有指陳芷菁因擔心黃秋生帶埋新班底角逐演協職位，會影響她在會內勢力，故耍手段將秋生及一眾申請入會的藝人驅趕，引起其他理事不滿，與她交惡。
探熱針
𡁻秋生玩家棟辣天明 陳芷菁演協放火
去年底演藝人協會因改選問題鬧出連串風波，獲辭職的曾志偉推舉接棒的黃秋生，與秘書長陳芷菁為入會一事各執一詞，最終令選舉流會，雙方因此勢成水火。據悉，愛搞小動作的陳秘書早前更與出名好脾氣的王祖藍拍枱吵大鑊，與洪天明、錢嘉樂、林家棟等人亦積落唔少牙齒印。
剛成功連任演協秘書長的陳芷菁，日前再出招𡁻黃秋生，公開指他未交會費，秋生聞言馬上反擊：「但佢之後又通知我，叫我唔使交會費。」莫非又玩嘢！
加人幫拖
上週五情人節（二月十四日），演協閉門投票，推選成龍做會長，譚校長話齋：「焗住認頭。」演協不能一日無主，但成龍長期不在港，加上經常失言，由他代演藝界發聲謀福利，難免受外界質疑。
為「幫輕」成龍，新一屆副會長亦罕有地人強馬壯，包括苗僑偉、唐季禮、任達華及肥媽瑪利亞。至於副秘書長，亦由過往兩人增至四人，有路芙、錢嘉樂、吳家樂及張崇德。據悉今次「曬冷」陣容另有原因，無非想箝制近年在會內勢力日益壯大、是非不斷的連任秘書長陳芷菁。
早前陳秘書與黃秋生就入會一事各執一詞開火，又請交表入會的藝人食閉門羮，事後陳芷菁以「受害人」身份在微博申訴：「請放過我小女子」，並指自己遇劫數。據悉上週五閉門選舉期間，有數名圈中分量級人物，即場向陳秘書下「封嘴令」，縱然連任秘書長，陳芷菁只強顏歡笑，但並非省油燈的她，見傳媒主動埋身，乘機再借題發揮：「黃秋生到依家都未交會費。」
鬧到拍枱
除與黃秋生有積怨，過去陳芷菁在演協內亦火頭處處。王祖藍、洪天明、錢嘉樂和林家棟，全部與她有牙齒印，身為上屆理事之一的王祖藍，選舉當日全程無影，嬲到放棄投票。
「好多理事都覺得陳芷菁搞風搞雨，不過為咗個會著想忍得就忍。但嗰次佢請班藝人食閉門羮，祖藍睇唔過眼，開會同佢理論，兩個鬧到面紅耳赤，拍曬枱嗰隻。祖藍覺得再做落去好冇癮，亦唔想再留喺是非圈入面，所以一個月前未期滿就辭職，投票日都費事嚟！」知情者說。
除了王祖藍無眼睇，在梅艷芳揸 fit年代，為演協義務效力的李律師，同樣因不滿陳芷菁對會規自行「釋法」，最近亦劈炮。
走完一個又一個，但陳芷菁仍未肯收手，尤其是親黃秋生的。
「有幾個理事建議搵呂慧儀、郭少芸入嚟做，但陳芷菁覺得佢哋係秋生嘅人，即刻落閘；當日選完，洪天明因為唔滿意有人阻頭阻勢，嬲到面都黑埋！仲有之前做過副會長嘅林家棟，就算佢好認真為個會，但最後都係俾陳芷菁玩走。」
志偉冇覆
至於被陳芷菁公開指責未交會費的黃秋生，事後在記者追問下踢爆：「嚇，但我第二日收到佢（指陳芷菁） WhatsApp，通知我話以後會員唔使交會費，以後我就係會員喎！會唔會有咩誤會呢！（事隔一日就改例，有冇覺得好奇怪？會唔會去問清楚？）是但啦！我呢排好忙，遲啲先啦！」
秋生聲稱由被拒諸門外，到放棄參選當中因由，均以電郵向曾志偉交代一切，但一直未獲對方回覆，但曾志偉上週卻表示已跟秋生聯絡溝通，令秋生覺得莫名其妙：「冇呀，冇收到喎！（點解又係有出入？）我呢排唔得閒，遲啲先問清楚。」
|
鍾意就快D Share啦！
|
|
|
