外表斯文的曾航生，估不到會鬱手打女人。
探熱針
暴愛 20年俾曾航生打 梁安琪：再講好肉酸！
近年致力搞網上電視的梁安琪，跟 90年代歌手曾航生，拍拖長達 20年。半年前，梁安琪將曾航生趕離同居的大尾篤村屋，對方的私人物品，更丟得一乾二淨。據知，多年來事業不如意的曾航生，性格愈來愈火爆，多次與女友吵鬧後動粗，最終令梁安琪忍無可忍斬纜。
提到被打分手，梁安琪有點激動：「佢嘅嘢我唔會回應，作為女性，再講呢啲事好肉酸，同佢再見不是朋友，絕對唔會復合！」
撞埋衣櫃
曾擔任東區區議員的梁安琪，一二年以獨立人士身份參選立法會落敗，當時曾航生已經放聲氣，會與從政的梁安琪分手。但實情是分手好快又復合，並一直同居在大埔大尾篤村屋。去年，梁安琪自資開設的 ALCTV大搞 Rock Music Show，當時曾航生仍跟出跟入，陪梁安琪錄影節目。
直到去年八月，因為曾航生與一名內地女子聯絡而與梁安琪起爭執，在兩人的大埔愛巢中，男方火遮眼，出手將梁安琪推倒飛埋衣櫃。
「 Angel（梁安琪）外表好似好強，其實佢對住阿 Sam（曾航生）就會變得好鵪鶉，但佢兩個性格好唔同，阿 Sam乜都懶懶閒， Angel就好積極進取，加上近年阿 Sam經常返內地， Angel都 feel到佢同第二啲女仔有來往。」知情者說。
自己養自己
拍拖以來，梁安琪由日常生活，到資助曾航生再出碟開演唱會，多多錢，照俾。
「阿 Sam出 HiFi碟， Angel都有投資，但做乜都無起色，阿 Sam心情愈嚟愈差，情緒好暴躁，小小事就鬧交，阿 Sam鬱手打 Angel唔係第一次！始終一齊咁多年， Angel好多時都忍，但嗰次佢撞到手腳都瘀曬，個心仲傷，先決定分手！」
二十年情玩完，梁安琪已搵到第二春，現與一年紀相若男士同居大埔；至於曾航生，人財兩失，被迫復出返無綫拍劇自己養自己，早前便在新劇《新抱喜相逢》中，拍住呂珊做綠葉！「咁多年嚟，阿 Sam只係鍾意音樂，但又冇唱片公司願幫佢出碟，唯有自資做，佢間中都有客串嚇拍無綫劇，但同 Angel分手要靠自己，呢排佢同無綫傾緊簽經理人約！」
舊愛搵北姑
本刊向梁安琪求證被曾航生動粗一事，她反應極大：「 No please，都分咗咁耐，唔講呢啲嘢！（同佢仲有無聯絡？）斬釘截鐵講，再見不是朋友，分咗之後無接觸過，無見過，絕對唔會復合，一定唔會！」
提到曾航生性格暴躁，梁安琪開始激動：「分開咗，對呢個人性格唔想作出批評，完全唔想講呢個人嘅嘢！（近年係咪經常嗌交？）都唔係近年啦！（係咪因為佢打你，先咁決絕分手？）我唔回應嘞，君子相分不出惡言，我唔講呢個人所有嘢，過去嘅我全部會忘記，作為女人，再講呢啲事都好肉酸啦！（有冇聽過阿 Sam想簽無綫經理人約？）我唔會留意我唔關心嘅人，我對佢任何事情都唔會表態！」
前度向外放聲氣已回復單身，梁安琪說話落地有骨：「嚇，放聲氣做乜？搵北姑呀！總之分開之後，我好開心！我有啲 fans都話，如果係我一早飛咗佢，既然唔 work嘅，勉強無幸福，做女人，我都想有人呵護，有人錫，唔係話佢無幫我，佢都有助選，同派單張！我相信更好嘅響前面！」
訪問全程，梁安琪拒絕再提曾航生名字，只係用「嗰個人」形容前度。分手各走各路，花去二十年時間，換回做女人應有尊嚴。
孽戀 20年
曾活躍於 90年代樂壇的曾航生， 93年因工作關係認識做 DJ的梁安琪，二人相戀 20年，其間因女友從政，雙方因意見分歧一度分手。
梁安琪
77年出道，先後加入港台和商台，曾主持《搖擺天使》等音樂節目成名。 90年晉升為新城 104FM Selest台長；之後由電台人轉型政治工作者，投身民主黨、自由黨，並參選過兩次立法會，直至 11年加入 DBC數碼電台主持時事評論節目；但多年來從未有放棄音樂工作。 09年投資 ALCTV網上電視，並創辦了「搖擺天使勁 Band音樂節」，致力推行 Band Sound。
曾航生
90年代香港歌手，出身於無綫省港杯歌唱比賽，曾簽約華納唱片，出過多張唱片，其中憑《再見亦是朋友》一曲獲白金唱片銷量，往後未再有代表作，只能靠女友梁安琪泵水，才有機會出碟開騷。 12年，曾航生回巢無綫，客串拍電視劇，近期在賀歲劇《新抱喜相逢》中有份做配角。
暴力男
君子動口不動手，可惜近年圈中出現唔少暴力男，愛向女友鬱手鬱腳，賠上愛情兼事業。
崔建邦
09年，中巴混血女友鄺敏慧提出分手，崔建邦恐對方公開關係，要求女方刪除電話中的情話短訊和親密照，其間出手打鄺敏慧，令對方頸、手及腳部多處受傷，事後鄺敏慧報警並到醫院驗傷，最終崔建邦被判社會服務令及守行為一年，停工長達五個月，事業陷入穀底。
|
鍾意就快D Share啦！
|
|
|