人掉隻「路姆西」過去。依家女都有埋，穩重愛家形象更係深入民心，夠曬分做演協會長。
媽咪姐
秋生芷菁玩嘢退選 志偉局劉華做演協會長
人多好辦事，但每個人各持己見而又唔識得互相尊重嘅話，就只會壞事！好似演藝人協會風波咁，被前任會長曾志偉推舉做新會長嘅黃秋生，喺關鍵時候竟然因為並非會員，而遭秘書長陳芷菁拒諸門外。最終演變成兩幫人角力，搞到流選。
無論如何，新一屆演協委員一定要喺呢個月誕生，一班會員亦準備周五（ 14日）喺觀塘演協會址投票。不過曾經喺演協外碌地沙、狂寸芷菁唔夠班嘅秋生，竟然自動棄權退選。佢解釋：「唔搞喇！我怕呢啲無謂嘅是非。佢（志偉）冇挽留我，我真係無能為力。」秋生唔玩，曾經發晦氣話辭職唔撈嘅芷菁自然被睇高一線，事關佢深得一班保守派會員歡心，擸到足夠票數上任絕對唔難。不過佢同媽咪姐講：「我認為自己未夠資格，即使有人提名我，都絕對唔會做會長。其實就算選到都要問當事人意願，當事人唔肯做就要選過。」
嘩，玩嘢咩！兩熱門都臨時退選？查實做演協會長最緊要有號召力，一呼要百應。據知肥媽眼見家陣演協內訌，想趁亂上任，務求用龐大嘅身軀同嚇死人嘅聲量，盛載呢鑊粥。不過前朝就有人覺得肥媽始終欠啲巨星風範，於是志偉就不停遊說劉華上陣。劉華有特首華之稱，民心贏曬，但佢工作頻繁，再抽身做呢份工似乎又真係有難度。睇嚟今次演協風波仲有排搞嘞！
|
鍾意就快D Share啦！
|
|
|