掃呢頁CODE去手機

2014年2月26日 星期三

[FACE 353 ] 來自追星星的你 星星,來追星星的你,MF,




星星報告

來自追星星的你

《來自星星的你》熱爆半個亞洲,追星熱有增無減。除了全民煲劇追《星》,大小明星都中星星毒,個個想演一次千頌伊,迷主角外,更引爆周邊產品搶購熱潮,港女買斷千頌伊用的唇膏顏色、學千頌伊著衫;食千頌伊最愛的炸雞、啤酒餐以至玩 LINE都要用千頌伊金秀賢 stickers……今期睇完《星星》現象,再喊住煲埋大結局啦!

星星追《星星》

《來自星星的你》喺界受歡迎程度,分分鐘超越 05年於香港播的韓劇《大長今》,秒殺香港。人人捕住追最新一集,當中更不乏一班索港星。

曾經同金秀賢合作過的 Angelababy,亦自認係《星星》忠粉,她說最愛一幕係金秀賢於雪地嚇全智賢,而苟芸慧就最愛兩位主角於屋內的談情戲。其實講到尾都係因為現實中難以搵到一個愛你 4百年的癡情男啫!

Angelababy:中曬毒

「上年年底喺韓國同佢(金秀賢)合作拍 Samsonite RED廣告,佢嗰陣同我講話拍《星星》,冇諗過自己都會追韓劇。由第二集開始睇,𠵱家都中曬毒。一有新一集播出就睇!我最鍾意嗰幕係金秀賢係雪地嚇全智賢嗰場戲(第 11集)。」

金秀賢𠵱家 hit爆,佢同 Baby上年攬住拍嘅 Samsonite行李廣告亦在韓國大受歡迎。廣告中兩個咁 sweet,真係令唔少港女葡萄。

DaDa:因全智賢先睇

「不嬲有追開韓劇,由《繼承者們》追到《星星》,我因為全智賢先睇。可能佢戲中做女明星,又喺屋企會儍更更,對我來講好有共鳴。我最鍾意有幕全智賢同輝京喺摩天輪,跟住金秀賢將時間停止。如果香港拍,我諗劉德華配陳慧琳啦!」

DaDa自認係韓劇迷,除咗《星星》外,早前嘅《繼承者們》亦有追,不過 DaDa覺得李敏鎬靚仔過金秀賢!」

呢幕當輝京喺摩天輪內向全智賢求婚,由於金秀賢唔想聽到答案,於是即刻用超能力將時間停止。

DaDa現同古天樂忙拍《 Z風暴》,但寧願瞓少啲都要追星星。

苟芸慧:翻睇 2次

「我全部睇曬,再翻睇咗兩次。除咗劇情好睇,亦留意全智賢做戲,尤其佢大癲大肺做得好自然,好可愛。我鍾意佢兩個喺屋企嘅所有談情戲,好 sweet。如果拍港版我諗鄭嘉穎幾適合,女角如果網友唔介意畀我試嚇啦,哈哈!」

苟姑娘係瘋狂《星星》迷,上週四出席完活動後即返屋企睇第 19集,而且每集都會睇兩次以上。

同鄭嘉穎合作過嘅苟姑娘撐鄭視帝做都 manager,但年紀差好遠喎,金秀賢 26歲,嘉穎 44歲。

苟姑娘最愛睇 2人談情戲,同留意全智賢演技。

關心妍:必睇片尾

「日日留意住《星星》所有新聞,特別鍾意片尾 special,嗰啲先係最精采,其中一幕喺雪地,都 manager(金秀賢)拒愛,全智賢冇癮走,但同時佢令到時間停止錫番全智賢一啖。全智賢好有靈氣,做 sweet戲嗰陣又可以做到好卡通。如果香港拍,我諗舒淇同梁詠琪啦,男主角我諗方大同。」

關心妍話最精采係每集嘅 special,其中第 7集千頌伊同隻熊仔講嘢,呢幕佢最記得。

周秀娜:世上冇都敏俊

「我好鍾意全智賢,因為佢先集集追,我最鍾意有集(第 7集)全智賢就嚟跌落山崖,佢一叫金秀賢就出現。呢套劇令我明白,呢個世界係冇都敏俊咁嘅男人,只有外星先有。如果要拍港版,我希望男主角係 Chilam啦,女主角我都想做喎!」

Chrisse話如果拍港版就想佢自己同張智霖做男女主角,不過佢嚟緊新戲都係同 Chilam合作,應該會有火花啦。

Chrisse最愛上咗雪地亡命車嘅千頌伊一叫,都敏俊就現身,因為現實中冇咁嘅男人。

Chrissie雖然冇 cap自己煲星星嘅畫面,不過就影自己對腳,仲話想遇到自己嘅都敏俊喎!

Bosco Vs峯峯

每逢有外地劇 hit,網友都會即刻幻想拍港版。今次《星星》咁 hit,當然唔少得網友推舉邊個做男女主角。男主角方面暫時都係以林峯同黃宗澤爭崩頭,反而女主角就大部分投佘詩曼。不過都有唔少網民覺得千祈唔好拍港版,因為港星真係同原裝嗰兩位差太遠,而且 TVB製作差太遠,拍出嚟肯定成為恥笑對象。就算傳舒淇和趙又廷拍華語版,星迷都噓。

黃宗澤呢期人氣夠,髮型有少少相似,做都 manager都夠說服力,不過其實個樣似輝京多啲。論外形,林峯同都 manager就冇忽似,勝在喺 TVB係一哥,唔搵佢拍仲搵邊個?《蘋果日報》圖片

全智賢喺劇中惡又得,賣萌又得,咁難演角色相信只有阿佘先能夠掌握到。《蘋果日報》圖片



鍾意就快D Share啦!