掃呢頁CODE去手機

2014年2月26日 星期三

[FACE 353 專訪] 首 gag騷當奴 MF,




FACEweekly

首 gag騷當奴

前年同另一位拍檔阿占重組「艾粒」,如今每天準時下午兩點,扭開收音機聽《口水多過浪花》,俾 Do姐「恰」嚇笑嚇兩粒鐘, 903DJ當奴(唐劍康)如今「孤身」上路, 4月踏上舞台,活現節目中的短劇《真情》中的八太主角阿家,誓要在北角新光戲院大劇場,開金口慰藉各大 OL、太太、婆婆咁話!豈止潮流中堅、跑步愛好者, 2014阿奴話要做埋中女殺手!

開騷睇粉絲

有聽開《口水多過浪花》,就知兩口子當奴同阿占的火花有幾好笑,節目做近 4年,除了由艾粒到現在儲落一班聽眾,當奴話開騷係想睇班粉絲係點嘅樣,「每次出街,總有人行埋來同我講,佢啲朋友好鍾意我,咁究竟班朋友係點嘅樣,做乜職業,我好好奇。」上年創作了阿家一角,更是借力打力,「自己形象一向比人好玩的感覺,反而變咗阿家,說教都有說服力。」

主攻中年女人

以八婆語氣講時事,帶到話題之餘,亦起碼有得笑,「近排好多中年女性朋友都唔開心,以前都恨拍拖,𠵱家連恨都無。」齋畀中年女性觀眾?唔叫你中女殺手都唔得啦,「只係節目時段,聽眾年齡層大多為工作中的 OL、等湊放學的太太咁啫。」原來阿家一角,真正是由'95無線長劇《真情》中由演員黎宣飾演的阿家演變,「佢睇唔過眼乜都要鬧,現實中的我一樣,好多都睇唔過眼。」

對或錯的尺

新移民未經審批來港、$108鰻魚飯等,好多好多每天的不公事,都成為阿家的發洩對象,「個社會好唔健康,連把關的都唔覺得係問題,把尺已無分對與錯。」每日起床一開電話睇新聞都有無限量供應,「拎起電話上網睇每日發生的瘋狂事,好似早前綜援揸 Benz,被十幾個垃圾筒圍住架車單新聞,真係連作都作唔出呢啲事。」

跑出減壓

雖然日日對住不公事,但當奴最緊要都係想大家開開心心,「畀錢入場唔好太 heavy喇,所以除了講少少時事,都會講嚇減肥呀、風水嘢咁,手頭上有成 40個話題,但要濃縮咁多個話題,都有啲頭痛。」訪問早於 1月進行,阿奴話已經有壓力,開始胃痛,「阿占話叫我跑步減壓。」唔使叫啦,當奴一向愛跑步,前星期渣馬以 1小時 55分跑畢半馬,如此落力,大家唔使擔心入場,佢唔會「殺」個中女片甲不留呀!

〈當奴 All You Gag歡樂阿家藐咀騷〉

日期: 2014年 4月 1-6日 8:15pm

地點:北角新光戲院小劇場

票價:$350/$250( 3月 4日起於新光戲院大劇場、全線通利琴行 Cityline購票通公開發售)



鍾意就快D Share啦!