豪語錄
重新上市 羅霖
眼前的羅霖皮膚白滑，葫蘆身材，怎看都不似四十有八，更遑論生了三個小孩，加上她剛跟富商劉坤銘結束十八年婚姻，掛住個「前闊太」銜頭，樣靚身材正的羅霖，跟三十歲的關楚耀拍床戲，未睇已令一眾宅男嘩嘩聲。
「朋友都話支持我要買飛入場，睇我另一面，我話唔使客氣。」令她尷尬的豈止朋友，還有街上的男性路人甲乙，「去街有好多男士望我，我好驚囉，佢哋不是猥瑣，但眼光由頭望到落腳。」
不過，做過空姐，習慣忍氣吞聲服務至上的羅霖，深明食得鹹魚抵得渴的金科玉律，「呢個年紀離婚，再出嚟做嘢，還有機會嗎？如果想在娛樂圈發展，唔通一味只演大小姐、乖乖女咩？」
又真喎，離婚前就話要相夫教子克己盡任，而家大仔都十七歲，趁還有幾分姿色還不豁出去盡地一鋪？
情況就如另一個單親媽媽，又叫羅琳，寫了《哈利波特》十幾年，由細路仔寫到結婚生仔，去年忽然轉寫血腥的犯罪小說，由此得知，有血有肉比老少咸宜更有新鮮感。
睇我演技
羅霖畢竟不是十八廿二，怎會不知自己的賣點，但只要不太過火，她還是會盡力配合，就如記者為她準備幾套吊帶裙，縱然她認為太性感，心裡不太舒服，她還是笑住穿上。其中一條裙更令她「波濤胸湧」，羅霖沒有黑面，繼續笑咪咪地說︰「會不會露得太勁？如果相片效果不好，改穿另一條，好嗎？」
正如她話齋，「你搵得我，即係你信我可以，咁我盡力去做。」
當然，羅霖話陶傑第一次找她在《愛•尋•迷》扮離婚闊太，講了要有幾場肉搏戲，她沒有即時首肯，「我聽完陶生講完，就『哦』咗一聲，話不太適合，要返去再諗。一次過要熒幕初吻同連場激戰，我是基督教徒，個心唔係好平安，所以返家後就向天禱告。」
一個月後，陶傑再找她，今次羅霖被打動，「你知佢把口幾叻，講到幾精彩，才子拍戲喎，應該可以拍到荷李活咁激情又有美感，仲要有內容。」說她犧牲色相，似乎太沉重，羅霖是珍惜每次機會。
回到家，她第一時間問母親意見，「媽咪好支持我，說我又不是太太身份，做咩都得。然後我跟三個仔講我會有錫錫同親熱鏡頭，大仔就話『唏，我哋睇啲西片都係咁。』十五歲的二仔就問我片酬 OK嗎？八歲細仔就反問我，『做戲啫，不是真的？』」
羅霖話，電影上映期愈來愈近，壓力便愈來愈大，起初是怕兒子尷尬，但時下年輕人，什麼事都可以上網人肉搜尋，「佢哋一早上 YouTube搵料睇 trailer，係佢哋自己 check嘅，然後先叫我睇，哈哈。兩個大仔無反應，係細仔再問我：『 Kelvin（關楚耀）真係不是男朋友？』」
過了三個兒子那關，但隨之而來的報導，講她是不倒胸、重口味，反而令她心裡不舒服，「電影有三對主角，但宣傳集中在我呢邊，我有少少擔心。我知話我保養得好是讚美，十八、九歲初出道就話要樣靚身材正啫，但都呢個年紀，梗係希望你睇我演技，網民講啲嘢，令我好有壓力。」
她不滿意電影只局部宣傳她的身材，但肉隨砧板上，自知投訴是多餘。「之前有張海報，叫陶生唔好出，點知又出咗，所有人睇過試片，佢又唔叫我去睇。」
她嘆了口氣，很快又回過神來。「我唔後悔，都做咗啦，唯有繼續向前行。」
從無附屬卡
我直接問：「跟以前做阿太的生活差天共地嗎？」她聽罷，以九秒九回答︰「我不嬲係藝人，我唔係乜嘢闊太，真係誤解，婚後我一直有接工作，而且我唔慣過太太的生活，小朋友放學都下午三點，又興趣班又午餐媽媽會，忙到不得了，根本無時間 high tea。」
但以前家住半山，出入有車有司機，現在你要搬回深井娘家，去邊都要搭的士喎？「有乜唔妥？搭的士好好喎，又唔係坐巴士，我當空姐時都是坐的士啦。有時去活動要穿晚裝戴珠寶，可以租 van。你知唔知我每個月的士費有成一萬多元，我已經覺得很奢侈。
「其他人好奇怪我咁坦白，我份人直腸直肚，不須要扮嘢。如果一開始講大話，之後要用十個大話去掩飾，我好怕被人篤穿。
「我唔係千金小姐出身，更加不是享受型，我是隻牛，乜都做到。以前又不是有十個工人服侍我，小朋友都是我一手一腳照顧，又餵奶又換尿片，工人只係負責洗衫煮飯同打掃。
「至於消費，基本上跟未離婚前一樣。其實由空姐時我已開始出入名店，不過我不是大豪客，揀的都是襟興的款，十年前的 Chanel、 Hermes，七年前的皮草大褸我都照著照用，況且現在好多衫都可以找贊助嘛。坦白講，以前我一直都無一張附屬卡，我的信用卡是當空姐時申請到現在。」
我半信半疑問，當初選完亞姐，很快便跟當時被喻為劉公子的劉坤銘拍拖，點都有點虛榮想嫁入豪門啩？「唔係喎，佢有幾多我知喎，當初仲有幾個有錢人追我，但我不嬲追求愛情，如果只為錢，我唔會嫁俾佢。」她帶點不屑說。
被傳鬼上身
羅霖說，離婚後的境況又不是咁差，除了拍戲，還有其他瓣數，美容廣告代言人，當司儀、出席大大小小的時裝、美容產品活動、返國內當剪綵嘉賓、甚至教名店的 VIP儀態打扮，真是山大斬埋有柴。
「我慶幸仲可以推工作，還有少少 bargaining power，如果價錢唔啱可以唔做。早前國內找我拍劇，價錢唔錯，但一飛便要三個月，晉晉（細仔）得八歲，要人睇功課，小朋友的童年要有媽咪在身邊傾偈、關心才會好。」
提到小朋友，羅霖不禁悲從中來，「其實婚姻關係早已破裂，但三個仔還細，不想影響他們。離婚真係迫不得已的決定。我見過破碎家庭長大的小朋友，心理會有問題，或者有抑鬱，我好驚我啲仔係咁。
「我好傳統，自小就聽媽咪教，女人係要忍，忍忍嚇就過一世。咁多年我都唔鍾意喺細路面前嘈，通常我都是閂埋門，或者一嘈就行開，但某人好大聲，嘈到連小朋友都知道，有時都嚇親佢哋。
「每個人都有底線，我只有兩個，第一個是第三者，但我哋雙方都無。」另一底線是否傳聞中的家暴？羅霖不置可否，冷笑幾聲，「只要你無過我的底線，我點忍都可以。
「試過在分居期間想挽回，但有人講咗帶有恐嚇性的話，又傳我鬼上身，歷時半年，我為證明清白，去睇基督教驅鬼心理醫生，否則啲細路會驚見我。」
羅霖未當太太前，做過七年空姐升至 Chef Purser，九一年以廿四歲「高齡」當亞姐冠軍，後來跟劉坤銘拍拖五年才能嫁入豪門。外間一直指她夫家有水，身為長子的老公掌舵本地共十間酒樓，又搞過必備通訊，不過九七金融風暴，令他損手爛腳，羅霖亦開始重回娛樂圈。後來老公轉戰新加坡及上海，羅霖亦嫁雞隨雞。
共富貴又共過患難，如今要為離婚對簿公堂，羅霖百般滋味在心頭：「我唔會去狡辯，時間證明一切，邊個做了什麼行動，律師都記錄在案，我唔想三個仔企任何一邊，幫邊個佢哋都 suffer，將來佢哋想睇，我會攞出來。」
忍了十八年，羅霖說今後不會再俾人蝦。
|
鍾意就快D Share啦！
|
|
|