馮仁昭四圍超：DaDa拆線 收神秘去疤膠布 - 馮仁昭
陳靜（DaDa）本月7日出席朋友喺中環老蘭生日派對，結果樂極生悲，佢唔小心俾身邊友人嘅門牙撞崩額頭，DaDa右額即時爆缸，第二日就去醫院縫咗13針。雖然額頭有傷，但DaDa唔想影響兩部電影拍攝進度，堅持貼膠布同用棉花遮住傷口化妝開工。
■DaDa前日到醫院拆線，傷口埋得幾好。
傷口埋得唔錯
DaDa前日繼續同杜汶澤為電影《唐伯虎衝上雲霄》開工，由於要戴古裝頭套，所以可以完全覆蓋住傷口，佢前日趕戲到傍晚，跟住先坐車去醫院拆線，DaDa嘅傷口已經完全埋口，但仲清晰見到有一條深色嘅疤痕。DaDa噚日喺電話度話：「拆線時唔痛，醫生都話傷口埋得唔錯，要我好好護理。」DaDa表示會繼續戒口，聽醫生指示，務求將疤痕印減到最淡，佢話：「我受傷嘅消息見報後，情人節前仲收到神秘人寄咗盒去疤膠布畀我，多謝佢咁有心，醫生話過幾日可以開始貼。」DaDa仲搞笑話劇組人員怕咗佢呢個烏龍王，猛提佢要遠離硬物。
撰文：馮仁昭
■DaDa雖然負傷度情人節，但收到神秘人寄嚟嘅去疤膠布（右圖），即時冧曬！
|
鍾意就快D Share啦！
|
|
|