[壹週刊 1250] 快打慢 易請難送 公主王菀之 緊箍 figure王 王菀之,M1,

男友從後熊抱， Ivana一副冧樣，笑到眼都唔見埋。

探熱針

快打慢　易請難送　公主王菀之　緊箍 figure王

三十四歲盛女王菀之，在《金雞 SSS》中飾演豪放小雞「吳璐」人人讚，事業有新突破，感情生活同樣報捷！去年尾，成功在杜如風手上搶人，同「 figure王」 Eric So（蘇動）撻著。

拍拖唔夠三個月，進取型的 Ivana已大模廝樣搬到男友位於九龍城的寓所，展開同居生活。為箍實男友， Ivana實行港女格式，要對方隨傳隨到，定時報到。

鵲巢鳩佔逐步嚟

情人節當日，王菀之與 Eric So拍拖行超市，二人一路行，一路攬到實一實。

人不可貌相，嗲更加唔係靚女專利！嗲功出色的王菀之，合作過的監製、填詞人例如 Alex Fung、梁柏堅等，一律被她冧到暈陀陀。

撻著 Eric So後，明知男友溝女戰績彪炳，王菀之決定人釘人，免得有對手泊入私人碼頭。

數月前，王菀之不理父母反對，開始鵲巢鳩佔，氹掂 Eric讓她搬入對方位於九龍城「松林」寓所同居。

「拍拖冇耐， Ivana已經成日留喺 Eric屋企過夜，之後就慢慢逐啲逐啲行李搬入去； Eric見唔對路，不時借意搵藉口話約咗人返屋企傾嘢，叫 Ivana返屋企瞓，但次次佢都發曬爛渣。其實 Ivana屋企人都唔鍾意佢咁做。」知情者說。

行行嚇， Eric突然成個人挨住 Ivana，好冧功。

從後冧之

男友出冧招， Ivana拍拍對方塊面回禮。

唔報到發脾氣

拍拖百分百投入的王菀之，除了工作，其餘時間，全部預留「瘟仔」。

被女友盯到實一實，零自由的 Eric開始有怨言，同身邊朋友呻王菀之太黐身。

「 Ivana係屋企麼女，一向都有嚴重公主病，所有人要就曬佢，男朋友更加零一。無論任何時候都要接電話，去到邊都要向佢報到， Eric有時忙冇覆電話， Ivana就發曬脾氣。 Eric有同身邊啲朋友話同佢一齊冇曬私人時間，不過 Ivana次次發完脾氣，又嗲番 Eric，總之願捱願打。」

二人買入大量火鍋配料，準備返歸烚嚇烚嚇，其間又繑手又勾手指尾，非常癡纏。

情人節烚烚嚇

情人節當晚七點，王菀之與 Eric So同車返回九龍城「松林」，十分鐘後，戴住口罩著黑色羽絨包到冚的她與男友再出動，到新蒲崗 Mikiki商場內的一田超市入貨買火鍋料，湯底、牛肉、餃子、飲品乜都執啲。在超市內二人毫不避忌， Eric將頭挨落女友膊頭，王菀之即時輕撫對方面頰俾反應；行行嚇 Eric忽然從後熊抱女友，全程旁若無人。

在超市邊買邊耍花槍半粒鐘，二人拎住大袋火鍋配料，冒住寒風加毛毛雨，十指緊扣行番屋企，烚嚇烚嚇過情人節。

平日表面斯斯文文的王菀之，在《金雞 sss》中豁出去曬胸演出，連吳君如都激讚她演得夠放有潛質。

Ivana同男友行完超市，冒住寒風由新蒲崗十指緊扣行返去九龍城寓所。

男友出名多桃花，所以拍拖唔夠三個月， Ivana便搬入對方位於九龍城「松林」寓所。

上週六（ 15日），王菀之出席活動時稱情人節當日與男友玩煮飯仔：「我哋仲去咗行街，行咗幾個鐘都唔捨得走。」

去年，王菀之曾與填詞人梁柏堅（箭嘴）撻著，但對方同時搭上公民黨副主席陳淑莊， Ivana於是提出分手。

小富婆

生於中產家庭的王菀之，父親是陽明山莊旗下行政人員，母親是衞生署護士長，胞兄做生意，自小在溫室成長的她，完全沒有家庭壓力。

六歲便考畢八級鋼琴的王菀之，出道唱歌也只賺錢買花戴。近年，王菀之將「買花錢」轉移投資磚頭， 11年以 750萬買入「峻弦」單位外，去年再豪擲 2,000萬，購入尚匯單位。三十出頭，有兩物業揸手，小富婆真係唔使憂。

食家

著名 figure設計師 Eric So（蘇動）憑一套李小龍公仔，被日本一間玩具廠睇中買下全部版權而成為香港 figure王，與圈中人關係密切的他身邊不乏異性，女朋友更不乏圈中名氣女星，好識食。

蒙嘉慧

95年，剛入行的蒙嘉慧兼職做模特兒時認識了五呎十一吋的 Eric So，有指 YoYo一度嫌棄當時的 Eric事業無成分手， Eric發奮成為了 figure王後，二人藕斷絲連， 01年曾翻撻，但相戀六年一樣散。

盧巧音

兩人因夾 band認識。 05年，於芝華士派對中碰頭，火速撻著，當年 Candy更放棄住大坑千呎寓所，以萬元租住土瓜灣傲雲峰六百呎單位與 Eric同居，疊埋心水做蘇太，可惜臨門撻 Q，拍拖三年分手。

杜如風

於 11年撻著，二人聚少離多，加上 Eric嫌女友性格過於硬朗，有傳王菀之在二人冷戰期間介入做第三者，杜如風亦毫不留戀，即時翻撻黃又南。

鍾意就快D Share啦！

下一篇 》