回首商台的九年半，最後落難被解僱，李慧玲仍然安慰：「我覺得自己打過一場美好的仗，我好享受呢個過程，亦都覺得係好有意思嘅一份工作，成果亦好欣慰。我意想不到，有咁多朋友當日去商台支援我。」
（黃雲慶攝）
壹號頭條
以為商台不跪低 李慧玲：我太天真
上週三晚上，氣溫驟降至只有攝氏七點三度，逾百人在商台門外點起燭光，抗議商台即日解僱資深傳媒人李慧玲。人為製造的心寒卻比冰冷的天氣更恐怖，商台粗暴地派人即時清理李的辦公室，總經理陳靜嫻還假惺惺地希望公眾體諒，這一幕叫港人難以接受，這是一間利用港人大氣電波的公共機構。
李慧玲翌日開記者會疾呼特首梁振英的政治打壓。
其實，她跟梁振英曾經關係良好，梁振英擔任行政會議成員召集人時，還讚賞她對曾蔭權政府批評得好，「甚至覺得批評唔夠添。」後來李慧玲用同樣的耳目監察競逐特首的候選人，備受西九醜聞困擾的梁振英，對李慧玲的態度出現一百八十度轉變：
「對於尋晚節目度咁樣問我，我嘅競選辦好唔高興。」
梁振英的變臉不只對李慧玲，由他○三年前提出將商台續牌由十二年
縮短至三年，上任後就《信報》練乙錚一篇批評他的文章罕有地發出律師信。
偏聽的梁，只接受附和、順耳的聲音，逆他者就要被滅聲了。
李慧玲曾以為商台不會因續牌問題向梁振英「跪低」，今天她承認是她太天真了。
李慧玲上週六接受本刊訪問的地點，由中環的咖啡室轉到她的將軍澳寓所，她稱：「樓下有記者守候，我唔想被佢哋跟住。」在傳媒打滾多年的人，自身變成新聞人物後，同樣不知所措。主持節目時如何硬朗的女人，面對龐大的政治機器，也感到疲累了。
她在記者會指「百分百覺得這次事件是梁振英政府對新聞自由、對言論自由的打壓」，又稱「商台在續牌魔咒下跪低」，外間紛紛要求她拿出證據。要了解李慧玲跟梁振英的關係，就由他們八十年代相識說起，她八六年入行加入《明報》當記者，當時梁振英在仲量行任合夥人，八八年擔任基本法諮詢委員會秘書長。
○一年一篇《蘋果日報》專欄文章中，李慧玲談及今天打壓新聞自由的人，「梁振英獲委做行政會議召集人之後，我曾經單人匹馬跑上他的辦公室做訪問……跟梁振英做訪問實在要有無比耐心，跟他聊天可暢快一百倍……如果你可以放下做新聞的包袱，聽他用那把沉厚的嗓子鑑今辨古，他講故事實在動聽。」
十三年後被迫離開商台，李慧玲重整跟梁振英的關係，「其實特首跑馬仔選舉前，我認為我同佢嘅關係相對 OK，點解呢？因為作為一個傳媒嘅時事評論人，我係監察政府，對於過去幾年，我對曾蔭權、唐英年嘅監察，佢哋係我嘅焦點……梁振英會好認同我喺電台嘅批評，好正面啦對於我嘅批評，甚至覺得批評唔夠，好多時交流時佢仲加多兩錢肉緊添，真係唔掂呀，真係要咁批評。」
CY不高興被批評
「當佢（梁振英）成為一個參選人，我個矛頭就一定批評埋佢，以前只係集中唐唐，咁我對佢一樣咁嚴厲。佢係有不滿的，其中一個深刻的例子，就係講佢西九利益衝突，我同佢有電話 phone in，後來，我搵佢，佢覆我電話，佢話：『李慧玲，對於尋晚你喺節目度咁樣問我，我嘅競選辦好唔高興。』佢唔係話自己喎，佢話我嘅競選辦，表示佢都有不滿。我話我批評唐唐仲嚴厲。」
這次事件後，她跟梁振英的關係轉淡，「佢應承過我，宣布參選後，第一個會上《左右大局》接受訪問，不過選舉完咗佢當選，佢都未上過嚟。」梁振英一二年七月一日正式成為第四屆特首，李慧玲同日坐正《在晴朗的一天出發》主持人。梁振英選擇接受黃永及陳志雲、新聞及公共事務部總監陳淑薇的訪問。
梁振英「失蹤」，新任局長就分批接受《晴朗》專訪，環境局局長黃錦星七月受訪時，被李慧玲問到語塞，「我真係以為，利潤管制百分之九點九九，呢啲係 ABC，局長無理由唔知，我冇心裝你……我覺得我哋履行監察嘅責任，但事後全都成為我嘅罪狀啦。」但她並非逢局長必插，「有啲係唔錯，例如（食物及衞生局長）高永文，好勇於出嚟面對，（運輸及房屋局長）張炳良都 OK。」
然而，梁振英已視她為眼中釘，「你問嚇開早禱會啲人，佢提過我幾多次呢，佢好不滿話，有個李慧玲，由朝早開始就批佢，所以有高官同我講，全香港佢最憎就係你……亦有好多梁粉有表達，可唔可以唔好 chur到個政府咁盡呢？」
新聞自由急速萎縮
看似得勢不饒人，但其實李慧玲心水很清，「唐英年嗰單僭建官司，而家連唐太都審完，但梁振英單官司冇曬尾，咁我哋去追有咩唔啱，你叫我哋唔好 chur，但你啲嘢又未解決，即係佢好希望有失憶嘅傳媒。」李慧玲偏偏要為高官失當行為「計時」，例如：梁振英僭建第×日，她知道這是對方的死穴，「當年董建華喺禮賓府請大班食飯，佢（梁振英）好唔滿意，佢認為點解要請一個經常批評你嘅人食飯呢，咁反映到佢唔係一個包容嘅人，而係你一講唔啱聽嘅說話，就要打壓你。」
李慧玲曾見證政府最開放的年代，「可能肥彭（末代港督彭定康）藝高人膽大，好樂於見傳媒，所有官員願意接受記者採訪， On record採訪， Off record私下交流。」到了董建華成為第一任特首，她認為「董生係不善於同新聞界溝通，佢俾人感覺係一個老好人，既然不善於，於是佢就好怯喇，愈來愈唔做，於是更差，冇事變有事，小事變大事。」；「煲呔面色出曬，佢係唔鍾意，但唔會有行動，佢知呢個係傳媒角色」；「梁振英直情係胸襟的問題，佢唔可以接受到批評的意見，於是傳媒的天職係監察的話，咁對佢嚟講已經有原罪。」
梁振英上週四回應李慧玲被解僱事件時，聲稱沒有向任何人提及任何關於李慧玲在商台的職位，又重申特首及特區政府尊重致力維護新聞自由。李慧玲氣沖沖反駁：「佢話佢同政府都係支持新聞自由、言論自由之類，真係對唔住，我覺得以前唔係，而家唔係，所以我好擔心將來。」
四十八歲的一課
李慧玲○四年六月一日加入商台開咪，正好接大班火棒。十年人事，商討續牌、名嘴被炒的歷史重演，難道跑了江湖多時的人也看不透？「我承認，我係有啲天真，最初八年，完全百分百自由，公司冇俾任何幹預我，後來有啲唔同。我一路啲疑問係點解係政治打壓，因為李慧玲都係嗰個李慧玲，節目風格都係咁，如果你話呢種節目風格影響廣告、影響收聽率，其實呢啲嘢八年嚟已經影響咗，唔會而家先影響。」
「去年初曾經有人問，商台十年魔咒，你會否擔心步大班後塵被人封咪，我覺得我係唔會，點解？因為我係一個好單純嘅新聞工作者……大班冇我咁單純，情況複雜啲，我係咪冇咁容易被人入到呢？咁依家睇番，我當然比較天真。」
梁倡縮短商台續牌
天真的不只李慧玲，還有一大群相信梁振英的人。○三年商台續牌時，梁振英已經虎視眈眈。不過，此事直至一二年才真相大白。一二年三月特首選舉論壇時，唐英年大爆○三年任工商及科技局局長的經歷，指梁振英曾向行政會議提出將商台續牌年期縮減至三年，「當年政府續商台牌時，你提出過縮短商台嘅牌照時間，用行政手段打擊言論自由，呢啲手法係好可怕，你叫市民點相信你呢？」
唐揭發梁的陰謀後，當年擔任商台營運總裁的蔡東豪，也披露了○三年商台續牌內幕。他指當年從商台主席何佐芝及副主席俞琤口中，得知梁振英不滿《風波裡的茶杯》主持人鄭經翰的言論，因而阻撓續牌，「如果佢（梁）回應係抹黑，就係錯，呢件事千真萬確發生過。」政府○三年七月宣布商台續牌十二年，轉眼間，牌照一六年屆滿之期快到了，今年八月須申請續牌，李慧玲口中「商台在續牌魔咒下跪低」，似乎重演了。
暗促旅遊界抽廣告
梁振英上場後，對傳媒採取強硬手腕，去年二月他就《信報》練乙錚一篇指他涉黑的文章，向該報發律師信，是首次有特首向報館採取法律行動。接著八月《信報》新老總郭艷明上場後，因抽起一篇關於無綫有偏頗報導的文章，評論時事的「獨眼香江」版的四名編採人員不滿辭職。最近金融界的錢志健被編輯提醒他在專欄只談投資，不談佔領中環。
今年一月陸續發生傳媒受壓事件，《明報》宣布撤換總編輯，劉進圖被調職網絡開發工作，馬來西亞的鍾天祥三月一日出任首席執行總編輯，預計十月總編輯張健波退休後，由鍾天祥接任。《 am730》社長施永青及壹傳媒集團主席黎智英，公開表示遭中資機構及銀行抽廣告，施更懷疑涉及政治原因。除了銀行界，黑手也伸向旅遊界。據了解，梁振英曾在旅遊界聚會中討論傳媒議題，雖無明言「抽廣告」，但要求業界人士不要支持針對政府的媒體。
在河蟹的一天出發
陳志雲上場後的《在晴朗的一天出發》，節目風格變得「和諧」。不諳政治的陳志雲經常不著邊際，容許受訪者長篇大論發表意見。本刊發現，去年十二月二十三日，基本法委員會成員譚惠珠花了五分鐘，講述每次參與起草基本法時的會議，作為反對一七年特首選舉公民提名候選人的理據，後來譚自覺發言冗長，「我跳一跳，唔阻你咁多時候。」陳志雲仍鼓勵她繼續發言：「唔緊要，你慢慢嚟。」
「以前李慧玲喺度，有啲阿婆打嚟講電話費單收多咗錢，我哋未必會喺節目內跟進，但李小姐會叫我哋幫阿婆問嚇電話公司，話我哋個節目係要幫小市民……但接到呢類阿婆投訴漏水嘅電話時，陳志雲聽完就算，佢最關心係約到啲咩人上嚟，最鍾意就係啲嘉賓吸引到傳媒嚟採訪。」
商台憂李佔領搶咪
李慧玲被粗暴解僱後，商台形象大插水。據悉，陳志雲本週一約見不同組別員工解釋事件，「佢擔心有風險，例如李慧玲佔領商台，衝入直播室搶咪。」多個親建制媒體將事件定性為何驥不滿李慧玲批評陳志雲、不出席新春團拜、批評商台影響廣告等，成為導火線，從而淡化梁振英政府的政治施壓。
The Bees廣告集團行政總裁曾錦強認為大量新媒體湧現，才是電台廣告收入減少的真兇，「以前落電台（廣告）主要係因為價錢平，可以落到好多粒 spot（播放次數）。但係而家我就算買一啲電視媒體，因為有收費電視、戶外電視，所以每粒 spot都好平，以同樣預算，喺電視上都可以買到好多 exposure（曝光），所以落電台嘅客戶數目同金額都有下跌。」
李慧玲離開商台，曾錦強認為不會增加或減少廣告，「真正影響要問番電台先知影響大唔大，我諗電台每個節目主持人都有唔同嘅風格，一個電台成功失敗唔會維繫喺一個電台節目主持人嗰度嘅。」商台「淨化」後，廣告量不會突然飆升，「除非真係如傳聞所言，有啲廣告商真係因為佢（李慧玲）而杯葛啦，如果無嘅話，以我咁多年嘅廣告經驗，有政治立場嘅廣告商唔多， 10%都無嘅。係一啲中資嘅廣告商比較敏感，但係佢哋都唔係喺廣告市場入面好主要嘅廣告商嚟嘅。」
|
鍾意就快D Share啦！
|
|
|