商台節目《風波裡的茶杯》九年玩完，大班被俞琤解僱，取代大班的李慧玲九年後亦被俞琤解僱，風水輪流轉要上大班網台 D100做客席主持。
真面目
幕後黑手 大班斟過 dbc種禍 俞琤惡手整走李慧玲
上週三（ 12日）下午五點，商台突然發出傳媒稿及職員通告，即時終止節目主持合約，再派員代收拾辦公桌，粗暴解僱名嘴李慧玲。
事出突然又毫無解釋引起全民憤怒，商台被質疑受政治壓力，幫梁振英政府除去眼中釘，李慧玲被掃出商台，新聞自由與公理同時亦被掃出商台。
本刊獲悉，今次商台行動既有梁振英的無形政治因素，亦肯定係場辦公室政治。由 11年鄭經翰密斟李慧玲跳槽為 dbc開台，已惹怒俞琤，由那時開始俞琤已密謀怒炒李慧玲。梁振英政府未正式出手，俞琤率先配合「剷李」，演變至鷸蚌相爭局面， 689最開心！
上週二（ 11日）陳志雲在商台團拜宣布職務由「行政總裁」變「首席智囊」， 13日傍晚李慧玲就被即時解僱，難怪個個斷言係陳志雲主意，上週四李慧玲開記招都全程咬住陳志雲唔放，連商台官方回應「君子相分，不出惡言」八個字，都被外界以為係出自平時咬文嚼字的陳志雲。
扮聽眾打去大班台
李慧玲個人記招細述與陳志雲結怨史，雖然陳志雲喺商台一人之下萬人之上，但怒炒李慧玲幕後的總指揮是副主席俞琤。據知情人士透露，俞琤 04年找來跑政治新聞的李慧玲，起用從冇廣播經驗的她在商台開咪，俞琤一度甚嘗識李慧玲，不過密月期至 11年中，大班斟李慧玲過檔 dbc開咪為止。
「 YT（俞琤）最初的確好錫李慧玲，兩個成日一齊去食飯飲紅酒食大閘蟹，不過陳志雲入咗去做 CEO後， YT表面上淡出，先同李慧玲冇咁密接觸；到咗大班話想撬李慧玲過 dbc， YT嬲到震，佢覺得李慧玲有離心，加上仲要係想去大班度， YT當年一手炒大班，一直冇朋友做。」知情者說。
據知由那時起，俞琤開始遊說陳志雲開咪。消息人士指，俞琤曾話「商台冇咗佢（李慧玲）都得」！更極力部署由靚聲出名的陳志雲開咪，逐步整走李慧玲。「 689憎李慧玲就好多人都知啦，不過李慧玲得罪埋俞琤連佢自己都唔知！佢正式調離《晴朗》，轉做夜晚《左右大局》後，接受雜誌訪問大爆料，搞到有狗仔隊追住何驥（主席）和俞琤問回應，呢單嘢俞琤要護主心切，更加迫陳志雲要盡快出手。」
有指李慧玲調到晚上時段期間，行為更加飄忽，除不願與管理層溝通外，更在明報撤換老總一事，她以聽眾身份致電 D100，與大班傾了差不多半個鐘 phone-in，幾乎變嘉賓主持咁滯。「俞琤知道之後，更加覺得『係時候』！講真，以陳志雲咁高 EQ，即使你當面指住佢話佢有破壞冇建設，佢都未必會嬲！」
李慧玲：佢係前台劊子手
陳志雲在炒人前一日宣布轉職「首席智囊」同樣巧手安排，既大條道理脫離管理層、又可符合通訊局新例，繼續開咪主持節目。
週一（ 17日），連日以來到處發聲鳴寃的李慧玲再踩上 D100《風波裡的茶杯》接受鄭經翰訪問。
本刊問她被炒一事是否由俞琤落 order，她說：「一直同我直接交涉嘅係陳志雲，但我相信實有幕後支持，包括俞琤同何生（商台主席何驥）！」之後她再強調陳志雲係前台劊子手，幕後一定有人同意。問她導火線是否由大班叫她跳槽到 dbc，她說：「我唔認為係咁！」她亦承認自己早前曾致電 D100發表明報換老總一事，「我唔使扮（聽眾），我就係李小姐！我係有打到！」
而大班就話 D100請唔起李慧玲，「邊有錢請人？我哋係和平飯店，邊個喺江湖撈唔掂咪請囉！（有冇傾過？）以前 dbc已傾過啦……不過（𠵱家）由佢決定啦，佢有選擇！（俞琤要炒佢？）一定關俞琤事！佢份人好 business，商業決定但受政治影響！」
十年咒怨
俞琤、鄭經翰及李慧玲的恩怨十年前已經拉開序幕，想不到當年大班被炒，商台捧起李慧玲做新名嘴，十年後又輪到李慧玲同樣下場，轉投大班網台訴苦水。
|
鍾意就快D Share啦！
|
|
|